•  Wutumi keka nnwuma bɔ so yɛ ne nyinaa bom anaa?

•  Nsɛm a ɛnyɛ nokware a nkurɔfo ka wɔ ho

•  Nea woyɛ a ɛbɛboa wo

•  Nea w’atipɛnfo ka

 Ɛyɛ a wutumi keka nnwuma bɔ so yɛ ne nyinaa bom anaa? Nnipa pii ka sɛ, mmerante ne mmabaa a abɛɛfo mfiri baa wɔ wɔn bere so no tumi keka nnwuma pii bɔ so yɛ ne nyinaa bom, nanso wɔn a wonyin bɛyɛɛ mpanyimfo ansa na wɔresua sɛnea wɔde abɛɛfo mfiri yɛ adwuma no de, wontumi nkeka nnwuma mmɔ so nyɛ no yiye. Nanso saa paa na asɛm no te?

 AMPA anaa ATORO?

•   Sɛ wokeka nnwuma bɔ so yɛ ne nyinaa bom a, ɛma wutumi wie no ntɛm.

•   Sɛ wotaa keka nnwuma bɔ so yɛ ne nyinaa bom a, wubehu sɛnea yɛkeka nnwuma bɔ so yɛ no yiye.

•   Mmerante ne mmabaa tumi keka nnwuma bɔ so yɛ no yiye sen mpanyimfo.

 Nsɛm a yɛaka yi, sɛ wuyii emu bi ano sɛ “aane” a, ɛnde ebia ka a nkurɔfo ka sɛ “wubetumi akeka nnwuma abɔ so ayɛ ne nyinaa abom” no, woama no adaadaa wo.

 Wugye di sɛ wubetumi aka nnwuma mmienu abɔ so na woayɛ ne nyinaa abom anaa? Nneɛma bi wɔ hɔ a, ebia wubetumi akeka abɔ so ayɛ. Ɛho nhwɛso ne sɛ, sɛ woto dwom bere a woresiesie wo dan mu, ebia wubetumi asiesie dan no mu kama.

 Nanso nnwuma bi wɔ hɔ a, ehia sɛ wode w’adwene si so na woatumi ayɛ no yiye. Enti sɛ woka mmienu bɔ so a, ebia worentumi nyɛ emu biara yiye. Ɛbɛyɛ sɛ ɛno nti na awuraa bi a wɔfrɛ no Katherine kaa saa asɛm yi. Ɔkaa sɛ: “Sɛ wokeka nnwuma bɔ so a, nea ɛkyerɛ ara ne sɛ, wopɛ sɛ wosɛe ne nyinaa.”

 “Ná me ne obi rekasa wɔ fon so, ɛnna minyaa text message. Ná ɛsɛ sɛ mema text message no ho mmuae, enti meyɛe sɛ mɛkɔ so adi me nkɔmmɔ no na mama text message no nso ho mmuae saa bere no ara. Nea ɛkɔbae ne sɛ, nkɔmmɔ a na yɛrebɔ no, nea onipa no kae no pii wɔ hɔ a, mante. Text message no nso a, mekyerɛwee emu nsɛm pii tĩĩ.”—Caleb.

 Sherry Turkle yɛ ɔbenfo a wasua abɛɛfo mfiri ho ade. Ɔkyerɛwee sɛ: “Sɛ yɛkeka nnwuma bɔ so na yɛn adwene yɛ yɛn sɛ yereyɛ ne nyinaa yiye a, . . . nea ɛwom ara ne sɛ, adwuma foforo biara a yɛde bɛka ho no, yɛrentumi nyɛ no yiye. Sɛ wokeka nnwuma bɔ so a, w’adwene ka kyerɛ wo sɛ woreyɛ adwuma paa, nanso nea ɛwom paa ne sɛ, emu biara nni hɔ a wobɛyɛ no yiye.” a

 “Ɛtɔ da a na me ne obi rekasa wɔ fon so, na saa bere no ara nso meretexte obi foforo. Ɛyɛ a na mekaa sɛ biribiara rekɔ yiye, nanso mehu no, na nea ɔrekasa wɔ fon so no abisa me asɛm ama mede ho mmuae ama nea me ne no retexte no, na nea ɔretexte me no mmuae no mmom, maka akyerɛ nea me ne no rekasa wɔ fon so no!”—Tamara.

