1, 2. (a) Ɔkwan bɛn so na Yesu sii hia a nhyehyɛe a wɔyɛ ho hia so dua? (b) Adeyɛ titiriw bɛn mu na nhyehyɛe a wɔbɛyɛ ho hia?

ADANSI hwehwɛ sɛ wotɔ wo bo ase siesie wo ho. Ansa na wobɛto fapem no, ɛsɛ sɛ wotɔ asase na woyɛ ɔdan no nsusuwso wɔ krataa so. Nanso, biribi foforo ho hia. Yesu kae sɛ: “Mo mu hena na ɔpɛ sɛ ɔto abantenten, na ɔrentra ase mmu ho akontaa ansa sɛ ɔwɔ nea ɔde betumi awiei?”​—Luka 14:28.

² Sɛnea adansi te no, saa ara na aware pa a wɔhyehyɛ nso te. Nnipa pii ka sɛ: “Mepɛ sɛ meware.” Nanso wɔn mu baahe na wɔtra ase susuw nea ɛhwehwɛ  ho? Ɛwom sɛ Bible ka sɛ aware yɛ adepa de, nanso ɛtwe adwene si nsɛnnennen a aware de ba nso so. (Mmebusɛm 18:​22; 1 Korintofo 7:​28) Enti ɛho hia sɛ wɔn a wɔpɛ sɛ wɔware no nya aware no mu nhyira horow ne nea wɔbɛhwere ho adwene a ɛteɛ.

3. Dɛn nti na Bible no yɛ mmoa kɛse ma wɔn a wɔyɛ nhyehyɛe sɛ wɔbɛware no, na nsɛmmisa abiɛsa bɛn na ɛbɛboa yɛn ma yɛabua?

³ Bible no betumi aboa. Aware Hyehyɛfo, Yehowa Nyankopɔn, na ɔma wɔkyerɛw emu afotu no. (Efesofo 3:​14, 15; 2 Timoteo 3:​16) Bere yɛde tete akwankyerɛ nhoma a emu nsɛm ntwaam koraa yi mu nnyinasosɛm ahorow redi dwuma no, ma yɛnhwɛ sɛ (1) Ɔkwan bɛn so na obi betumi akyerɛ sɛ waso aware? (2) Dɛn na ɛsɛ sɛ ɔhwehwɛ wɔ nea ɔbɛyɛ ne hokafo no ho? na (3) Ɔkwan bɛn so na wobetumi ama nantew a edi aware anim ayɛ nea nidi wom?

4. Ade titiriw bɛn na ɛma aware pa kɔ so tra hɔ, na dɛn ntia?

⁴ Adansi betumi agye sika pii, nanso sie a wubesiesie dan no bere tenten no nso begye sika pii. Aware te saa ara. Ɛda adi sɛ egye mmɔdenbɔ kɛse na obi aware; nanso ɛsɛ sɛ osusuw aware abusuabɔ a ɔbɛma atra hɔ afe biara no nso ho. Dɛn na abusuabɔ a ɛte saa a ɔbɛma atra hɔ no hwehwɛ sɛ ɔyɛ? Ade biako a ɛho hia ne ahofama a efi koma mu. Sɛnea Bible ka aware mu abusuabɔ ho asɛm ni: “Ɔbarima begyaw n’agya ne ne na, na ɔde ne ho akɔbata ne yere ho, na wɔayɛ ɔhonam koro.” (Genesis 2:​24) Yesu Kristo de Kyerɛwnsɛm mu ade biako pɛ a wogyina so gu aware a wobetumi asan aware bio mae​—“aguamammɔ,” kyerɛ sɛ, obi a ɔnyɛ aware no mu hokafo a wɔne no da. (Mateo 19:9) Sɛ wopɛ sɛ woware a,  ma Kyerɛwnsɛm mu gyinapɛn ahorow yi ntra w’adwenem. Sɛ wunsiesiee wo ho sɛ wobɛda ahofama a emu yɛ den yi adi a, ɛnde wonsoo aware.​—Deuteronomium 23:​21; Ɔsɛnkafo 5:​4, 5.

5. Ɛwom sɛ aware mu ahofama a emu yɛ den ma ehu ka nnipa binom de, nanso dɛn nti na ɛsɛ sɛ wɔn a wɔpɛ sɛ wɔware no bu no sɛ ɛso wɔ mfaso kɛse mmom?

