E Pokotia Pefea i Poto ‵Fou Ou Mafaufauga?
E tauloto faeloa a tino ki mea e uke ke aoga mō te akoga, galuega, io me ko nisi pogai. E mafai o fesoasoani a poto ‵fou. Ko sili atu te faigofie i aso nei ke maua a fakamatalaga e uke e aunoa mo te tiaki ne koe o tou fale, io me e tu aka mai tou nofoga.
Kae ko iloa aka ne tino kolā e lasi te fakaaoga o poto ‵fou me . . .
-
e faigata ke tuku tonu olotou mafaufau i te taimi e fai‵tau ei.
-
e faigata ke saga tonu ki se galuega e tasi.
-
e ‵fiu vave māfai ko nofo tokotasi.
MEA E ‵TAU O ILOA NE KOE
TE FAITAU
E onoono fakavave fua a nisi tino ki te mataupu i lō te faitau malielie ki manatu i te tusi.
A te faitau fakavave se mea ‵lei māfai e ‵sala fakavave ne koe te tali ki se fesili. Kae e mafai o fai ei ke se malamalama faka‵lei koe i se mataupu tāua.
MAFAUFAU IFO: E pefea te ‵lei o tau faitau ki se fuaiupu loa ‵ki? Ka momea aka pefea tou malamalama māfai ko faitau faka‵lei koe ki se mea? —FAATAOTO 18:15.
SAGA TONU
E mafau‵fau a nisi tino me i poto ‵fou e aoga me e mafai ne latou o fai a mea e lua i te taimi e tasi—e pelā mo te melimeli mo taugasoa kae tauloto ana mataupu. Kae kafai ko se tuku tonu olotou mafaufau, kāti ko se mafai o fai faka‵lei te avā galuega konā, maise māfai e ‵tau o ‵saga tonu atu ki ei.
E manakogina te loto pulea ke mafai o saga tonu, kae e tāua eiloa ke fai penā. “E se uke i ei au mea ‵se kae e se manavase malosi foki koe,” ko pati a te talavou ko Grace. “Ne tauloto au me e sili atu i te ‵lei ke saga tonu ki se mea e tasi i lō mea e uke atu i te taimi e tasi.”
MAFAUFAU IFO: A te faiga o galuega e uke i te taimi e tasi, e mata, e mafai o fai i ei ke se saga tonu koe kae masaua au mea ne tauloto? —FAATAOTO 17:24.
TE NOFO TOKOTASI
E se fia ‵nofo a nisi tino i a latou eiloa, tela la, ko fakaaoga ne latou a poto ‵fou ke fakafia‵fia ei latou. “E ‵fiu vave au i loto i se 15 minute māfai e se onoono ki taku telefoni, io me ko te TV,” ko pati ne fai ‵tonu mai ne te fafine ko Olivia.
Kae ko taimi e nofo tokotasi i ei se tino—se avanoaga gali ‵ki tenā ke mafaufau ‵loto, se vaega tāua o te tauloto telā e aoga ki talavou mo tino ma‵tua.
MAFAUFAU IFO: Kafai ko nofo tokotasi koe, e a, e mafai o fakaaoga faka‵lei ne koe te taimi tenā?—1 TIMOTEO 4:15.
MEA E MAFAI O FAI
ILOILO TE FAKAAOGAGA O POTO ‵FOU
I auala fea e mafai o fakaaoga ne koe a poto ‵fou ke momea aka te ‵lei o te auala e tauloto ei koe? Ne a feitu e fakalavelave atu ei a poto ‵fou ki tou saga tonu o tauloto?
AKOAKOGA FAKAVAE I TE TUSI TAPU: “Taofi ‵mau ki te poto mo te malosi o te mafaufau.”—FAATAOTO 3:21.
