Toeitiiti ko tino katoa e ‵lago me i nisi mea e fai ne tino e ‵tonu io me ‵se eiloa. E pelā me se fakaakoakoga, a te tatino, pukemālō, mo te maneaneaga o tama‵liki e taku fakamasei ne tino e tokouke, kae ko te faiga o mea ‵lei, te atafai, mo te loto malamalama e tavaegina ne tino. Kae i nisi feitu o te olaga—ke oko foki loa ki tulaga kolā e aofia i ei a faifaiga fakatauavaga, te fakamaoni, mo te putiakaga o tama‵liki—e tali‵tonu a tino e tokouke me e se ‵tau o isi se filifiliga tonu io me ‵se ki ei. E mafau‵fau latou me ‵lei eiloa so se filifiliga e fai ki ei. E fakavae sāle ne tino a olotou fakaikuga e uiga ki se mea ki olotou lagonaga mo lagonaga o tino i olotou tafa. E mata, e ‵lei te manatu tenā?

E masani o takitaki tatou ne ‵tou lagonaga, io me ko te musumusuga mai loto e uiga ki te mea tonu mo te mea ‵se, telā e taku me ko te loto lagona. (Loma 2:​14, 15) Ke oko foki loa ki tama‵liki, e iloa ne latou te ‵kese o faifaiga ‵lei mai faifaiga sē ‵lei me kafai e fai ne latou a mea ‵se, e se ‵lei olotou lagonaga. I te gasologa o taimi, e ga‵lue ‵tou loto lagona e uiga ki te mea tonu mo te mea ‵se mai mea e tauloto ne tatou mai ‵tou kāiga, taugasoa, faiakoga, fenua, lotu, mo tuu mo aganuu. Kafai e fai a ‵tou fakaikuga, e fakaasi mai ne ‵tou loto lagona me e mata, e fetaui ‵tou filifiliga mo te mea tonu mo te mea ‵se kolā ne tauloto ne tatou io me ikai.

A ‵tou kilokiloga ki te mea tonu mo te mea ‵se e mafai o fakamalosi ne ia tatou ke fakaasi atu te loto malamalama, te loto fakafetai, faifaiga ‵lei, mo te atafai ki nisi tino. E mafai foki o taofi ne ia tatou ke mo a ma fai a mea e fakalogo‵mae i ei a tino kolā e atafai tatou ki ei, io me fakamasiasi ei tatou kae fai ei ke ‵mā kae sē ‵lei ‵tou lagonaga.

E mata, e ‵lei faeloa ke takitaki tatou ne ‵tou lagonaga? E pelā me se tamataene, ne kausaki atu a Garrick ki se olaga telā ne fai aka a ia, penei, “E mafai o fai ne au so se mea e manako au ki ei.” Kae ne lavea aka ne ia me i te fai o te mea telā e tonu i tena kilokiloga ne seki maua mai i ei a ikuga ‵lei. Ne maua ne ia se olaga fakamasiasi telā ne fakamatala fakamuli mai ne ia e pelā me se “olaga e ‵fonu i amioga ma‵sei, fakaaoga ‵se o vailakau tapu, te konā, mo fakasauaga e uke.”

I tafa o ‵tou lagonaga, e masani o fai ‵tou fakaikuga e ‵tusa mo te kilokiloga a nisi tino. E mafai o fesoasoani mai te mea tenā ke maua ne tatou a mea aoga mai te lotou ata‵mai mo te poto. E mafai o āva mai a ‵tou kāiga, taugasoa mo tino o te fenua māfai e fai ne tatou a mea e mafau‵fau latou ki ei me e ‵tonu.

E mata, e ‵lei faeloa ke takitaki tatou ne lagonaga o nisi tino? E pelā me se talavou fafine, ne fai ne Priscila a mea kolā ne masani o fai ne ana taugasoa, kae aofia i faifaiga fakatauavaga mai mua o avaga. Kae ne iloa aka ne ia me ne seki maua ne ia te fiafia mai te fai o mea kolā e ‵kilo ki ei a nisi tino me e ‵tonu. Ana muna: “A te fai o mea kolā ne fai ne nisi tino ne fai ei ke se ‵lei oku lagonaga. Ne iku atu ki te fai ne au a mea va‵lea kae fakama‵taku.”

Kafai ko fai a ‵tou filifiliga e uiga ki te mea tonu mo te mea ‵se, e tāua eiloa a ‵tou lagonaga mo lagonaga o nisi tino. Kae ko mea konā e se takitaki faeloa ne latou a tatou ki te faiga o se fakaikuga ‵lei. Kāti i nisi taimi e mafai o fakalogo‵mae ne tatou a tatou eiloa mo nisi tino, ona ko te mea ne seki lavea ne tatou a ikuga o ‵tou filifiliga. (Faataoto 14:12) Kae kafai foki loa e mafau‵fau tatou mo nisi tino me e ‵tonu a mea e fai ne tatou, e mafai foki loa o fakamataku kae ‵tau o ‵fuli a manatu konā. Tela la, a faifaiga kolā ne ‵kilo muamua ki ei me ‵se, ko talia ne tino e tokouke, kae ko faifaiga kolā ne mafau‵fau muamua me ‵lei, ko fai pelā me ne mea ‵se.

E mata, e isi se takitakiga tai ‵lei atu e uiga ki te faiga o fakaikuga ki te mea tonu mo te mea ‵se? E mata, e isi ne tulafono i mea tau amioga e mafai o tau‵tali tatou ki ei, ko te mea ke mo a ma fakafanoanoa mai ki a tatou i aso mai mua?

E loto fakafetai tatou me isi se koga tonu e maua i ei a fakatakitakiga i mea tau amioga kolā e fakatuagagina faeloa mō tino i koga katoa. Ka faipati te suā mataupu ki te koga e mafai ei o maua ne tatou a te ‵toe takitakiga fakatuagagina ke fakavae ki ei ‵tou fakaikuga e uiga ki te mea tonu mo te mea ‵se.