Bible mu no, asɛmfua a wɔkyerɛɛ ase “owusɔre” no fi Greek asɛmfua a·naʹsta·sis mu. Saa asɛmfua no kyerɛ “wɔbɛma so” anaa “wɔbɛsɔre agyina hɔ bio.” Sɛ wonyan obi a, nea ɛkyerɛ ne sɛ wɔama no so afi awufo mu aba nkwa mu ama wabɛyɛ te sɛ nea na ɔte ansa na ɔrewu no.—1 Korintofo 15:12, 13.

 Asɛmfua “owusɔre” nni Hebri Kyerɛwnsɛm a wɔtaa frɛ no Apam Dedaw no mu, nanso nkyerɛkyerɛ no de ɛwom. Ɛho nhwɛso ne sɛ, Onyankopɔn nam odiyifo Hosea so hyɛɛ bɔ sɛ: “Megye wɔn afi Ɔdamoa nsam; meyi wɔn afi owu mu.”—Hosea 13:14; Hiob 14:13-15; Yesaia 26:19; Daniel 12:2, 13.

 Wobenyan awufo akɔ he? Wobenyan ebinom akɔ soro ama wɔne Kristo akodi hene. (2 Korintofo 5:1; Adiyisɛm 5:9, 10) Bible frɛ wei “owusɔre a edi kan.” Saa asɛm yi kyerɛ sɛ, owusɔre foforo bedi wei akyi. (Adiyisɛm 20:6; Filipifo 3:11) Owusɔre a ɛto so mmienu no mu no, wobenyan nkurɔfo aba nkwa mu ama wɔabɛtena asaase so. Nnipa a wobenya owusɔre no, wɔn mu dodow no ara bɛtena asaase so.—Dwom 37:29.

 Sɛn na wobenyan awufo? Onyankopɔn ama Yesu tumi sɛ onnyan awufo. (Yohane 11:25) Yesu benyan “wɔn a wɔwɔ nkae ada mu nyinaa” aba nkwa mu. Wɔn a wobenyan wɔn no, wɔn mu biara suban ne ne biribiara rensesa; wɔbɛkae biribiara a wonim. (Yohane 5:28, 29) Wɔn a wobenyan wɔn akɔ soro no benya honhom nipadua. Nanso wɔn a wobenyan wɔn aba asaase so no de, wobenya honam nipadua a ɛte apɔw a ɛdɛm biara nni wɔn ho.—Yesaia 33:24; 35:5, 6; 1 Korintofo 15:42-44, 50.

 Henanom na wobenyan wɔn? Bible ka sɛ “bere bi bɛba a atreneefo ne wɔn a wɔnyɛ atreneefo bɛsɔre afi awufo mu.” (Asomafo Nnwuma 24:15) Atreneefo no bi ne anokwafo bi te sɛ Noa, Sara, ne Abraham. (Genesis 6:9; Hebrifo 11:11; Yakobo 2:21) Wɔn a wɔnyɛ atreneefo no bi ne wɔn wɔanni Onyankopɔn mmara so. Nea ɛma wɔyɛɛ saa ne sɛ wɔannya hokwan ansua Onyankopɔn asɛm anni so.

 Nanso, nkurɔfo a wɔkɔ so yɛ bɔne a wɔrentumi nsakra no de, wɔrennyan wɔn mfi awufo mu. Sɛ nnipa a wɔte saa no wu a, wɔrennya owusɔre mma nkwa mu bio.—Mateo 23:33; Hebrifo 10:26, 27.

 Bere bɛn na owusɔre no bɛba? Bible hyɛɛ nkɔm sɛ wobenyan wɔn a wɔbɛkɔ soro no bere a Kristo aba n’ahenni mu. Kristo baa n’ahenni mu afe 1914. (1 Korintofo 15:21-23) Nkurɔfo a wobenyan wɔn aba asaase so no benya wɔn wusɔre no wɔ Yesu Kristo Mfirihyia Apem Nniso no mu. Saa bere no na wɔbɛdan asaase paradise.—Luka 23:43; Adiyisɛm 20:6, 12, 13.

