I ASO mua, ne sae mai se ulutala fakaofoofogia i The Chosun Ilbo, se nusipepa Kolea. E fesili mai penei i ei: “A ‘Shim Cheong se Tino Gali,’ Telā e Seai Eiloa Sena Mea e Iloa e Uiga ki a Iesu—E Mata, ne Fano a Ia ki te Afi i Seoli?”

Ne fakaitaita atu te ulutala me i a Shim Cheong se tamāfine uiga ‵gali i tala ‵kai a te kau Kolea telā ne tuku atu tena ola ke fesoasoani ki tena tamana ‵kivi. I te fia o tausaga, ne tavae atu faeloa ki tou fafine. A te ‵tonuga loa, i Kolea, ne fai a “Shim Cheong” mo fai se fakaakoakoga ‵lei o se tama fafine telā e tuku katoatoa atu.

A te manatu me ka fakasala se vaegā tino penā i te ‵afi i seoli ona ko te mea ne seki fai a ia mo fai se Kelisiano papatiso, ne foliga atu ki tino e tokouke e pelā me se faifaiga sē ‵lei, kae fakaitaita atu. I tafa o mea katoa, ko leva eiloa ne tupu te tala tenei a koi tuai o fakaoko atu te fekau e uiga ki te Keliso ki te fa‵kai o tou fafine.

E aofia i te mataupu se fakasautalaga o se faifeau. Ne fesili atu ki a ia me ko latou kolā e ‵mate e aunoa mo te avanoaga ke tauloto e uiga ki a Iesu e ‵tau o fakasala ki te afi i seoli. Se a te tali? “E se iloa ne matou. E tuku taumate fua ne matou me kāti e isi eiloa se auala ne Fakatoka ne te Atua [mō vaegā tino penā].”

E fai mai The New Catholic Encyclopedia: “E manakogina te papatisoga mō te fakaolataga. E pelā mo Keliso, seiloga ke toe fanau mai i te vai mo te Agaga Tapu, e se mafai ne se tino o ulu atu ki te Malo o te Atua. (Ioane 3.5).” Ona ko te mea tenei, e tali‵tonu a nisi tino me ka ‵pei atu a tino kolā ne ‵mate kae seki papatiso ki te afi i seoli io me ka fakapuapuaga i nisi auala māfai ko ‵mate.

Kae ne ‵kilo atu a nisi tino e tokouke ki te talitonuga tenā e pelā me se mea matagā. E lau i miliona o tino kolā ko ‵mate kae e se iloa ne latou a mea i te Tusi Tapu. E mata, e ‵tau o fakapuapuaga latou ki te se-gata-mai? Ne a muna a te Tusi Tapu e uiga ki te mataupu tenei?

E fakaasi manino mai i te Tusi Tapu me e se fakaseaoga ne te Atua a tino kolā e ola e aunoa mo te iloa atu o mea e manako a ia ke fai ne latou. E fakatalitonu mai penei te Galuega 17:30: “E seki saga atu te Atua ki te taimi koi va‵lea ei a tino.” Se a la te fakamoemoega e tuku mai i te Tusi Tapu mō tino kolā ne ‵mate e aunoa mo se avanoaga ke tauloto e uiga ki te Atua?

E mafai o maua te tali i pati a Iesu ki se tagata solitulafono e tokotasi telā ne mate i ana tafa. Ne fai atu te tagata ki a Iesu: “Masaua mai au māfai e oko koe ki tou Malo.” Se a te tali a Iesu? “Au e fai ‵tonu atu ki a koe i te aso nei, ka ‵nofo fakatasi eiloa tāua i te Palataiso.”—Luka 23:39-43.

E mata, ne folafola atu a Iesu me ka fanatu te tagata ki te lagi? Ikai. Ne seki “toe fanau” mai te tagata i te vai mo te agaga, ko mea kolā e manakogina ke ulu atu ki te Malo o te lagi. (Ioane 3:3-6) I lō te fai penā, ne folafola atu a Iesu me ka toetu mai a te tagata solitulafono tenā “i te Palataiso.” Ona ko te mea se tino Iutaia, ne masani ‵lei te tagata mo te lalolagi Palataiso—te fatoaga o Etena—telā ne fakamatala mai i te tusi muamua i te Tusi Tapu. (Kenese 2:8) Ne tuku atu ne te folafolaga a Iesu a te fakamoemoega mautinoa me ka toe fakatu mai a ia ki te Palataiso māfai ko toe fakafoki mai ki te lalolagi.

