E mautinoa eiloa me ka tumau a tino i te gasolo atu ki mua i poto fakasaienisi. Kae e mata, ka mafai eiloa ne latou o fakatu aka se olaga telā e fakatau atafai ‵tonu a tino i ei? Ikai. A te lalolagi i ‵tou aso nei ko malosi eiloa i ei a te kaimanako mo te kaiu. Kae ko oti eiloa ne fakatoka ne te Atua se olaga tai ‵lei atu mō te kāiga o tino.—Faitau te 2 Petelu 3:13.

E fakamatala mai i te Muna a te Atua se olaga i te lalolagi kātoa telā ka fakatau a‵lofa i ei a tino. Ka ola a tino i se olaga tokagamalie, kae ka seai se tino ka fakapakia atu ki a latou.—Faitau te Mika 4:3, 4.

Ne faite muamua eiloa te tagata ne te Atua e aunoa mo so se manakoga kaimanako. Kae ona ko tena filifiliga ke se fakalogo ki te Atua, ne galo atu i te tino muamua a te ola ‵lei katoatoa. Ne maua ei ne tatou mai i a ia te uiga kaimanako. Kae ka fakaaoga eiloa ne te Atua a Iesu ke toe mafai o maua ne tino a te ola ‵lei katoatoa.—Faitau te Loma 7:21, 24, 25.

E ‵tusa mo te loto o te Atua, ne mate a Iesu e pelā me se taulaga kae ne fakaseai atu i ei a te ikuga o te sē fakalogo o te tagata muamua. (Loma 5:19) Tela la, ne mafai o toe maua se olaga gali i aso mai mua, e auala i a Iesu, telā ka fakasaoloto ei a tino mai manakoga kaima‵nako ke fai a te mea masei.—Faitau te Salamo 37:9-11.