1. Kaia e mafai o faigata ke iloa tonu a te mea e fakauiga ki ei se tino māfai ko fai atu me ko fakamagalo ne ia koe?

 “KO FAKAMAGALO NE AU KOE.” Ko oko loa te fakamalosi loto o pati konā, maise māfai e iloa ne koe me isi ne au pati ne fai io me ne fai ne koe se mea telā ne fakalogo‵mae atu ki se tino! Kae se a te uiga tonu o te tugapati “Ko fakamagalo ne au koe”? E mata, ko fai mai ne te tino telā ne fakalogo‵mae ne koe me ko ‵lei katoatoa te va fakataugasoa o koulua? Io me e fakauiga a ia me ko se toe manako a ia o faipati ki te fakalavelave tenā? E mafai eiloa o kese‵kese a mea e fakauiga ki ei se tino māfai ko fakamagalo ne ia te suā tino.

 2. Ne fakamatala mai pefea i te Tusi Tapu a te fakamagaloga a Ieova? (Onoono foki ki te fakamatalaga mai lalo.)

² E ‵kese ‵ki te auala e fakamagalo ne Ieova a tatou tino sē ‵lei katoatoa mo te auala e fakamagalo ne tatou a nisi tino. E tu ‵kese eiloa te fakamagaloga a Ieova. Ne fai atu te faisalamo e uiga ki a Ieova: “E maua i a koe te fakamagaloga tonu, ko te mea ke ofo a tino i a koe.” a (Sala. 130:4) E tonu, a te fakamagaloga a Ieova ko te “fakamagaloga tonu.” Ne fakaasi faka‵lei mai ne ia te uiga tonu o te fakamagalo. I nisi fuaiupu i Tusitusiga Epelu, ne fakamatala mai ne tino ne tusi ne latou te Tusi Tapu a te fakamagaloga a Ieova mai te fakaaogaga o se pati telā e se mafai o fakaaoga ke fakamatala ki ei a te fakamagaloga e fai ne tino.

 3. E ‵kese pefea te fakamagaloga a Ieova mo tatou? (Isaia 55:​6, 7)

³ Kafai ko fakamagalo ne Ieova se tino, ko tena uiga ko ‵solo  kea‵tea a te agasala a te tino tenā. Ko toe faka‵lei katoatoa i ei a te va fakataugasoa telā ne fakamasei. E loto fakafetai eiloa tatou me fakamagalo katoatoa ne Ieova a tatou kae fai faeloa a ia penā i taimi e uke.—Faitau te Isaia 55:​6, 7.

 4. E fesoasoani mai pefea a Ieova ki a tatou ke malamalama i te uiga tonu o te fakamagalo?

⁴ Kafai e ‵kese te fakamagaloga a Ieova mo tatou, e mafai la pefea ne tatou tino sē ‵lei katoatoa o malamalama i te uiga tonu o te mea tenā? E fesoasoani mai a Ieova e auala i te fakaaogaga o tugapati fakatusa ke fakamatala ki ei a tena fakamagaloga. Ka onoono tatou i te mataupu tenei ki nisi tugapati fakatusa konā. Ka fakaasi mai i mea konā a te auala ka ave kea‵tea ne Ieova a agasala kae i te taimi eiloa tenā, ka faka‵lei ne ia te va fakataugasoa telā ne fakamasei aka ona ko te agasala. I te taimi e onoono ei tatou ki tugapati fakatusa konei, ka gasolo aka eiloa o ‵poko a te ‵tou loto fakafetai ki te ‵tou Tamana alofa, telā e fakaasi mai ne ia i auala kese‵kese e uke a tena fakamagaloga.

