Aane. Yesu kaa asɛm bi a ɛma yehu sɛ, sɛ n’akyidifo yare a, wɔbetumi ahwehwɛ ayaresa. Ɔkaa sɛ: “Nnipa a wɔwɔ ahoɔden no nhia ɔyaresafo, na mmom wɔn a wɔyare na wohia.” (Mateo 9:12) Ɛwom, Bible nyɛ ayaresa nhoma, nanso afotu wom a ɛboa wɔn a wɔpɛ sɛ wɔyɛ nea ɛsɔ Onyankopɔn ani no ma wɔyɛ nea ɛfata.

Nsɛm a ɛsɛ sɛ wubisa wo ho

 1. Ɔkwan a ayaresafo anaa dɔktafo pɛ sɛ wɔfa so sa me yare no, mete ase anaa? Bible ka sɛ, ɛnsɛ sɛ ‘yegye asɛm biara di’ kɛkɛ, na mmom ɛsɛ sɛ yɛhwehwɛ nsɛm a ɛyɛ nokware a yebetumi de yɛn ho ato so.—Mmebusɛm 14:15.

 2. Nea oduruyɛfo a ɔrehwɛ me aka afa yare a abɔ me no ho no, ehia sɛ mikohu nnuruyɛfo foforo mmienu anaa mmiɛnsa na mibisa wɔn adwene wɔ ho anaa? Bible ka sɛ, mfaso wɔ “afotufo dodow” adwentoatoa so. Sɛ yare a abɔ wo no mu yɛ den a, saa bere no paa na ebehia sɛ woyɛ nea yɛreka yi.—Mmebusɛm 15:22.

 3. Ɔkwan a wɔrefa so asa wo yare no, etia asɛm a Bible ka a ɛne sɛ, ‘yɛntwe yɛn ho mfi mogya ho’ no anaa?—Asomafo Nnwuma 15:20.

 4. Wo nipadua mu nhwehwɛmu a wɔpɛ sɛ wɔyɛ anaa ɔkwan a wɔpɛ sɛ wɔfa so sa wo yare no, ahonhonsɛm, anaa abosonsɛm wom anaa? Bible kasa tia “ahonhonsɛm,” anaa abosonsɛm. (Galatifo 5:19-21) Nea ɛbɛma woahu sɛ ebia ahonhonsɛm wɔ ɔkwan a wɔpɛ sɛ wɔfa so sa wo yare no mu no, dwinnwen nsɛmmisa te sɛ nea edidi so yi ho:

•   Nea ɔpɛ sɛ ɔsa wo yare no, ɔkeka nsɛm anaa ɔyɛ nneɛma bi a ɛkyerɛ sɛ ɔnam ahonhom bi tumi so na ɛsa yare anaa?

•   Ayaresa a ɔpɛ sɛ ɔde ma wo no, adwene a ɛwɔ akyi ara ne sɛ, gyama woafom abosom bi nti na woyare, anaa atamfo bi na wɔato wo aduru anaa wɔabɔ wo dua?

•   Otwa nkokɔ, ɔkankye, anaa ɔyɛ nyankomade a ɛtete saa bere a ɔreyɛ aduru ama nkurɔfo anaa?

 5. M’apɔwmuden ho nsɛm agye m’adwene nyinaa anaa? Bible tu yɛn fo sɛ: “Momma nnipa nyinaa nhu sɛ mote asɛm ase.” (Filipifo 4:5) Sɛ wote asɛm ase a, ɛbɛboa wo ama wode w’adwene asi “nneɛma a ehia paa” no so, te sɛ nneɛma a yɛyɛ de som Yehowa.—Filipifo 1:10; Mateo 5:3.