E MATA, E MANATU IFO KOE I A KOE SE TINO FIAFIA? Kafai e penā eiloa, se a te mea e fai ne ia koe ke fiafia? Tou kāiga, tau galuega, io me ko tou talitonuga? Kāti e olioli malosi loa koe ki se mea telā ka fai ne ia ke fiafia koe, e pelā mo te kausaki atu ke fakaoti au akoga, ke maua se galuega ‵lei, io me ke ‵togi se motoka fou.

E tokouke loa a tino e maua ne latou se lagonaga fiafia māfai ne fakataunu se fakamoemoega o latou io me ne maua se mea tāua telā ne manakogina ‵ki ne latou. Kae ne pefea te leva o te mauaga o se lagonaga penā? I te ukega o taimi, e maua fua mō se vaitaimi toetoe, telā e mafai o fakafanoanoa.

Ko oti ne fakamatala mai me i te fiafia ko te mauaga o se tulaga ‵lei telā e tumau kae aofia i ei a lagonaga lotoma‵lie ke oko ki te lasi o te fiafia i te olaga mo te manakoga ke tumau a te mea tenā.

E se gata i ei, ona ko te fiafia se lagonaga telā e tumau, e fakanā eiloa te fiafia ki te vaegā olaga e ola i ei te tino i lō i mea kolā e maua ne ia. Kafai e fai atu penei, “Au ka fiafia eiloa māfai . . . ” ko tena uiga, e isi se gataga ki tou fiafia.

E pela me se fakaakoakoga, ke fakatusa ne tatou te fiafia ki te mauaga o se foitino malosi. Ka fakafiafia mai pefea te tulaga tenā ki a tatou? Ka fai eiloa tatou penā mai te fakaaogaga o auala ‵poto ki meakai e ‵tau o ‵kai tatou ki ei, fakamalosilosiga o te foitino, mo te vaegā olaga e ola i ei tatou. I se auala tai ‵pau, a te fiafia se mea telā e maua mai te ola i se olaga ‵lei, se olaga telā e ola e ‵tusa mo fakatakitakiga aoga.

Ne a fakatakitakiga aoga io me ko nisi vaega o te olaga e ola ei tatou kolā e mafai o fesoasoani mai ke iloa aka ei te auala ki te fiafia? Faitalia e tāua atu nisi vaega i lo nisi mea, e isi eiloa se auala fakapito e tāua i ei a mea takitasi konei i te fakasologa tenei:

• LOTOMALIE MO TE UIGA KAIMALIE

• FOITINO MALOSILOSI MO TE LOTO MALOSI

• ALOFA

• LOTO FAKAMAGALO

• FUAFUAGA I TE OLAGA

• FAKAMOEMOEGA

E fai mai se tusi tāua poto, penei: “E fia‵fia a latou kolā e se ‵se i olotou auala.” (Salamo 119:1) Ka na onoono nei tatou ki te auala tenā.