Ona ko te mea e fai a Ieova te Atua * mo fai te Mafuaga o mea katoa kae malosi katoatoa foki, e mafai o mafau‵fau a tino e tokouke, me e ‵tau o ‵losi atu ki a ia e uiga ki mea katoa kolā e ‵tupu i te lalolagi, e aofia i ei a mea katoa kolā e ma‵sei. Kae mafaufau la ki muna i te Tusi Tapu e uiga ki te Atua tonu:

• “A te Aliki [Ieova] e amiotonu i ana mea katoa e fai.”—Salamo 145:17.

• “E ‵tonu kae amiotonu i ana auala katoa; a te otou Atua e fakamaoni kae amiotonu; e fai ne ia te mea tonu kae nofogamalie.”—Teutelonome 32:4.

• “E lasi ‵ki te alofa atafai mo te alofa fakamagalo o Ieova.”—Iakopo 5:11.

E se māfua mai i te Atua a mea ma‵sei kolā e ‵tupu. Kae e mata, e fakamalosi atu a ia ki nisi tino ke fai ne latou a mea ma‵sei? Ikai, e se fai eiloa penā. “Kafai e tofotofogina se tino,” e fai mai te Tusi Tapu, “ke mo a ma fai mai a ia penei: ‘Au ko tofotofo ne te Atua.’” Kaia? “Me e se mafai o tofotofogina te Atua ki mea ma‵sei io me e tofotofo ne ia se tino.” (Iakopo 1:13) E se tofotofo ne te Atua so se tino mai te fakamalosi atu ki ei ke fai a amioga ma‵sei. E se mafua mai i te Atua a mea ma‵sei kae e se fakamalosi foki ne ia latou ke fai a mea ma‵sei. Ko oi io me se a foki te mea e ‵tau o ‵losi atu ki ei mō mea ma‵sei konei e ‵tupu?

Ke iloa atu a te pogai e tasi e logo‵mae ei a tino, e fai mai te Tusi Tapu: “A te malaia e maua ne tino katoa.” (Failauga 9:11) Kafai e ‵tupu a mea kolā e seki fakamoemoegina, faitalia me e pokotia i ei se tino io me ikai, e faka‵na eiloa a te lasi o te fakalavelave ki te koga e nofo atu ei a ia mo te taimi ne tupu ei. Toeitiiti i se 2,000 tausaga ko ‵teka, ne faipati mai a Iesu Keliso ki se fakalavelave telā ne aofia i ei a tino e toko 18, kolā ne ‵mate i te taimi ne siga atu ki luga i a latou a te taoa. (Luka 13:1-5) Ne seki ‵mate latou ona ko te auala ne ola ei latou; ne ‵nofo atu fua latou mai lalo i te taoa i te taimi ne siga ifo ei. I aso nei, ne poko se mafuie malosi ‵ki i Haiti i a Ianuali 2010; ne fai mai te malo o Haiti me e toko 300,000 a tino ne ‵mate i ei. Ne ‵mate atu eiloa a tino konā faitalia me ko oi latou. E mafai foki eiloa o oko atu a masaki ki so se tino i so se taimi.

Kāti e fesili mai a nisi tino: ‘E mata, e se mafai ne te Atua o taofi aka a vaegā fakalavelave tamate tino penā? E a, e se mafai o puipui ne ia a tino ‵lei mai fakalavelave faiga‵ta?’ A te saga mai o te Atua i vaegā mea penā, e fakauiga i ei me e iloa ne ia me ka ‵tupu a mea ma‵sei. E tiga eiloa e mafai o iloa ne te Atua a mea ka ‵tupu i aso mai mua, e ‵tau o mafau‵fau tatou ki te fesili tenei: E mata, e filifili aka ne te Atua ke fakaaoga tena ‵mana sē fakanafagina ke iloa ne ia a mea penā?—Isaia 42:9.

