Ne faka‵sao ne Iesu a tino fakamaoni i te taimi ne tuku atu ei tena ola e pelā me se taulaga togiola. (Mataio 20:28) Tela la, e taku a Iesu i te Tusi Tapu ko te “Fakaola o te lalolagi.” (1 Ioane 4:​14) E fai mai foki i ei, penei: “E seai se fakaolatagai e maua i se isi tino, me e seai aka foki se igoa mai lalo i te lagi ne tuku mai ki tino ke mafai o ‵sao ei tatou.”​—Galuega 4:​12.

 Ne ‘tami a [Iesu] ki te mate mō tino katoa’ kolā e fakatuanaki ki a ia. (Epelu 2:9; Ioane 3:​16) Tela la, “ne fakatu aka ne te Atua a [Iesu] mai te mate,” kae ne toe foki atu a Iesu ki te lagi e pelā me se tino faka-te-agaga. (Galuega 3:​15) I konā, ne mafai ei ne Iesu “o faka‵sao katoatoa ne ia a tino kolā e olo atu ki te Atua e auala i a ia, me e ola faeloa a ia ke fakamolemole mō latou.”​—Epelu 7:​25.

Kaia e ‵tau ei o fakamolemole a Iesu mō tatou?

 A tatou katoa ne tino agasala. (Loma 3:​23) A te agasala e fai pelā me se ‵pui i te va o tatou mo te Atua, kae e iku atu ki te mate. (Loma 6:​23) Kae ne tavini atu a Iesu e pelā me “se tino fesoasoani” mō latou kolā e fakatuanaki ki tena taulaga togiola. (1 Ioane 2:1) E fakamolemole a ia mō latou, mai te akai atu ki te Atua ke fakalogo ki olotou ‵talo kae fakamagalo olotou agasala e ‵tusa mo te taulaga mate a Iesu. (Mataio 1:​21; Loma 8:​34) E gasuesue te Atua e ‵tusa mo vaegā fakamolemole penā mai i a Iesu ona ko te mea e fetaui ‵lei mo tena loto. Ne uga mai ne te Atua a Iesu ke “fakasao a te lalolagi e auala i a ia.”​—Ioane 3:​17.

E mata, ko lava loa i te talitonu ki a Iesu ke faka‵sao ei tatou?

 Ikai. E tiga eiloa e ‵tau o tali‵tonu ki a Iesu ke maua te fakaolataga, e uke atu a mea e manakogina. (Galuega 16:30, 31) E fai mai te Tusi Tapu: “E pelā eiloa mo te foitino e mate māfai e seai se agaga, e penā foki te fakatuanaki e mate māfai e seai ne galuega.” (Iakopo 2:​26) Ke faka‵sao tatou, e ‵tau o:

•   Iloa ne tatou a Iesu mo tena Tamana, ko Ieova.​—Ioane 17:3.

•   Fakamalosi aka te fakatuanaki ki a lāua.​—Ioane 12:44; 14:1.

•   Fakaasi atu ‵tou fakatuanaki mai te faka‵logo ki lā fakatonuga. (Luka 6:​46; 1 Ioane 2:​17) Ne akoako mai a Iesu me e se ko tino katoa e ka‵laga atu ki a ia “te Aliki” ka faka‵sao, kae ko latou fua kolā e “fai ne [latou] te loto o [tena] Tamana telā i te lagi.”​—Mataio 7:​21.

•   Tumau i te fakaasi atu o te ‵tou fakatuanaki faitalia a tulaga faiga‵ta. Ne fakaasi manino mai ne Iesu te mea tenā i ana pati: “Kae ko te tino telā e kufaki ke oko ki te gataga ka sao eiloa.”​—Mataio 24:13.