E seai. E se fakatulafono ne te motou fakapotopotoga saukātoa se fakasologa o ata vitio, tusi, io me ko pese kolā e ‵tau o ‵teke atu a tino ki ei. Kaia?

  E fakamalosi mai te Tusi Tapu ki tino katoa ke akoako faka‵lei “te malosi o olotou mafaufau” ke iloa te mea tonu mai te mea ‵se.—Epelu 5:14.

  E tuku mai i te Tusi Tapu a akoakoga fakavae faigofie kolā e mafai o fakaaoga ne se Kelisiano ke filifili a fakafiafiaga. a Kae i feitu katoa o te olaga, a te motou fakamoemoega ko te “fakamautinoa aka faeloa ne [matou] a mea kolā e talia ne te Aliki.”​—Efeso 5:10.

  E akoako mai te Tusi Tapu me e maua ne ulu o kāiga se tamā pulega, telā e mafai o filifili aka ne latou ke se talia a nisi fakafiafiaga mō olotou kāiga. (1 Kolinito 11:3; Efeso 6:1-4) Kae i tafa o te kāiga, e seai se tino e isi sena aiā ke fakatapu ne ia a nisi ata vitio, pese, io me ko ata mō Molimau katoa.​—Kalatia 6:5.