E fakamalosi ne Malo ‵Soko a tino ke fakatau fesoasoani, ke āva ki saolotoga o nisi tino, kae ke puipui foki te enivalomene. Kaia? Ne fai mai a Maher Nasser i te UN Chronicle, penei: “A te mafuli‵fuliga o tau o aso, amioga solitulafono e fai ne potukau ma‵sei, te fakakese‵kesega o tulaga o tino i mea tau tupe kolā ko gasolo aka o masei atu, kinauga kolā e se mafai o faka‵lei aka, te gasoloakaga o te aofaki o tino kolā ko olo ki nisi fenua e pelā me ne tino fakaa‵lofa, ko uiga fakasaua i te lalolagi kātoa,masaki ‵pisi mo nisi mea fakama‵taku tai ‵pau penā ko pokotia i ei a tino i . . . fenua katoa.”

A nisi tino ko silia atu foki a mea e fai ne latou, mai te fakamalosi aka ke fakatu se malo ke pule atu ki te lalolagi kātoa. E aofia i ei se tagata poto, se tino tusitala kae se tino pule foki ko Dante (1265-1321) mo te tagata poto [physicist] ko Albert Einstein (1879-1955). Ne talitonu a Dante me e se mafai o filemu te lalolagi ona ko te mavae‵vae i mea fakapolitiki. Ne siki mai ne ia a pati a Iesu Keliso me i so se “malo e ‵nofo mavae‵vae e se mafai o tumau.”—Luka 11:17.

Mai tua malie o te Taua i te Lua a te Lalolagi, telā ne fakaaoga i ei a pōmu ma‵losi e lua, ne tusi atu ne Albert Einstein se tusi ki te Potukau Saukātoa o Malo ‵Soko. Ana pati, “a te Malo ‵Soko e ‵tau o gasue fakavave o fai a fakama‵fuliga e manakogina ke maua te tokagamalie mai te fakatokaga o se fakavae mō se malo tonu ke pule atu ki te lalolagi kātoa.”

E mata, e mafai o tali‵tonu tatou ki tino kolā ka pule mai ki te malo tenei e aunoa mo te faivalevale, se fakatuagagina mo te uiga fakasaua? Io me ka ‵pau eiloa latou mo tino pule‵pule i aso nei? E fakamasaua mai ne fesili konei a pati a te tagata tusitala Peletania ko Lord Acton, telā ne fai mai penei: “A te malosi pule e masani o faivalevale, kae ko te pule katoatoa atu ko te faivalevale katoatoa eiloa tenā.”

Kae e ui i ei, kafai e ma‵nako a tino ke maua ne latou te filemu tonu, e ‵tau eiloa mo latou o ‵kau fakatasi. E mafai pefea o fakataunu te fakamoemoega tenā? E mafai o tonu te mea tenā? E fai mai te Tusi Tapu me e mafai. E mafai kae ka taunu eiloa. E pefea la? E sē se malo telā e aofia i ei a tino fakapolitiki ma‵sei. Kae se malo telā ka fakatu aka ne te Atua. E se gata foki i ei, ka fakaasi mai ne te malo tenā me i o te Atua eiloa te aiā ke pule mai ki ana mea katoa ne faite. Se a te Malo tenā? Ne tuku mai i te Tusi Tapu a tena igoa—“te Malo o te Atua.”—Luka 4:43.

Ne tuku i te mafaufau o Iesu Keliso a te Malo o te Atua i te faiatuga ne ia te ‵talo fakaakoako tenei: “Ke oko mai tou Malo. Ke fai te mea e loto koe ki ei i te lalolagi nei.” (Mataio 6:9, 10) Ao, ka fakataunu eiloa ne te Malo o te Atua a te loto o te Atua i te lalolagi nei, kae e se ko te loto o tino fia fai tofi ma‵luga kae kaima‵nako.

E taku foki te Malo o te Atua ki “te Malo o te lagi.” (Mataio 5:3) Kaia? Ona lā me ka pule ki luga i te lalolagi, e sē pule mai te lalolagi kae e pule mai i te lagi. Ke mafau‵fau ki te uiga o pati konā. Ka sē manako te malo tenei ki koloa io me ko tupe mai lafoga. Ko oko eiloa i te faigofie o te mea tenā ki tino katoa!

E pelā mo te uiga o te pati “malo”, a te Malo o te Atua se malo fakatupu. E isi sena Tupu—ko Iesu Keliso—te tino telā ne maua ne ia te tulaga pule mai te Atua. E fai mai te Tusi Tapu e uiga ki a Iesu, penei:

• “Kae ko te pulega ka tuku i luga i ana tuauma . . . A te malosi o tena malo e gasolosolo eiloa o lasi kae seai se gatamaiga ki tena filemu.”—Isaia 9:6, 7, King James Version.

• “Kae ne tuku atu ki a ia a te pulega, te fakaaloalo mo te malo, kae e ‵tau mo tino, atufenua mo ‵gana katoa o tavini atu ki a ia. A tena pulega . . . ka se mafai o galo atu.”—Tanielu 7:14.

•   “Ko oti ne fai te malo o te lalolagi mo fai te Malo o te ‵tou Aliki mo tena Keliso.”—Fakaasiga 11:15.

I te fakataunuga o pati i te ‵talo fakaakoako a Iesu, ka fakataunu katoatoa a te loto o te Atua i te lalolagi nei e auala i te Malo o te Atua. Mai lalo i te Malo tenā, ka tauloto ne tino katoa a te auala ke tausi atu faka‵lei ki te lalolagi ko te mea ke toe olaola ‵lei a mea ola katoa i ei.

Kae e sili i mea katoa, ka akoako eiloa ne te Malo o te Atua a tino. Ka akoakogina eiloa a tino katoa ki tulaga ma‵luga o te Atua. Ka loto tasi a tino kae ka seai ne mavae‵vaega. E fai mai te Isaia 11:9, penei: “Ka seai ne fakamaseiga e fai ne latou . . . me i te lalolagi ka ‵fonu eiloa i te iloaga o Ieova e pelā mo vai e ‵fonu i ei te tai.”

Ka fai eiloa te lalolagi o tino e pelā mo te manakoga a te Malo ‵Soko—ke filemu-kae a‵lofa a tino katoa i ei. E fai mai te Salamo 37:11, penei: “Kae ka maua ne latou te fiafiaga sili ona ko te lasi o te filemu.” I se taimi pili mai mua nei, ka se ‵toe lagona ne tatou a pati e pelā mo “amioga solitulafono,” “fakalailaiga o te lalolagi,” “mativa,” mo “taua”. Kae ka tupu māfea te mea tenei? Ao, ka pule mai māfea te Malo o te Atua? Kae ka pule mai pefea? Ne a mea aoga ka maua ne koe mai tena pulega? Ke onoono nei tatou ki ei.