E AVE KEA‵TEA NE IEOVA A AGASALA

 5. Ne a mea e ‵tupu māfai ko fakamagalo ne Ieova a ‵tou agasala?

⁵ I te Tusi Tapu, e faka‵pau sāle a agasala ki amoga ‵mafa. Ne fakamatala mai ne te tupu ko Tavita ana agasala totino penei: “Aku mea ‵se e ‵nofo i luga i toku ulu; e pelā me se amoga ‵mafa, ko tō ‵mafa katoa ki a au.” (Sala. 38:4) Kae e fakamagalo ne Ieova a agasala a tino fai mea ‵se kolā e sala‵mo tonu. (Sala. 25:18; 32:5) A te pati Epelu telā ne ‵fuli ki te “fakamagalo” i fuaiupu konei e fakauiga loa ki te “sau ki luga” io me “amo.” E mafai o mafau‵fau tatou ki a Ieova e pelā me se tagata malosi telā e sau aka ne ia i se auala fakatusa a te amoga o agasala mai ‵tou tuauma kae amo kea‵tea ne ia.

 6. E pefea te ‵mao e amo kea‵tea ei ne Ieova a ‵tou agasala?

⁶ A te suā tugapati fakatusa, e fakaasi mai ei a te ‵mao e amo kea‵tea ne Ieova ki ei a ‵tou agasala. E fai mai te Salamo 103:12: “E pelā mo te ‵mao o te saegala mai te togala, e penā loa te faka‵mao ne ia o tatou mai i ‵tou amioga solitulafono.” A te saegala ko te ‵toe mata ‵mao eiloa mai te togala. A mata e lua konei e se mafai eiloa o fetaui. I nisi tugapati, e ave ne Ieova a ‵tou agasala ke ‵mao kea‵tea eiloa mai i a tatou, ki te ‵mao telā e se mafai o fakaataata ne tatou i ‵tou mafaufau. Ko oko loa te gali o te fakamatalaga tenei e uiga ki tena fakamagaloga!

 7. E fakamatala mai pefea i te Tusi Tapu a mea e fai ne Ieova ki ‵tou agasala? (Mika 7:​18, 19)

⁷ E tiga loa e ave kea‵tea ne Ieova i se auala fakatusa a ‵tou agasala ke ‵mao ‵ki mai i a tatou, kae e mata koi masaua eiloa ne ia? Ikai. Ne tusi mai te tupu ko Hesekia e uiga ki a Ieova: “Ko oti ne ‵pei ne koe aku agasala katoa ki ou tua.” Io me pelā mo pati i te fakamatalaga mai lalo, “ave kea‵tea aku agasala katoa mai i ou mua.” (Isa. 38:​9, 17; fml.) E fakaasi mai i te tugapati fakatusa tenei me e puke ne Ieova a agasala a tino sala‵mo kae ‵pei ke ‵galo kea‵tea mo ana mata. A te fuaiupu tenei e mafai foki o ‵fuli penei: “Ne kilo atu koe [ki aku agasala] e pelā me seki ‵tupu eiloa.” Ne toe faka‵mafa mai i te Tusi Tapu a te manatu tenei i te suā tugapati fakatusa, telā ne tusi i te Mika 7:​18, 19. (Faitau.) I konā, ne faipati a Ieova e pelā me ‵pei ne ia a ‵tou agasala ki koga ‵poko o te tai. I aso mua, e se mafai o toe maua mai ne se tino sena mea telā ne ‵pei ki koga ‵poko o te tai.

 8. Ne a mea ko iloa nei ne tatou?

⁸ E auala i tugapati fakatusa konei, ko iloa ne tatou me kafai e fakamagalo ne Ieova tatou, ko fakaseai katoatoa eiloa ne ia a ‵tou agasala. E tonu, e pelā eiloa mo pati a Tavita, “e fia‵fia  eiloa a latou kolā ko oti ne fakamagalo olotou faifaiga solitulafono kae e pulou atu olotou agasala; e fiafia a te tagata telā ka se mafai eiloa o saga atu a Ieova ki ana agasala.” (Loma 4:​7, 8) Tenā eiloa te fakamagaloga tonu!

