Mmara Nsɛm Du no yɛ mmara a Onyankopɔn de maa tete Israel man no. Wɔsan frɛ saa mmara yi Nsɛm Du. Wɔkyerɛɛ ase fii Hebri asɛmfua ʽaseʹreth had·deva·rimʹ mu. Saa asɛm yi pue mprɛnsa wɔ Bible nhoma nnum a edi kan (Torah) no mu. (Exodus 34:28; Deuteronomium 4:13; 10:4) Asɛmfua koro no ara nso, wɔkyerɛ ase wɔ Greece kasa mu sɛ deʹka (du) ne loʹgous (nsɛm). Ɛno na ɛma yenyaa asɛmfua “Decalogue” wɔ borɔfo kasa mu.

 Onyankopɔn kyerɛw Mmara Nsɛm Du no guu abopon mmienu so. Ɔde maa ne diyifo Mose wɔ Sinai Bepɔw so. (Exodus 24:12-18) Bible mu no, yebehu Mmara Nsɛm Du no wɔ Exodus 20:1-17 ne Deuteronomium 5:6-21.

•  Sɛnea wɔahyehyɛ Mmara Nsɛm Du no

•  Mmara Nsɛm Du no, adɛn nti na ɛsono sɛnea ebinom ahyehyɛ no?

•  Adɛn nti na Onyankopɔn de Mmara Nsɛm Du no mae?

•  Ɛsɛ sɛ Kristofo di Mmara Nsɛm Du no so anaa?

•  Mmara Nsɛm Du no ho hia nnɛ anaa?

•  Yehu afotusɛm a ɛwɔ Mmara Nsɛm Du no mu wɔ Apam Foforo no mu

1.   Som Yehowa Nyankopɔn nkutoo.—Exodus 20:3.

2.   Nsom ɔbosom biara.—Exodus 20:4-6.

3.   Mfa Onyankopɔn din nni agorɔ.—Exodus 20:7.

4.   Di Homeda.—Exodus 20:8-11.

5.   Di w’awofo ni.—Exodus 20:12.

6.   Nni awu.—Exodus 20:13.

7.   Nsɛe aware.—Exodus 20:14.

8.   Mmɔ korɔn.—Exodus 20:15.

9.   Nni adansekurum.—Exodus 20:16.

10.   Mma w’ani mmere ade.—Exodus 20:17.

 Bible no amfa nɔma anhyɛ mmara no biara ho. Enti nnipa pii adwene nhyia wɔ sɛnea ɛsɛ sɛ wɔhyehyɛ mmara nsɛm no ho. Sɛnea yɛahyehyɛ wɔ soro ha no, saa na wɔtaa hyehyɛ mmara no. Nanso ebinom hyehyɛ Mmara Nsɛm Du no wɔ ɔkwan foforo so. Nsonsonoe a ɛwɔ mu no, yehu wɔ mmara a edi kan, nea ɛtɔ so mmienu, ne nea etwa to no mu. a

 Mmara Nsɛm Du no, na ɛka Mose Mmara no ho. Mmara ahorow bɛboro 600 na ɛbom yɛ Mose Mmara no. Ɛbɛyɛɛ nhyehyɛe anaa apam wɔ Onyankopɔn ne tete Israel man no ntam. (Exodus 34:27) Onyankopɔn hyɛɛ Israelfo no bɔ sɛ, sɛ wodi Mose Mmara no so a, ebesi wɔn yiye. (Deuteronomium 28:1-14) Nanso nea enti a wɔde Mmara no mae pa ara ne sɛ, ebesiesie Israelfo no ama Mesia anaa Kristo a wɔahyɛ ne ho bɔ no.—Galatifo 3:24.

 Dabi. Onyankopɔn de Mose Mmara, a Mmara Nsɛm Du no ka ho no maa tete Israel man no nkutoo. (Deuteronomium 5:2, 3; Dwom 147:19, 20) Kristofo nhyɛ Mose Mmara no ase. Yudafo a wɔbɛyɛɛ Kristofo no mpo, na ‘wɔasan wɔn afi Mmara no ho.’ (Romafo 7:6) b Wɔde “Kristo Mmara” no besii Mose Mmara no ananmu. Ahyɛde a Kristo de maa n’akyidifo no nyinaa ka Kristo Mmara no ho.—Galatifo 6:2; Mateo 28:19, 20.

 Yiw. Esiane sɛ Mmara Nsɛm Du no ma yehu Onyankopɔn adwene nti, sɛ yesua a, yebenya so mfaso. (2 Timoteo 3:16, 17) Mmara Nsɛm Du no gyina nokwasɛm ahorow a entwam da so. (Dwom 111:7, 8) Nea ɛte ne sɛ, nokwasɛm ahorow yi na nkyerɛkyerɛ a ɛwɔ Bible no fã a nnipa pii frɛ no Apam Foforo no mu no gyina so.—Hwɛ “ Yehu afotusɛm a ɛwɔ Mmara Nsɛm Du no mu wɔ Apam Foforo no mu.”

 Yesu kyerɛkyerɛe sɛ Mose Mmara no ne Mmara Nsɛm Du no nyinaa gyina ahyɛde atitiriw mmienu so. Ɔkaa sɛ: “‘Fa wo koma nyinaa ne wo kra nyinaa ne w’adwene nyinaa dɔ Yehowa wo Nyankopɔn.’ Eyi ne ahyɛde a ɛyɛ kɛse sen ne nyinaa ne nea edi kan. Nea ɛto so abien a ɛte sɛ ɛno ne sɛ, ‘Dɔ wo yɔnko sɛ wo ho.’ Ahyɛde abien yi so na Mmara no nyinaa ne Adiyifo no sɛn.” (Mateo 22:34-40) Enti ɛwom sɛ wɔnhwɛ kwan sɛ Kristofo bedi Mose Mmara no so de, nanso wɔde ahyɛde ama wɔn sɛ wɔnnɔ Onyankopɔn ne wɔn yɔnko nnipa.—Yohane 13:34; 1 Yohane 4:20, 21.