 Adɛn nti na ntease wom sɛ yebegye owusɔre no adi? Bible ma yehu owusɔre nkron a ɛkɔɔ so ho nsɛm. Emu biara no, na nkurɔfo wɔ hɔ a wohui. (1 Ahene 17:17-24; 2 Ahene 4:32-37; 13:20, 21; Luka 7:11-17; 8:40-56; Yohane 11:38-44; Asomafo Nnwuma 9:36-42; 20:7-12; 1 Korintofo 15:3-6) Lasaro a Yesu nyan no no de na ɛyɛ soronko koraa, efisɛ na Lasaro awu ama adi nnannan, na Yesu nyanee no wɔ nnipadɔm anim. (Yohane 11:39, 42) Nkurɔfo a na wɔsɔre tia Yesu mpo antumi annye saa asɛm yi ho kyim. Enti wɔyɛɛ wɔn adwene sɛ wobekum Yesu ne Lasaro nyinaa.—Yohane 11:47, 53; 12:9-11.

 Bible ma yehu sɛ Onyankopɔn wɔ tumi na ɔpɛ nso sɛ ɔsan de awufo ba nkwa mu. Onyankopɔn yɛ ade nyinaa so tumfo, enti ɔkae sɛnea onipa biara a obenyan no no te ne ne ho nsɛm nyinaa. (Hiob 37:23; Mateo 10:30; Luka 20:37, 38) Onyankopɔn wɔ tumi a ɔde benyan awufo aba nkwa mu, na ɔpɛ sɛ ɔyɛ saa nso! Nea Bible ka fa Onyankopɔn ho wɔ owusɔre a ɛreba no ho ne sɛ: “W’ani begyina wo nsa ano adwuma.”—Hiob 14:15.

Atosɛm a ɛfa owusɔre ho

 Nea nkurɔfo ka: Owusɔre yɛ ɔkra ne nipadua a wɔsan ka bom.

 Nokwasɛm: Bible ma yehu sɛ ɔkra no gyina hɔ ma onipa no, na ɛnyɛ onipa no fa bi a ɛno de enwu. (Genesis 2:7 ase hɔ asɛm; Hesekiel 18:4) Sɛ wonyan onipa bi a, ɔnyɛ ɔkra ne nipadua a wɔasan aka abom; ɔyɛ obi a wɔasan abɔ no foforo sɛ ɔkra teasefo.

 Nea nkurɔfo ka: Nnipa bi wɔ hɔ a wobenyan wɔn na wɔasan asɛe wɔn amonom hɔ ara.

 Nokwasɛm: Bible ka sɛ “wɔn a wɔyɛɛ akyiwade no” benya “atemmu wusɔre.” (Yohane 5:29) Nanso saa atemmu yi, ɛnyɛ nea saa nkurɔfo no yɛe ansa na wɔrewu so na wobegyina so abu wɔn atɛn, na mmom nea wɔbɛyɛ wɔ bere a wɔanyan wɔn no akyi. Yesu kaa sɛ: “Awufo bɛte Onyankopɔn Ba no nne, na wɔn a wɔayɛ aso atie no, wobenya nkwa.” (Yohane 5:25) Wɔn a ‘wɔbɛyɛ aso atie’ nneɛma a wobesua wɔ owusɔre akyi no, wɔbɛkyerɛw wɔn din wɔ “nkwa nhoma mmobɔwee no” mu.—Adiyisɛm 20:12, 13.

 Nea nkurɔfo ka: Sɛ wonyan obi a, nipadua a ɔde wui no saa nipadua no ara na ɔbɛsan de aba.

 Nokwasɛm: Sɛ obi wu a, ebetumi aba sɛ ne nipadua no bɛporɔw atete.—Ɔsɛnkafo 3:19, 20.