E Atafai Atu te Atua ki a Koe
E MAUA i te Tusi Tapu a toe manatu fakatonutonu aoga me fakaasi mai i ei a manatu o te Atua. E sē se tusi e uiga ki te ola ‵lei o te mafaufau, kae e maua i ei a manatu aoga ki te auala ke fakafesagai atu ki tulaga mafatia, mafaufauga sē ‵lei, lagonaga logo‵mae, mo fakalavelave kolā e fakafi‵ta mai ki a tatou mo te ola ‵lei o ‵tou mafaufau.
E sili atu i ei, e fakamautinoa mai i te Tusi Tapu me i te ‵tou Mafuaga, ko Ieova te Atua, a e iloa ‵lei atu ne ia a ‵tou mafaufauga mo lagonaga i lō nisi tino. E fiafia kae toka a ia o fesoasoani mai ki so se fakalavelave e fe‵paki mo tatou. E pelā me se fakaakoakoga, mafaufau ki tusi fai‵tau kae fakamafanafana loto e lua konei:
“A Ieova e pili ki a latou kolā e loto mafatia; e fakaola ne ia a latou kolā ko fati‵fati olotou loto.”—SALAMO 34:18
“Au, Ieova tou Atua, e puke ki tou lima fakaatamai, ko te Atua telā e fai atu ki a koe, ‘Sa mataku. Au ka fesoasoani atu ki a koe.’”—ISAIA 41:13.
E fesoasoani mai pefea a Ieova ke fakafesagai atu tatou ki fakalavelave tau te ola ‵lei o te mafaufau? Ka lavea ne koe i mataupu e ‵soko mai, a auala e uke e fakaasi mai ei ne Ieova tena atafai tonu mai ki a tatou.
a Ieova ko te igoa totino o te Atua.—Salamo 83:18.
