E ISI eiloa se auala e ‵tau o fai i ei a tautoga e ‵tusa mo te Tulafono faka-Mose. Kae i aso o Iesu, ne kamata o lauiloa a te faiga o tautoga ki tino i te taimi tenā, kae toeitiiti ko mea katoa e tauto latou ki ei. Ne ma‵nako latou o fai te mea tenei ke fai aka pelā i a latou e fakatalitonugina; kae ne taku fakamasei fakalua ne Iesu a te faifaiga tenā. I lō te fai penā, ne akoako mai a ia: “Ke fakauiga fua tau pati ‘ao’ ki te ao, a ko te ‘ikai’ ki te ikai.”—Mata. 5:33-37; 23:16-22.

E ‵tusa mo fakamatalaga i te Theological Dictionary of the New Testament, ne malosi ‵ki eiloa “a te manakoga o tino Iutaia ke fakamaoni aka a fakamatalaga katoa e auala i se tautoga” telā ne mafai o lavea atu i te tusi tulafono, kolā e fakamatala likiliki mai i ei a tautoga kolā e ‵tau o tausi mo tautoga kolā e se ‵tau o tausi ki ei.

E se ko Iesu fua ne taku fakamasei ne ia a mea konei. E pelā me se fakaakoakoga, ne fai mai te tino tusitala ko Flavius Josephus e uiga ki te tulafono faka-Iutaia: “Ne seki talia ne latou a te faiga o tautoga, me e masei fakafia atu i te loi, me fai mai latou me i te tino telā e talitonu ki ei e aunoa mo se tautoga ki te Atua, koi taku fakamaseigina eiloa.” E fai mai foki a tusitusiga i te apokalifa a te kau Iutaia telā ne lauiloa e pelā me ko te Wisdom of Sirach, io me ko te Ecclesiasticus, (23:11): “So se tagata e tauto e se mafai o pule faka‵lei atu ki te fakalavelave.” Tela la, ne taku fakamasei ne Iesu a te faifaiga e uiga ki te manatu māmā ki tautoga. Kafai e fai‵pati tatou ki te mea tonu i taimi katoa, ko se ‵tau ei o fai ne tatou se tautoga ke fakatalitonu aka a ‵tou pati.