E ‵SOLO KEA‵TEA NE IEOVA A AGASALA

 9. Se a te tugapati fakatusa ne fakaaoga ne Ieova ke fakamatala mai ei me fakamagalo katoatoa ne ia ‵tou agasala?

⁹ E fakaaoga ne Ieova a nisi tugapati fakatusa ke fesoasoani mai ke ati aka te ‵tou loto fakafetai ki te auala ne fakaaoga ei te togiola ke ‵solo kea‵tea a agasala a tino loto sala‵mo. E fakamatala mai i se auala fakatusa a Ieova e pelā me ‵fulu kae faka‵ma kea‵tea ne ia a agasala konei. Ka iku atu i ei ki te ‵ma pakipaki o te tino agasala. (Sala. 51:7; Isa. 4:4; Iele. 33:8) Ne fakamatala mai eiloa ne Ieova a mea ka iku mai i te faifaiga tenei: “Faitalia me fai otou agasala e pelā me se laugatu kula, ka fai eiloa a mea konā ke ‵kena e pelā me se kiona; faitalia me kula e pelā me se laugatu kula malosi, ka fai eiloa a mea konā e pelā me ne vulu.” (Isa. 1:18) E faigata ‵ki eiloa ke ‵solo keatea se lailaiga lanu kula mai se laugatu. Kae e fakamautinoa mai ne Ieova i te tugapati fakatusa tenei, me e mafai o ‵fulu ke ‵ma pakipaki a ‵tou agasala telā ko se mafai ei o lavea atu.

10. Se a te suā tugapati fakatusa e fakaaoga ne Ieova ke fakatusa ki ei a tena kaimalie māfai ko fakamagalo ne ia a agasala?

¹⁰ E pelā mo te mea ne sae mai i te mataupu mai mua, a agasala e fakatusa foki ki “kaitalafu.” (Mata. 6:12; Luka 11:4) Tela la, i so se taimi e agasala tatou ki a Ieova, ko pelā loa me ko gasolo o lasi atu te ‵tou kaitalafu. E lasi ‵ki ‵tou kaitalafu i a ia! Kae kafai e fakamagalo ne Ieova a tatou, ko pelā loa me ko fakaseai ne ia te kaitalafu a tatou. E se manako a ia ke ‵tina atu te kaitalafu io me ko te agasala telā ko oti ne fakamagalo. Ko oko loa i te gali o te fakatusaga tenei me fakaata mai i ei a lagonaga fia‵fia e maua ne tatou māfai ko fakamagalo ne Ieova ‵tou agasala!

11. Se a te mea e fakauiga te Tusi Tapu ki ei i te faimaiga me i ‵tou agasala ko oti ne “‵solo kea‵tea”? (Galuega 3:19)

¹¹ E se fakaseai fua ne Ieova a ‵tou kaitalafu, io me ko agasala; e ‵solo kea‵tea ne ia. (Faitau te Galuega 3:19.) Kafai ko fakaseai se kaitalafu, kāti e fakaataata ne tatou se laina e ‵sele i luga i tau pepa kaitalafu. Kae koi mafai loa o lavea ne koe a napa mai lalo i te laina tenā. Kae ‵kese māfai e ‵solo kea‵tea se mea. Ke malamalama i te tugapati fakatusa tenei, ke masaua me i aso mua a vaegā vaitusi ne fakaaoga i ei e palutasi i ei a kaponi, pulukau mo vai. E mafai fua o fakaaoga ne se tino se omomi ke ‵solo ki ei a tusitusiga e tusi ki ei. Tela la, kafai ko “‵solo kea‵tea” se agasala, ko tena uiga ko galo katoatoa atu eiloa. A mea kolā ne ‵tau mai tusitusiga mua ko se mafai eiloa o lavea ki mata. Ko pelā eiloa me ne seki ai se agasala ne fai. Se fakamafanafanaga eiloa ke iloa atu me e se fakaseai fua ne Ieova a ‵tou agasala kae e ‵solo katoatoa kea‵tea ne ia!—Sala. 51:9.