⁵ Adwene a ɛne sɛ ɛsɛ sɛ wonya ahofama a emu yɛ den no ma ehu ka nnipa pii. Aberante bi kae sɛ: “Hu a mihui sɛ yɛn baanu bɛtra abom yɛn nkwa nna nyinaa no ma metee nka sɛ mahwere m’ahofadi, wɔaka me ahyɛ, wɔde me ato afiase koraa.” Nanso sɛ wodɔ onipa a wopɛ sɛ woware no no ampa a, ahofama renyɛ te sɛ adesoa. Mmom no, wubebu no sɛ nea ɛma wunya ahobammɔ. Ahofama a wɔkyerɛ sɛ ɛsɛ sɛ awarefo nya wɔ aware mu no bɛma wɔanya ɔpɛ sɛ wɔbɛtra abom wɔ bere pa ne bere bɔne mu, na wɔaboa wɔn ho wɔn ho a nea ɛbɛba biara mfa ho. Kristoni ɔsomafo Paulo kyerɛwee sɛ nokware dɔ “wɔ abodwokyɛre” na “ɛtɔ ne bo ase ade nyinaa mu.” (1 Korintofo 13:​4, 7) Ɔbea bi kae sɛ: “Aware mu ahofama ma mete nka sɛ mewɔ ahobammɔ kɛse. M’ani gye akomatɔyam a ɛwom sɛ yɛagye atom wɔ yɛn ankasa ne wiase no anim sɛ yɛpɛ sɛ yɛtra bom no ho.”​—Ɔsɛnkafo 4:​9-12.

6. Dɛn nti na ɛyɛ papa sɛ worempere wo ho nkɔware bere a wusua no?

⁶ Egye ahokwaw na woatra ase ma ɛne saa ahofama no ahyia. Enti, Paulo tu fo sɛ ɛyɛ papa sɛ Kristofo renware kosi sɛ wɔn “baabun” bere a nna ho akɔnnɔ ano yɛ den na ebetumi asɛe atɛmpa no, ‘betwam.’ (1 Korintofo 7:​36) Mmofra sakra ntɛmntɛm bere a wonyin no. Nnipa pii a wɔware bere a wosusua yiye no hu sɛ wɔne wɔn hokafo no ahiade ne  apɛde ahorow sakra wɔ mfe kakraa bi akyi. Akontaabu da no adi sɛ mmofra a wɔware no ntaa nnya anigye na wɔbɛpɛ sɛ wogyae aware sen wɔn a wɔtwɛn kakra no. Enti mpere wo ho nware. Mfe bi a wode bɛtra ase sɛ aberante anaa ababaa sigyani no betumi ama woanya osuahu a ɛsom bo a ɛbɛma wo ho akokwaw na woafata kɛse sɛ ɔhokafo. Aware a wubetu ahyɛ da no nso betumi aboa wo ma woahu sɛnea wote yiye—ade a ɛho hia na woanya abusuabɔ pa wɔ w’aware mu.

7. Dɛn nti na ɛsɛ sɛ wɔn a wɔreyɛ nhyehyɛe aware no di kan pɛɛpɛɛ wɔn ho mu?

⁷ So wuhu sɛ ɛyɛ mmerɛw sɛ wobɛkyerɛ su horow a wohwehwɛ wɔ obi a ɔbɛyɛ wo hokafo ho? Nnipa dodow no ara hu no saa. Na w’ankasa su horow nso ɛ? Su horow bɛn na wowɔ a ɛbɛboa ma woanya aware pa? Okunu anaa ɔyere bɛn na wobɛyɛ? Sɛ nhwɛso no, wufi wo pɛ mu gye wo mfomso ne afotu tom, anaa wode anoyi ma bere nyinaa bere a wɔteɛ wo no? Wowɔ anigye ne nneɛma ho adwempa, anaa wotaa munamuna na wunwiinwii? (Mmebusɛm 8:​33; 15:​15) Kae sɛ aware rensakra wo nipasu. Sɛ woyɛ ahantan, nsɛm haw wo ntɛmntɛm, anaa wunni nneɛma ho adwene a ɛteɛ koraa bere a woyɛ osigyani no a, saa na wobɛyɛ bere a woaware no. Esiane sɛ ɛyɛ den sɛ yebehu yɛn ho sɛnea afoforo hu yɛn nti, dɛn nti na wonka nkyerɛ w’awofo anaa w’adamfo a wugye no di sɛ ɔnka sɛnea wote nkyerɛ wo pefee na ɔmma wo nyansahyɛ ahorow? Sɛ wuhu nsakrae a wubetumi ayɛ a, di ho dwuma ansa na woayɛ nhyehyɛe aware.

8-10. Afotu bɛn na Bible de ma a ɛbɛboa obi ma wasiesie ne ho ama aware?

