A tino kolā e fakatuagagina e maua ne latou a te loto tali‵tonu o olotou mātua, taugasoa mo pule o latou i galuega. E tau‵tali faka‵lei a latou ki tulafono, tausi ki olotou feagaiga ne fai, kae faipati faeloa ki te mea tonu.

Toeitiiti i fakanofonofoga katoa, a te lasi o te saolotoga e maua ne koe e faka‵na eiloa ki te lasi o te tali‵tonu o tino ki a koe i se taimi leva.

“A te ‵toe auala ‵lei ke maua ne koe a te loto tali‵tonu o ou mātua ki a koe ko te fakaasi atu ne koe i a koe ko matua ‵lei kae fakatuagagina, e se ona fua me ‵nofo mai a lāua kae māfai foki loa a lāua e ‵galo.”—Sarahi.

FAKATAKITAKIGA MAI TE TUSI TAPU: “Ke tumau faeloa i te fakamaoni aka ne koutou a koutou eiloa.”—2 Kolinito 13:5.

Kafai e manakogina ke tali‵tonu malosi a tino ki a koe io me ke toe maua te loto talitonu telā ne galo e uiga ki a koe, e mafai eiloa o fesoasoani atu a manatu konei.

Ke fakamaoni.‵Toe mea vave ke sē tali‵tonu a tino ki a koe mafai koe e gutu loi. Kafai koe e faipati ‵tonu mo te fakamaoni—maise eiloa ki au mea ‵se e fai—ka tali‵tonu atu a tino ki a koe.

“E faigofie ke fakamaoni māfai e ‵lei a mea katoa. Kae kafai e fakamaoni koe o fakaasi ‵tonu atu se mea telā e fakamasei i ei tou ata, ka tali‵tonu malosi atu a tino ki a koe.”—Caiman.

FAKATAKITAKIGA MAI TE TUSI TAPU: “Kae e ma‵nako matou ke fakamaoni i mea katoa e fai ne matou.”—Epelu 13:18.

Se tino fakatuagagina. E isi se savea ne fai i te Iunaite Sitete, kae e 78 pasene o tino ‵poto kolā ne fai ne latou te savea tenei, ne fai mai me i te fakatuagagina se “mea e tasi mai i mea e tolu telā e fakatāua ‵ki ne kamupane ki tino kolā e fakaga‵lue ne latou.” Te tauloto ke fai e pelā me se tino fakatuagagina i te taimi nei ka aoga malosi ki a koe i te taimi e matua ei koe.

“E lavea ne oku mātua māfai e fai ne au aku galuega e aunoa mo te fakatonu. Ko te lasi o te fakaasi ne au a te uiga tenei, ko te lasi foki o te lā loto tali‵tonu mai ki a au.”—Sarah.

FAKATAKITAKIGA MAI TE TUSI TAPU: “Au e talitonu me ka fai eiloa ne koe te mea tenei, . . . mo te iloa me ka fai eiloa ne koe a mea e uke atu i lō mea kolā e fai atu ne au.”—Filemoni 21.

Ke kufaki. E se pelā mo te ‵tupuakaga o se tino, telā e laveagofie ne tino, e manakogina se taimi tai leva ke lavea ne tino i a koe se tino telā ko mafai o pule faka‵lei ki ou lagonaga kae ko matua ‵lei foki a tou mafaufau.

“E manakogina a taimi mo taumafaiga e uke ke loto tali‵tonu ou mātua mo nisi tino ki a koe. Kae e mafai eiloa o ati aka ne koe a te uiga tenā māfai e galue faeloa koe ki ei i taimi katoa.”—Brandon.

FAKATAKITAKIGA MAI TE TUSI TAPU: “Ke fakapei ki luga i a koutou a te . . . kufaki.”—Kolose 3:12.