12. Ne a mea e tauloto ne tatou i te tugapati fakatusa e uiga ki te kaumana matolu?

¹² E fakaaoga foki ne Ieova se tugapati fakatusa tai ‵pau ke fakamatala mai ei te auala e ‵solo kea‵tea ne ia a agasala. Ne folafola mai a ia: “Ka ‵solo kea‵tea ne au a amioga solitulafono a koe e pelā eiloa me se kaumana mo au agasala e pelā eiloa me se kaumana matolu.” (Isa. 44:22) Kafai e fakamagalo ne Ieova a agasala, ko pelā eiloa me fakaaoga ne ia se kaumana matolu ke ‵funa ki ei ‵tou amioga solitulafono ko te mea ke se toe mafai eiloa o lavea ki mata.

13. E pefea ‵tou lagonaga māfai ko fakamagalo ne Ieova a ‵tou agasala?

¹³ Ne a mea e tauloto ne tatou mai tugapati  fakatusa konā? Kafai ko fakamagalo ne Ieova a ‵tou agasala, ke mo a ma ‵nofo faeloa mo lagonaga sē ‵lei i ‵tou olaga kātoa, ona ko ‵tou agasala. E auala i te toto o Iesu Keliso, ko oti eiloa ne fakaseai katoatoa atu a ‵tou agasala. Ko pelā eiloa me seki ai se agasala ne fai. Tenei eiloa te fakamagaloga tonu mai i a Ieova māfai e sala‵mo eiloa tatou ki ‵tou agasala.

KO TOE TALIA NE IEOVA TATOU KE FAI MO ANA TAUGASOA

14. Kaia e mafai ei o tali‵tonu tatou ki te fakamagaloga a Ieova? (Onoono foki ki te ata.)

¹⁴ A te fakamagaloga tonu mai i a Ieova e tuku mai ei se avanoaga ke maua ne tatou se fesokotakiga ‵lei mo ia. E aoga foki ki a tatou ke mo a ma ‵nofo mo ‵tou lagonaga ma‵sei e uiga ki ‵tou agasala. E se ‵tau o ma‵taku tatou kae mafaufau me koi kaitaua mai eiloa te Atua ki a tatou kae salasala ki auala ke fakasala tatou. Ka se mafai eiloa o tupu se mea penā. Kaia e tali‵tonu ei tatou ki a Ieova māfai e fai mai me ko fakamagalo ne ia tatou? Ne fai mai ne te pelofeta ko Ielemia a pati a Ieova penei: “Ka fakamagalo ne au olotou mea ‵se, kae ka se toe masaua ne au olotou agasala.” (Iele. 31:34) Ne siki mai ne te apositolo ko Paulo a pati konā i ana pati penei: “Ka se toe masaua eiloa ne au olotou agasala.” (Epe. 8:12) Kae se a tonu te uiga o pati konā?

15. I te feitu fea ka se toe masaua ei ne Ieova a ‵tou agasala?

¹⁵ I te Tusi Tapu, a te pati “masaua” e se fakauiga faeloa ki se tino telā e masaua ne ia se mea io me mafaufau e uiga ki te mea tenā. Kae e mafai foki o aofia i ei se tino e gasue o fai se mea. Ne fakamolemole atu te pagota telā ne tautau i te pou fakasaua i tafa o Iesu, penei: “Iesu, masaua mai au māfai e oko koe ki tou Malo.” (Luka 23:​42, 43) Ne seki fakamolemole atu a ia ki a Iesu ke mafaufau mai ki a ia i te taimi tenā. E fakaasi mai i te tali a Iesu me ka galue a ia o fai se faiga ke toe fakatu aka te pagota tenei. Tela la, kafai ko fai mai a Ieova me ko se masaua ne ia ‵tou agasala, ko tena uiga ka se ‵teke mai a ia ki a tatou. Ka se fakasala  ne ia tatou i se taimi mai mua ona ko agasala kolā ko oti ne fakamagalo ne ia.