 ⁸ Bible hyɛ yɛn nkuran sɛ yɛmma Onyankopɔn honhom kronkron nyɛ adwuma wɔ yɛn mu, na yenya su horow te sɛ “ɔdɔ, anigye, asomdwoe, abodwokyɛre, ayamye, papayɛ, gyidi, odwo, anidahɔ.” Ɛsan ka kyerɛ yɛn sɛ ‘yɛmma wɔnyɛ yɛn foforo yɛn adwene honhom mu,’ na yɛnhyɛ “onipa foforo a wɔbɔɔ no Nyankopɔn so, nokware trenee ne ahotew mu.” (Galatifo 5:​22, 23; Efesofo 4:​23, 24) Afotu yi a wode bedi dwuma bere a woda so ara yɛ osigyani no bɛyɛ te sɛ nea wode wo sika akɔto sikakorabea—biribi a ɛho bɛba mfaso kɛse daakye bere a woaware no.

⁹ Sɛ nhwɛso no, sɛ woyɛ ɔbea a, sua sɛnea wobɛma w’ani aku “komam nipa a wahintaw” no ho sen sɛnea wote wɔ nipadua mu. (1 Petro 3:​3, 4) Odwo ne adwenemtew bɛboa wo ma woanya nyansa, nokware “abotiri fɛfɛ.” (Mmebusɛm 4:9; 31:​10, 30; 1 Timoteo 2:​9, 10) Sɛ woyɛ ɔbarima a, sua sɛnea wubeyi ayamye ne obu adi akyerɛ mmea. (1 Timoteo 5:​1, 2) Bere a wusua sɛnea wubesi gyinae na woadi asɛyɛde ahorow ho dwuma no, sua sɛnea wobɛda odwo ne ahobrɛase nso adi. Nhyɛso de ɔhaw bɛba aware mu.​—Mmebusɛm 29:​23; Mika 6:8; Efesofo 5:​28, 29.

¹⁰ Ɛwom sɛ w’adwene a wobɛyɛ no foforo wɔ eyi mu no yɛ den de, nanso ɛyɛ ade a ɛsɛ sɛ Kristofo nyinaa di ho dwuma. Na ɛbɛboa wo ma woayɛ aware mu ɔhokafo pa.

11, 12. Ɔkwan bɛn so na nnipa baanu betumi ahu sɛ wɔfata wɔn ho anaa wɔmfata wɔn ho?

¹¹ Ɛyɛ amanne wɔ baabi a wote no sɛ obi bɛpaw n’ankasa hokafo? Sɛ saa na ɛte na wuhu sɛ w’ani  gye obi ho a, ɛsɛ sɛ wufi ase wɔ ɔkwan bɛn so? Nea edi kan no, bisa wo ho sɛ, ‘Mepɛ sɛ meware ampa?’ Ɛyɛ atirimɔdensɛm sɛ wode obi foforo nkate bedi agoru denam akwanhwɛ a ɛremma mu a wobɛma wanya so. (Mmebusɛm 13:​12) Afei, bisa wo ho sɛ, ‘Metumi aware?’ Sɛ nsɛmmisa abien no nyinaa mmuae yɛ yiw a, nea afei wobɛyɛ no gyina mo hɔnom amammerɛ so. Wɔ nsase bi so no, bere a wode bere kakra ahwɛ onipa no akyi no, wubetumi akɔ ne nkyɛn akɔka akyerɛ no sɛ wopɛ sɛ wuhu no yiye. Sɛ wampene a, nhyɛ no nkodu baabi a wo ho bɛyɛ no ahi. Kae sɛ ɔfoforo no nso wɔ hokwan sɛ osi gyinae wɔ asɛm no mu. Nanso, sɛ ɔpene a, mubetumi ayɛ nhyehyɛe de ayɛ nneɛma a ɛfata abom. Eyi bɛma woanya hokwan ahu sɛ ebia nyansa wom sɛ woware saa onipa yi anaa. * Dɛn na ɛsɛ sɛ wohwehwɛ wɔ saa bere yi mu?

¹² Sɛ wubebua saa asɛmmisa no a, susuw mfiri abien a wɔde bɔ nnwom, sanku ne gyitaa, ho. Sɛ wohyehyɛ no yiye a, emu biara nkutoo betumi abɔ dwom a ɛyɛ dɛ. Nanso, sɛ wɔde mfiri yi bom bɔ dwom a, dɛn na ɛba? Afei ɛsɛ sɛ ne nnyigyei tumi hyia. Saa na ɛte wɔ wo ne nea ɔbɛyɛ wo hokafo no fam. Ebia mo nyinaa abɔ mmɔden yiye sɛ mobɛma mo nipasu “ahyia.” Nanso asɛmmisa no ne sɛ: Mo ani hyia? Ɔkwan foforo so no, mofata mo ho?