A te ‵tonuga loa, e folafola mai te Tusi Tapu me “ka toe‵tu mai a tino amio‵tonu mo tino amio sē ‵tonu.” (Galuega 24:15) A “tino amio sē ‵tonu” ko latou kolā ne seki fakafetaui aka olotou olaga ki tulaga amio‵tonu o te Atua ona ko te mea ne seki iloa ne latou te loto o te Atua. Ka toe fakatu mai ne Iesu a te tagata solitulafono kae amio sē tonu tenā ne faipati a ia ki ei, e pelā foki mo te fia miliona, kāti se fia piliona, o nisi tino kolā ne ‵mate eiloa mo te va‵lea. Kae i te lalolagi Palataiso, ka akoako latou ki mea e manakogina ne te Atua, kae ka maua ne latou te avanoaga ke fakamaoni atu me e a‵lofa latou ki te Atua mai te faka‵logo ki ana fakatonuga.

I te taimi e toe‵tu mai ei a tino amio sē ‵tonu, e mata, ka fakamasino latou ki mea ne fai muamua ne latou? Ikai. E fai mai te Loma 6:7: “Me ko te tino telā ko oti ne mate ko fakasaoloto mai i ana agasala.” Ka ‵togi atu ne tino amio sē ‵tonu olotou agasala i te taimi e ‵mate ei latou. Tela la, ka fakamasino latou ki mea e fai ne latou mai tua o te lotou toetuga, e se ko mea ne fai ne latou i te taimi koi va‵lea ei latou mai mua o te lotou ‵mate. Ka maua pefea ne latou a mea aoga mai i ei?

Mai tua o te toetuga, ka maua ne tino amio sē ‵tonu a te avanoaga ke tauloto ki tulafono a te Atua, kolā ka fakaasi mai i peluga tusi fakatusa kolā ka ‵tala mai. Ka fakamasino ei latou “e ‵tusa eiloa mo olotou amioga,” me e faka‵logo latou io me ikai ki tulafono a te Atua. (Fakaasiga 20:12, 13) Mō te tokoukega o tino amio sē ‵tonu, ka se fai te taimi tenei mo fai se avanoaga i te lua, kae ko te lotou avanoaga muamua eiloa ke maua ne latou a te ola se-gata-mai i te lalolagi e auala i te tauloto mo te faiga o te loto o te Atua.

Ko oti eiloa ne fesoasoani atu a te akoakoga tenei i te Tusi Tapu ki tino e tokouke ke toe fakatuanaki latou ki te Atua. A Yeong Sug se tokotasi o latou. Ne puti aka a ia e pelā me se tino malosi i te Lotu Katolika. Ne fai a tino o tena kāiga mo fai ne faifeau i ei. Ne mafaufau a ia ke fai mo fai se sina, telā ne kau atu ei tou fafine ki te akoga mō sina. Fakamuli ifo, ne tiakina ne ia te koga tenā me ne seki fiafia a ia ki mea ne lavea ne ia i konā. E sili atu i ei, ne seki mafai o talia ne tou fafine a te akoakoga o te afi i seoli ona ko tena mafaufau me e sē se faifaiga alofa a te fakapuapuaga o tino ki te afi i seoli.

Fakamuli ifo, ne fakaasi atu ne se Molimau a Ieova e tokotasi ki a Yeong Sug a pati konei mai te Tusi Tapu: “E iloa ne tino ola i a latou e ‵mate, ka ko tino ‵mate e seai se mea a latou e iloa. E seai aka foki eiloa se mea ‵lei e maua ne latou me ko se toe manatua latou.” (Failauga 9:5) Ne fesoasoani atu a te Molimau ki tou fafine ke iloa ne ia me i ana tupuga e se fakapuapuagatia ki te afi i seoli. I lō te fai penā, e ‵nau fua olotou ‵moe i te mate, kae faka‵tali ki te toe‵tuga.

A te iloa atu me e tokouke a tino e seki lagona aka eiloa ne latou a te munatonu mai te Tusi Tapu, ne fakalogo eiloa a Yeong Sug ki pati a Iesu i te Mataio 24:14: “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga.” Nei la, ko kau atu a ia ki te talaiatuga o te tala ‵lei kae fakaasi atu ki nisi tino tena fakamoemoega gali telā e fakavae ki te Tusi Tapu.

E fai mai te Tusi Tapu: “Te Atua e se fakailoga tino, kae ko te tino mai so se fenua telā e mataku ki a ia kae fai mea tonu e talia eiloa ne ia.” (Galuega 10:34, 35) Tenei eiloa te fakamasinoga ‵lei katoatoa e mafai ne tatou katoa o fakamoe‵moe ke fai ne te Atua, telā e fiafia “ki te amiotonu mo te fai mea tonu.”—Salamo 33:5.