16. E fakamatala mai pefea i te Tusi Tapu a te saolotoga e maua mai te fakamagaloga tonu o ‵tou agasala?

¹⁶ E fakaaoga i te Tusi Tapu se suā tugapati fakatusa ke malamalama i te saolotoga e maua ne tatou māfai ko fakamagalo ne Ieova ‵tou agasala. Ona ko ‵tou tulaga agasala kae sē ‵lei katoatoa, ko pelā eiloa tatou me ne “pologa a te agasala.” Kae fakafetai ki te fakamagaloga a Ieova, ko fai tatou pelā me ne pologa kolā ko oti ne “fakasaoloto mai te agasala.” (Loma 6:​17, 18; Faka. 1:5) E tonu, a te fakamagaloga a Ieova e maua i ei ne tatou te fiafia e pelā eiloa mo te pologa telā ko fakasaoloto mai te nofo pologa.

17. E faka‵lei aka pefea tatou e auala i te fakamagaloga o ‵tou agasala? (Isaia 53:5)

¹⁷ Faitau te Isaia 53:5. A te tugapati fakatusa fakaoti ka sau‵tala tatou ki ei e fakatusa i ei tatou ki tino kolā e ‵poko i se masaki fakamataku. Ona ko te taulaga togiola ne fakatoka ne Ieova e auala i tena Tama, ko oti ne faka‵lei ne ia tatou i se auala fakatusa. (1 Pe. 2:24) E auala i te togiola ko mafai o maua ne tatou se fesokotakiga ‵lei katoatoa mo Ieova, telā ne fakamaseigina i te taimi ne agasala ei tatou. E pelā loa mo te fiafia malosi o se tino telā ko ‵lei tena masaki, e fia‵fia foki tatou māfai ko oti ne toe faka‵lei aka tatou i te feitu faka-te-agaga kae toe maua ne tatou te taliaga a Ieova e auala i tena fakamagaloga.

TE AOGA O TE FAKAMAGALOGA A IEOVA KI A TATOU

18. Ne a mea ne tauloto ne tatou mai tugapati fakatusa e uke i te Tusi Tapu kolā e faipati e uiga ki te fakamagaloga a Ieova? (Onoono foki ki te pokisi “Te Auala e Fakamagalo ne Ieova a Tatou.”)

¹⁸ Ne a mea ne tauloto ne tatou i te iloiloga o tugapati fakatusa i te Tusi Tapu e uiga ki te fakamagaloga a Ieova? Kafai ko fakamagalo ne Ieova tatou, ko fakamagalo katoatoa eiloa ne ia e pelā eiloa me seki ai se agasala ne tupu. Ko mafai i ei o maua ne tatou se fesokotakiga ‵lei mo te ‵tou Tamana i te lagi. Kae e iloa ne tatou me i te fakamagaloga a Ieova se meaalofa telā ne tuku mai ne ia ona ko tena alofa mo tena kaimalie, kae e se ona ko te mea se mea eiloa e ‵tau o maua ne tatou.—Loma 3:24.

19. (a) Se a te mea e ‵tau o loto fakafetai tatou ki ei? (Loma 4:8) (e) Ne a mea ka sau‵tala tatou ki ei i te suā mataupu?

¹⁹ Faitau te Loma 4:8. E ‵tau eiloa mo tatou taki tokotasi o loto fakafetai i a Ieova ko te Atua o te “fakamagaloga tonu”! (Sala. 130:4) Kae e isi se mea tāua e fakalagolago ki ei te ‵tou fakamagaloga. Ne fakamatala mai a Iesu: “Kafai e se fakamagalo ne koutou a agasala a tino ka se fakamagalo foki otou agasala ne te otou Tamana.” (Mata. 6:​14, 15) Tela la, e manino ‵lei me se mea tāua eiloa mō tatou ke fakaakoako ki a Ieova kae fakamagalo a nisi tino. Kae e fai pefea ne tatou a te mea tenā? Ka fakamatala mai i te suā mataupu a mea e aofia i ei.