13. Dɛn nti na nyansa nnim koraa sɛ wo ne obi a ɛsono ne gyidi bɛyɛ aware nhyehyɛe?

¹³ Ɛho hia sɛ mo baanu nyinaa benya gyidi ne nnyinasosɛm biako. Ɔsomafo Paulo kyerɛwee sɛ: “Mo ne wɔn a wonnye nni nntwe kɔndua koro.” (2 Korintofo  6:​14; 1 Korintofo 7:​39) Obi a wo ne no nni gyidi koro wɔ Onyankopɔn mu a wobɛware no no remma mo adwene nhyia koraa. Nea ɛne eyi bɔ abira no, ɔsom a mobɛbom de ama Yehowa Nyankopɔn no ne ade titiriw a ɛbɛma moayɛ biako. Yehowa pɛ sɛ w’ani gye na wo ne onipa a wobɛware no no nya abusuabɔ a emu yɛ den paa a ɛbɛyɛ yiye biara. Ɔpɛ sɛ mode mo ho bata mo ho ne Ɔno ho denam ɔdɔ hama a ɛbɔ ho abiɛsa so.​—Ɔsɛnkafo 4:12.

14, 15. So gyidi koro a mowɔ no ne ade biako pɛ a ɛde biakoyɛ ba aware mu? Kyerɛkyerɛ mu.

¹⁴ Ɛwom sɛ Onyankopɔn a mobɛbom asom no no ne ade a ɛho hia sen biara a ɛbɛma moayɛ biako de, nanso nneɛma pii ka ho. Sɛ mobɛyɛ biako a, ɛsɛ sɛ wo ne nea ɔbɛyɛ wo hokafo no nya botae koro. Dɛn ne wo botae? Sɛ nhwɛso no, mo baanu nyinaa te nka dɛn wɔ mmofra a mubenya ho? Nneɛma bɛn na mode di kan wɔ mo asetra mu? * (Mateo 6:​33) Wɔ aware pa ankasa mu no, awarefo no yɛ nnamfo pa na wɔn anigye sɛ wɔne wɔn ho bɛbɔ. (Mmebusɛm 17:​17) Wɔ eyi ho no, ɛho hia sɛ wonya nneɛma a wɔn nyinaa ani gye ho. Ɛyɛ den sɛ yebekura adamfofa a emu yɛ den mu​—na mene sɛ aware​—bere a yenni nea yɛn nyinaa ani gye ho. Nanso, sɛ nea ɔbɛyɛ wo hokafo no anigye adeyɛ titiriw, te sɛ mpasetu, ho, na w’ani nnye ho a, ɛkyerɛ sɛ ɛnsɛ sɛ mo baanu no ware? Ɛnkyerɛ saa ankasa. Ebia nneɛma atitiriw pii wɔ hɔ a mo nyinaa ani gye ho. Afei nso, wubetumi ama nea ɔbɛyɛ wo hokafo no ani agye denam nneɛma  pa a wo ne no bɛbom ayɛ esiane sɛ n’ani gye ho nti no so.​—Asomafo no Nnwuma 20:35.

¹⁵ Nokwarem no, sɛnea mo baanu no tumi yɛ nsakrae no titiriw na ɛkyerɛ sɛ mofata mo ho mo ho, na ɛnyɛ sɛnea mosɛ mo ho. Sɛ anka mubebisa sɛ, “So yɛn adwene hyia wɔ biribiara ho?” mmom no, nsɛm bi a eye a mubetumi abisa ne sɛ: “Sɛ yɛn adwene nhyia wɔ biribi ho a, dɛn na ɛba? Yebetumi asusuw nsɛm ho komm, akyerɛ obu ne nidi ama yɛn ho yɛn ho? Anaa nsɛm a yesusuw ho taa dan akyinnyegye a emu yɛ den?” (Efesofo 4:​29, 31) Sɛ wopɛ sɛ woware a, hwɛ wo ho yiye wɔ obiara a ɔyɛ ahantan a nea ɔka nkutoo na ɛteɛ, ɔmpɛ sɛ obegyae nsɛm mu, anaa ɔhwehwɛ na ɔyɛ nhyehyɛe bere nyinaa sɛ ɔbɛyɛ nea ɔpɛ ho.

16, 17. Sɛ ɔbarima anaa ɔbea bi rehwehwɛ obi a ɔbɛyɛ n’aware mu ɔhokafo a, dɛn na obetumi ahwɛ?

