Ke fakaataata se tamana e fai‵pati mo tena tamaliki tagata ko fitu ona tausaga. E fai atu a ia, “I te kamataga loa, ne faite ne te Atua a te lalolagi mo mea katoa i ei, ne faite ne ia te la, te masina, mo fētu.” Ne mafaufau te tamaliki tagata ki mea konā kae toe fesili atu, “Papa, ko oi ne faite ne ia te Atua?”

E tali atu te tamana, “E seai se tino ne faite ne ia te Atua. “Ko leva loa ne ola a Ia.” E mafai o lotomalie te tamaliki ki te fakamatalaga tenā mō te taimi nei. Kae i te taimi ko gasolo a ia o matua ko kamata o fakalavelave atu te fesili tenā ki a ia. E mafai o faigata ki a ia ke fakaiku aka māfai ko seai se kamataga o se tino. Kae kaia te lagi e isi foki sena kamataga. E mafai o mafaufau a ia, ‘Kae ne māfua mai fea a te Atua?’

E tali mai pefea te Tusi Tapu? E pelā mo te tali a te tamana i te kamataga, e tenā eiloa te tali mautinoa. Ne tusi mai a Mose: “Te Aliki, . . . Ka koi tuai o faite ne koe a mauga, koi tuai foki o faite ne koe te lalolagi, a koe ko te Atua mai mua loa, kae ka fai loa koe mo Atua ki te se gata mai.” (Salamo 90:1, 2) E fai mai foki te pelofeta ko Isaia: “E a, e se iloa ne koe? E seki lagona ne koe? A te Aliki ko te Atua ki te se gata mai, ne faite ne ia a te lalolagi katoa”! (Isaia 40:28) E penā foki loa te fakasino atu o te tusi o Iuta ki te Atua me e ola eiloa “ki te se gata mai.”—Iuta 25.

E fakamatala mai foki ne te apositolo ko Paulo, a te Atua e pelā me ko “te Tupu o te se gata mai.” (1 Timoteo 1:17) Faitalia me pefea te leva o te ‵tou kilo ki tua ki aso mua, ko leva loa ne ola te Atua. Kae ka tumau eiloa a ia i te ola i aso mai mua. (Fakaasiga 1:8) Tela la, a tena ola ki te se-gata-mai se vaega tāua o te Atua Malosi Katoatoa.

Kaia e faigata ei ke malamalama i te manatu tenei? A te toetoe o te olaga o tatou e fakaasi mai i ei te ‵kese o tatou mai i a Ieova. A te Atua e seai sena gataga, a te aso e tasi e ‵pau fua mo te afe tausaga. (2 Petelu 3:8) E pelā mo se fakaakoakoga: E mata e mafai ne se lō telā e ola mo aso e 50, o iloa a te leva o ‵tou olaga mai te 70 ki te 80 tausaga? Ailoga loa! Kae e fakamatala mai ne te Tusi Tapu me e ‵pau eiloa tatou mo lō konā māfai e fakatusa ki te ‵tou Mafuaga Sili. E penā foki te fo‵liki o ‵tou mafaufauga māfai e faka‵tusa ki ana mafaufauga. (Isaia 40:22; 55:8, 9) Tela la, e sē se mea fakapoi māfai e se malamalama katoatoa a tino i nisi mea e uiga ki a Ieova.

Faitalia me faigata ke malamalama tatou i mafaufauga o te Atua telā e seai sena gataga, kae e lavea loa ne tatou a te ‵tonu o te manatu tenā. Kafai e isi se tino ne faite ne ia te Atua, e fai eiloa te tino tenā e pelā me ko te Mafuaga. Kae e fakaasi mai ne te Tusi Tapu, me i a Ieova ko te tino telā ne ‘faite ne ia a mea katoa.’ (Fakaasiga 4:11) E se gata i ei, e iloa ne tatou me e seki ai eiloa se lagi i te kamataga. (Kenese 1:1, 2) Ne māfua mai pefea? E ‵tau o ola muamua tena Mafuaga. Ne ola muamua foki a ia kae koi tuai o faite ne ia a nisi tino ‵poto, e pelā mo tena Tama fagasele e tokotasi mo agelu. (Iopu 38:4, 7; Kolose 1:15) E manino ‵lei i ei, me ko leva loa ne ola tokotasi a Ia. Ne seki faite te Atua; e seai se mea ne ola muamua ke faite ei a Ia.

E fakamaoni mai ne te ‵tou ola mo te iunivesi kātoa me i te Atua e seai sena gataga. E ‵tau o ola faeloa a te Tino telā ne faite ne ia te iunivesi, te Tino foki ne fai ne ia a tulafono ki te gasuesuega o te iunivesi. Ko ia fua e mafai o tuku mai te manava o te ola ki mea katoa.—Iopu 33:4.