E fai mai te Tusi Tapu: “A te motou Atua e nofo i te lagi; e pule eiloa a ia i mea e fai ne ia.” (Salamo 115:3) E fai eiloa ne Ieova a te mea telā e iloa ne ia e ‵tau o fai—e se ko mea katoa e mafai ne ia o fai. E fakasino atu foki te mea tenā ki mea kolā e fakaiku aka ke iloa  ne ia. E pelā mo te taimi ne kamata ei o lauiloa a amioga ma‵sei i te fa‵kai mua o Sotoma mo Komolo, ne fai atu te Atua ki a Apelaamo: “E ‵tau mo au o fanaifo o onoono faka‵lei me e tonu a molimau konā ne lagona ne au me ikai.” (Kenese 18:20, 21) Ne filifili a Ieova mō se taimi, ke se iloa ne ia a te uke o mea ma‵sei e fai i fa‵kai konā. E penā foki loa, e mafai foki o filifili ne Ieova ke se iloa ne ia a mea katoa. (Kenese 22:12) E se fakaasi lele mai eiloa i te mea tenei me e se ‵lei katoatoa io me e vāivāi fua a ia. Ona ko te mea e ‘‵tonu i ana auala katoa,’ e paleni ‵lei a te Atua i te fakaaogaga o tena atamai ke iloa a mea ka ‵tupu i aso mai mua ki tena fuafuaga; e se faimālō lele eiloa ne ia a tino ke tau‵tali atu ki se auala mautinoa. * (Teutelonome 32:4) Se a la te mea e mafai o fakaiku aka ne tatou? E faigofie fua: E filifili faka‵lei mo te poto ne te Atua ke fakaaoga tena atamai ko te iloa ne ia a mea ka ‵tupu i aso mai mua.

E ‵tau o ‵losi atu foki ki tino mō mea ma‵sei. Onoono la ki te fakamatalaga i te Tusi Tapu ki faifaiga kolā e mafai o iku atu ki amioga fakalogo‵mae. “Kae e tofotofogina a tino taki tokotasi mai te saga atu ki takolekolega o ana manakoga totino. Tela la, kafai ko faitama te manakoga, ko fanau mai i ei te agasala, kae kafai ko oti ne fakataunu te agasala, ko oko mai ei te mate.” (Iakopo 1:14, 15) Kafai ko fakataunu ne tino olotou manakoga sē ‵lei io me e tosina atu ki mea ma‵sei ona ko te tulaga sē ‵lei katoatoa, e mafai o logo‵mae latou i ikuga ma‵sei. (Loma 7:21-23) E pelā mo mea e fakaasi mai i tala fakasolopito, ko oti eiloa ne fai ne tino a faifaiga matagā kae ne māfua mai i ei a logo‵maega e uke. E sili atu i ei, e mafai o fakamalosi atu a tino amio ma‵sei ki nisi tino ke amio ma‵sei foki, telā e fakatumau aka ei a mea ma‵sei.—Faataoto 1:10-16.

E mata, e ‵tau o saga mai a te Atua kae taofi aka a tino mai te faiga o mea ma‵sei? Mafaufau ki te auala ne faite ei a tino. E fai mai te Tusi Tapu me ne faite ne te Atua a te tagata ki tena fakatusa, ke pelā mo te Atua. Tela la, e mafai ne tino o fakaasi atu a uiga o te Atua. (Kenese 1:26) Ne tuku atu ki tino a te meaalofa ko te saolotoga ke fai a filifiliga kae e mafai o filifili latou ke a‵lofa kae fakamaoni ki te Atua mai te faiga o mea kolā e ‵lei i tena kilokiloga. (Teutelonome 30:19, 20) Kafai e faimālō ne te Atua a tino ke tau‵tali atu ki se auala mautinoa, e a, ka se fakaseaoga ne ia a te meaalofa ko te saolotoga ke fai a filifiliga? E mafai ei o fakamalalo ifo a tino ke fai pelā me ne masini, kolā e fai fua a mea ko oti ne fakapolokalame latou ke fai! E mafai foki eiloa o tonu i ei a te talitonuga me ko oti eiloa ne fakatoka a mea kolā e ‵tau o ‵tupu i ‵tou olaga, telā e pule mai eiloa ki mea e fai ne tatou mo mea katoa kolā e ‵tupu ki a tatou. Ko oko eiloa i te fia‵fia o tatou me e faka‵malugina ne te Atua a tatou mai te taliaga ke filifili eiloa tatou ki te vaegā olaga e ma‵nako tatou ki ei! E se fakauiga i ei, me ka tumau eiloa i te logo‵mae o tino ki te se-gata-mai ona ko mea ‵se mo filifiliga ma‵sei e fai ne latou.

