MAI lalo i te Tulafono, ne talia ke ofo atu a lupe mo punua lupe e pelā me ne taulaga ki a Ieova. E taku tasi mai faeloa a te avā manu konei i tulafono e uiga ki taulaga kae e mafai o sui ne te manu e tasi a te suā manu. (Levi. 1:14; 12:8; 14:30) Kaia ne ‵lei ei te mea tenei? A te pogai e tasi me e tai faigata o maua i nisi taimi a lupe. Kaia?

A lupe ne manu faima‵laga kae e ‵nofo i kogā koga e uke o Isalaelu i masina o te ‵tau mafanafana. I a Oketopa, e faima‵laga atu latou ki saute ki fenua mafanafana, kae toe ‵foki atu ki Isalaelu māfai ko oko ki te ‵tau mafanafana. (Pese. 2:11, 12; Iele. 8:7) Ko tena uiga ne faigata ki tino Isalaelu i aso mua ke ofo atu a lupe e pelā me ne taulaga i te taimi o te ‵tau ‵moko.

I te suā feitu, a punua lupe e se masani o faima‵laga, kae e mafai fua o maua atu i Isalaelu i so se taimi o te tausaga. E se gata i ei, a punua lupe ne manu ‵lata. (Fakatusa ki te Ioane 2:14, 16.) E ‵tusa mo te tusi ko te Bible Plants and Animals, “a tamā fakai mo fakai ‵lasi i Palesitina e isi ne punua lupe fagai i ei. A fale takitasi e isi ne koga ‵nofo o punua lupe i ei io me se pūga i te ‵pui mo ‵nofo a manu eva konā.”—Fakatusa ki te Isaia 60:8.

Tela la, ne fakaasi mai i ei ne Ieova me i a ia e alofa kae loto malamalama o talia e pelā me ne taulaga a manu eva kolā e mafai o mauagofie ne tino Isalaelu i so se taimi i te tausaga.