E mata, e atafai tonu mai a Ieova ki a tatou, io me e se fia saga mai a ia ki fakalavelave o tino i te lalolagi tenei? E fakamafanafana mai ki ‵tou loto a te tali a te Tusi Tapu ki te fesili tenā. E atafai tonu mai te Atua ki te kaukāiga o tino, kae manako a ia ke fia‵fia tatou i ‵tou olaga. E talia ne ia a tino i aso katoa​—ke oko ki tino kolā e se loto fakafetai ki te Atua​—ke maua ne latou a mea aoga mai te lasi o tena aga‵lei. Ke mafaufau ki pati a te apositolo ko Paulo.​—Faitau te Galuega 14:16, 17.

I tena faipatiga ki tino kolā e se tapuaki ki te Atua i te fa‵kai o Lusa, ne fai atu a Paulo: “Ne talia ne ia [te Atua] i kautama ko ‵teka ke fai ne fenua katoa a mea e ma‵nako latou ki ei, kae ne tuku mai ne ia se molimau e auala i mea ‵lei ne fai ne ia, mai te tuku atu ki a koutou a vaiua mai te lagi mo tau o aso aoga, e faka‵fonu ei otou loto ki meakai mo te fiafia.” Ne a uiga o pati konā ki tino kolā ne fakalogo‵logo ki a Paulo?

Ne mafai o malamalama gofie a tino i Lusa i te ‵tonu o pati a Paulo. A latou ne vaega o tino ‵toki lakau kae ola i se kogā koga e laukele ola kae siusiu. Kae pelā mo te fakamasauaga a Paulo ki a latou, a te Atua ko te Mafuaga o vaiua mo tau o aso e ‵fua ei a lakau. Tela la, i taimi katoa e tau ei ne latou a fuataga e uke kae fia‵fia i se ‵kaiga gali, ko maua eiloa ne latou a mea aoga mai te aga‵lei o te Atua.

E akoako mai ne pati a Paulo ki tino Lusa ne akoakoga tāua ki a tatou e uiga ki a Ieova te Atua.

E tuku mai ne Ieova a te saolotoga ki a tatou. Onoono la me ne talia ne Ieova ko tino mai Fenua Fakaa‵tea katoa “ke olo i olotou auala eiloa.” E fai mai se fakamatalaga fakaopoopo mō tino ‵fuli Tusi Tapu i te tugāpati e fakauiga loa ki te “olo ki te mea telā e fia‵fia latou ki ei” io me “ke fai te mea telā ne mafaufau latou me e ‵lei.” E se faimālō ne Ieova se tino ke tapuaki atu ki a ia. Ko oti ne tuku mai ne ia ki a tatou a te saolotoga​—ke filifili ki te olaga e ola tatou i ei.​—Teutelonome 30:19.

E manako a Ieova ke iloa ne tatou a ia. Ne seki fai ne ia ke “seai ne fakamaoniga ki a ia eiloa,” ko te fakamatalaga a Paulo. E fai mai te fakamatalaga fakaopoopo telā ne taku muamua mai i te fakamunaga tenei e mafai o fakauiga me “ko oti ne fakaasi manino ne ia ki tino me ko ia se vaegā Atua pefea.” E molimau tonu a mea a te Atua ne faite ki ana “uiga sē lavea,” e aofia i ei a tena aga‵lei, poto, malosi, mo te alofa. (Loma 1:20) Ko oti ne fakaasi mai ne Ieova a mea e uke atu e uiga ki a ia i te Tusi Tapu. (2 Timoteo 3:16, 17) E mata, e se fakaasi manino mai i ei me manako a ia ke iloa ne tatou a ia?

E manako a Ieova ke fia‵fia tatou. E faka‵fonu ne ia ‵tou “loto ki meakai mo te fiafia,” ko pati a Paulo. Ke oko ki te tino agasala telā e se talia ne ia a Ieova, e kai ki meakai ke malie ei tena loto kae maua ne ia se fiafia i ei. E ui i ei, e manako te Atua ke maua ne tatou a te fiafia tonu kae tumau. E mafai fua o maua a te mea tenā māfai e tauloto tatou e uiga ki a ia kae fakagalue ne tatou i ‵tou olaga.​—Salamo 144:15; Mataio 5:3.

E maua ne tatou katoa a mea aoga mai te aga‵lei o Ieova i aso katoa. Kaia e se tauloto ei koe ki mea e uke atu ki te auala e mafai ei o fakaasi atu ne koe tou loto fakafetai ki te Atua telā e faka‵fonu ne ia tou loto “ki meakai mo te fiafia”?