Kafai e ‵sili atu ne koe ki se tino mai te Lotu Hinitu io me ko te Lotu Puta a te fesili i te ‵kava o te mekesini, e mafai eiloa o lagona ne koe te tali tenei: “E ‵tupu a mea ma‵sei ki tino ‵lei ona ko te akoakoga o te Karma. E tau ne latou a fuataga o olotou mea ne fai i olotou olaga mua.” *

E ‵tusa mo te akoakoga o te Karma, e fesoasoani mai ke iloa atu a muna i te Tusi Tapu e uiga ki te mate. I te fatoaga o Etena, te koga ne māfua mai i ei a tino, ne fai atu te Māfuaga ki te tagata muamua, ko Atamu: “Kae tapu koe e kai ki fuaga o te lakau tela e fai ne ia te tino ke iloa te lei mo te masei. E se tau eiloa mo koe o kai ki fuaga o te lakau tena, me kafai e kai koe ki ei, a koe e mate eiloa i te taimi tena.” (Kenese 2:16, 17) Moi ne seki agasala a Atamu mai te sē fakalogo ki te Atua, penei ne mafai eiloa o ola a ia ki te se-gata-mai. Ne oko mai eiloa te mate e pelā me se fakasalaga mō te sē fakalogo ki te fakatonuga a te Atua. Tela la, i te taimi ne fa‵nau mai ei a tama‵liki, ne “oko atu ki tino katoa te mate.” (Loma 5:12) Tela la, e mafai o fai atu me “i te taui o te agasala ko te mate.” (Loma 6:23) E fakamatala mai foki te Tusi Tapu: “Kafai e mate se tino, ka fakasaoloto a ia mai te malosi o te agasala.” (Loma 6:7) I nisi tugapati, e se ‵togi atu faeloa ne tino olotou agasala māfai ko oti ne ‵mate atu latou.

E lau i miliona o tino i aso nei e fakamatala mai ne latou me i te fakalavelave o logo‵maega o tino e aofia eiloa i ei a te Karma. E masani o talia ne te tino talitonu penā ana logo‵maega e penā foki mo nisi tino e aunoa mo te mafaufau ‵mafa ki ei. Kae e tumau eiloa te manatu tonu me i te akoakoga tenei e se tuku lele mai eiloa i ei se fakamoemoega ke fakagata a mea ma‵sei. E fai pelā me i te fakatapūga fua e tasi e tuku atu ki tino ko te saolotoga mai te tamilosaga o te toe fanau mai e auala i se uiga io me se poto fakapito telā e taliagina. E tonu, e ‵kese ‵mao eiloa a manatu konei mai mea kolā e fai mai i te Tusi Tapu. *

A te pogai fakavae o amioga ma‵sei, e se ko te tino. A Satani te Tiapolo, se agelu fakamaoni muamua a te Atua, “ne seki tumau i te munatonu” kae ne aumai ne ia te agasala ki te lalolagi. (Ioane 8:44) Ne kamata ne ia a te ‵tekeatuga i te fatoaga o Etena. (Kenese 3:1-5) Ne taku ne Iesu Keliso a ia ki “te tino masei” mo te “pule o te lalolagi nei.” (Mataio 6:13; Ioane 14:30) E tau‵tali atu a te tokoukega o tino i a Satani mai te faka‵logo ki ana fakamalosiga ke fakaseaoga atu a auala ‵lei o Ieova. (1 Ioane 2:15, 16) E fai mai te 1 Ioane 5:19: “Te lalolagi kātoa ko nofo mai lalo i te pule a te tino masei.” E isi foki ne nisi tino faka-te-agaga kolā ne ‵fuli atu ki te masei kae ‵kau atu ki a Satani. E fai mai ne te Tusi Tapu me i a Satani mo ana temoni e “takitaki ‵se ne [latou] te lalolagi nofoaki kātoa,” telā e fakamāfua aka ei a te ‘malaia i te lalolagi.’ (Fakaasiga 12:9, 12) Tela la, a te pogai fakavae o mea ma‵sei ko Satani te Tiapolo.

E manino ‵lei, me e se ‵tau o ‵losi atu ki te Atua mō mea ma‵sei kolā e ‵tupu ki tino; e se fai foki ne ia latou ke logo‵mae. E ‵kese mai i ei, ko oti ne folafola mai ne ia ke fakagata a mea ma‵sei e pelā mo te mea ka fakaasi mai i te mataupu telā e ‵soko mai.