FAKATAKITAKIGA MAI TE TUSI TAPU: “E seai se tagata kai takalialia ki tena foitino, e fagai kae e fakapelepele ne ia.”—Efeso 5:29.

TE MEA E FAKAUIGA KI EI: E fakamalosi mai te fakatakitakiga tenei mai te Tusi Tapu ke fai ne tatou te ‵toe mea e mafai o fai ke tausi ‵tou ola ‵lei i te feitu faka-te-foitino. E fai mai se lipoti me i te ukega o masaki o te foitino e māfua mai ona ko filifiliga e fai ne tino ki te auala e ola i ei latou. Tela la, a te faiga o filifiliga ‵tonu ka iku atu ki te ola ‵lei.

MEA E MAFAI NE KOE O FAI:

• Niutilisini. Ke lava au niutilisini mai te kai ki mea‵kai paleni kae inu malosi ki vai.

• Ke Gasuesue. A te fakamalosilosi o te foitino ka fesoasoani atu ki a koe faitalia ou tausaga, masaki io me sē katoatoa. Faitalia me e mafai o fesoasoani atu ou tino pele mo tokita ki tau polokalame fakamalosilosi foitino, e fakalagolago eiloa ki a koe ke fakagalue aka ne koe!

• Ke Lava te Moe. A te sē lava o te moe mō se taimi leva ka māfua mai ei a masaki ‵lasi. Ona ko mea e fai ne nisi tino i taimi kolā ne ‵tau o moe ei latou, ko iku atu ei ki te sē lava o te moe. Kae e ui i ei, kafai e filifili aka ke moe koe i te taimi tonu, ko filifili loa ne koe se olaga tai ‵lei.

FAKATAKITAKIGA MAI TE TUSI TAPU: “Ke faka‵ma la tatou mai i so se mea e fakalailai ei te foitino mo te agaga.”—2 Kolinito 7:1.

TE MEA E FAKAUIGA KI EI: Ka maua eiloa ne tatou te ola ‵lei māfai e kalo kea‵tea mai mea kolā e fakalailai ei te foitino mo vailakau ma‵sei, e aofia i ei mea kolā e faite ki ei a paka, kolā e lauiloa e pelā me ne mea e fakamāfua i ei a ma‵saki mo te mate.

MEA E MAFAI NE KOE O FAI: Ke filifili aka se aso mautinoa ke ‵kati kea‵tea mai mea konā, kae ke māka ne koe i luga i tau kalena. Mai mua o te aso tenā, ke ‵pei kea‵tea a sikaleti, mea tuku lefu, afi, mo nisi mea kolā e aofia i ei a te faifaiga fakamasei tenei. Ke kalo kea‵tea mai koga kolā e ‵nofo sāle i ei a tino ‵pusi. Ke fakaasi atu ki ou taugasoa kolā ka ‵lago atu ki tau fakaikuga.

KE FAI FAKA‵LEI AU MEA E FAI.

“Kafai e faite ne koe se fale fou, e ‵tau foki mo koe o faite se ‵pui i luga i te tuafale o tou fale, ko te mea ke mo a ma agasala koe i te fakamaligi toto māfai e tō se tino mai tou fale.”​—TEUTELONOME 22:8.

KE TAOFI TOU KAITAUA.

“A te tino telā e tuai o ita e lasi tena atamai i te faiga o faka‵tauga ‵lei, kae ko te tino e se lava te kufaki e fakaasi atu ne ia tena valea.”​—FAATAOTO 14:29.

SA ‵KAI MALOSI.

“Ke mo a ma aofia koe i a . . . latou kolā e ‵kai mānumānu.”​—FAATAOTO 23:20.