 Nkurɔfo a wɔyɛ sɛ wɔbɛkeka nnwuma abɔ so ayɛ ne nyinaa no, wɔma wɔn ho kyere wɔn wɔ abrabɔ mu dodo. Ade baako ne sɛ, ɛtaa gye wɔn bere pii ansa na wɔatumi ayɛ wɔn sukuu dwumadi (homework) awie. Ɛtɔ da mpo a, wɔnyɛ no yiye, enti ebia wɔbɛsan agye bere ayɛ no bio. Wɔn a wɔkeka nnwuma bɔ so yɛ ne nyinaa no, sɛ wɔde bere pii na ɛyɛ oo, sɛ nso wɔsan yɛ ade ko no bio oo, ebewie ase no na agye wɔn bere nyinaa!

 Ɛno nti, Thomas Kersting a ɔyɛ adwene ho dɔkota na ɔsan tu sukuufo fo no kaa sɛ: “Sɛ adwene no sɛ yɛ kabɔd a wɔhyehyɛ nneɛma a ehia no wom kama a, ɛnde nkurɔfo a wɔkeka nnwuma bɔ so no, wɔn adwene te sɛ kabɔd a emu nneɛma atu apansam.” b

 “Sɛ wokeka nnwuma pii bɔ so yɛ ne nyinaa a, ɛma wubu w’ani gu nneɛma a ehia paa no so. Ebewie ase no, na woasan akɔfa nnwuma foforo abegu wo so. Wuse worewie ntɛm ama wo ho atɔ wo, nso wobɛhwɛ na woasɛe wo bere nyinaa.”—Teresa.

•   Sua sɛ wobɛyɛ adwuma baako awie ansa na woakɔ foforo so. Ebia wei bɛyɛ wo den, ɛnkanka sɛ woyɛ obi a wotaa keka nnwuma bɔ so yɛ ne nyinaa a. Wobɛhwɛ no, woresua ade mpo a, na woresɛnde text message. Nanso Bible ka kyerɛ yɛn sɛ ‘yɛmpɛɛpɛɛ mu nhu nneɛma a ehia koraa no.’ (Filipifo 1:10) Nnwuma a yɛyɛ no, ebi ho hia sen bi. Enti yɛ nea ehia wie ansa na woayɛ nea ɛfata.

   “Adwene no, ɛtɔ da a na ayɛ sɛ abofra a ontumi mfa n’adwene nsi ade baako so. Abofra a ɔte saa no, ɛyɛ a na ɔpɛ sɛ ɔyɛ nea ɔpɛ. Anhwɛ a wobɛka sɛ ɔrehaw wo nti, nea ɔpɛ biara wobɛyɛ ama no. Nanso ɛtɔ da a, ɛsɛ sɛ wode wo nan si fam na woka kyerɛ no sɛ daabi, nea ɔpɛ no worenyɛ mma no.”—Maria.

•   Mma biribiara nyi w’adwene mfi nea woreyɛ no so. Sɛ woresua ade a, ɛyɛ a biribi yɛ wo sɛ fa wo fon na hwɛ so anaa? Ɛnde, yi fi hɔ kɔto baabi foforo. Dum wo TV, na sohyial media mpo de, nnwen ho! Bible ka sɛ: “Nsɛe wo bere, mmom fa yɛ adepa.”—Kolosefo 4:5, Easy-to-Read Version.

   “Mabehu sɛ, sɛ meyɛ ade baako wie ansa na mayɛ foforo a, ɛboa paa. Nneɛma a makyerɛw ato hɔ sɛ mɛyɛ no, sɛ miwie baako na merekɔ foforo so a, ɛma m’ani gye paa. Ɛma me koma tɔ me yam nso.”—Onya.

•   Sɛ wo ne obi rebɔ nkɔmmɔ a, yɛ aso tie no. Sɛ obi ne wo redi nkɔmmɔ na wuyi w’ani kɔhwɛ wo fon so a, ɛkyerɛ sɛ wummu onipa a ɔne wo rekasa no, na ɛmmoa nkɔmmɔ no koraa. Bible ka sɛ, sɛnea yɛpɛ sɛ nkurɔfo yɛ yɛn no, saa ara na yɛn nso yɛnyɛ wɔn.—Mateo 7:12.

   “Ɛtɔ da na me ne me nuabea rebɔ nkɔmmɔ a, na ɔretexte obi anaa ɔremiamia ne fon no. Ɛba saa a, na me bo afuw ara ma minhu nea menyɛ! Nanso nokware de ɛda hɔ a na woaka; me nso ɛtɔ da a, meyɛ saa ara!”—David.