¹⁶ Wɔ Kristofo asafo no mu no, ɛsɛ sɛ ‘wodi kan sɔ’ wɔn a wɔde asɛyɛde hyɛ wɔn nsa no ‘hwɛ.’ (1 Timoteo 3:​10) Wo nso wubetumi de nnyinasosɛm yi adi dwuma. Sɛ nhwɛso no, ɔbea betumi abisa sɛ, “Edin bɛn na ɔbarima yi agye? Henanom ne ne nnamfo? Ɔda ahosodi adi? Ɔkwan bɛn so na ɔne wɔn a wɔn mfe akɔ anim no di? Abusua bɛn mu na ofi? Ɔkwan bɛn so na ɔne wɔn di nkitaho? Su bɛn na oyi no adi wɔ sika ho? Ɔyɛ ɔkɔwensani? Ne koma haw no, anaa ɔyɛ basabasa mpo? Asafo mu asɛyɛde bɛn na ɔwɔ, na odi ho dwuma dɛn? Metumi anya obu a emu dɔ ama no?”​—Leviticus 19:​32; Mmebusɛm 22:​29; 31:​23; Efesofo 5:​3-5, 33; 1 Timoteo 5:8; 6:​10; Tito 2:​6, 7.

¹⁷ Ɔbarima betumi abisa sɛ, “So ɔbea yi dɔ Onyankopɔn na obu no? Obetumi ahwɛ fie? Dɛn na n’abusua  bɛhwehwɛ afi yɛn hɔ? Onim nyansa, ɔyɛ nsiyɛfo, ɔnsɛe sika? Dɛn na ɔka ho asɛm? Odwen afoforo yiyedi ho ankasa, anaa ɔyɛ ɔhopɛfo, ɔsɛmpɛfo? Wotumi de ho to no so? Ɔwɔ ɔpɛ sɛ ɔbɛbrɛ ne ho ase ahyɛ tiyɛ ase, anaa ɔsen ne kɔn, ebia ɔyɛ otuatewfo mpo?”​—Mmebusɛm 31:​10-31; Luka 6:​45; Efesofo 5:​22, 23; 1 Timoteo 5:​13; 1 Petro 4:15.

18. Sɛ wuhu mmerɛwyɛ nketenkete bi wɔ nantew a edi aware anim mu a, dɛn na ɛsɛ sɛ woma ɛtra w’adwenem?

¹⁸ Mma wo werɛ mmfi sɛ wo ne Adam aseni a ɔnyɛ pɛ na ɛredi, ɛnyɛ ayɛsɛm mu ɔkatakyie bi a ɔwɔ su anaa nidi soronko bi. Obiara wɔ sintɔ ahorow, na ɛsɛ sɛ wobu ani gu ebi so​—wo de ne nea ɔbɛyɛ wo hokafo no de. (Romafo 3:​23; Yakobo 3:2) Afei nso, mmerɛwyɛ bi a munim betumi ama moanya hokwan a ɛbɛma moanyin. Sɛ nhwɛso no, fa no sɛ mugyee akyinnye wɔ mo nantew a edi aware anim no mu. Susuw ho: Ɛtɔ mmere bi a, nnipa a wɔdodɔ wɔn ho na wobu wɔn ho wɔn ho mpo adwene nhyia. (Fa toto Genesis 30:2; Asomafo no Nnwuma 15:​39 ho.) So ebetumi aba sɛ nea ehia ara ne sɛ mo baanu nyinaa bɛsan ‘asianka mo honhom,’ na moasua sɛnea mubesiesie nsɛm wɔ asomdwoe mu? (Mmebusɛm 25:​28) Nea ɔbɛyɛ wo hokafo no da no adi sɛ ɔpɛ sɛ onya nkɔso? Wo nso wopɛ sɛ woyɛ saa? Wubetumi asua sɛ womma nsɛm nhaw wo dodo, womma wo bo mfuw ntɛmntɛm? (Ɔsɛnkafo 7:9) Sua a mubesua sɛnea mubedi ɔhaw ahorow ho dwuma no betumi ama moanya ɔkwan bi a, sɛ moware a, mobɛfa so abɔ nkɔmmɔ a ɛho hia.​—Kolosefo 3:13.

19. Sɛ ɔhaw a emu yɛ den sɔre wɔ nantew a edi aware anim mu a, dɛn na nyansa wom sɛ woyɛ?

¹⁹ Na sɛ wuhu nneɛma a ɛhaw wo kɛse nso ɛ? Ɛsɛ sɛ wususuw nneɛma a ɛte saa no ho yiye. Ɛmfa ho  sɛnea mo ani gye mo ho, anaa sɛnea mo ho pere mo sɛ mobɛware no, ɛnsɛ sɛ mubu mo ani gu sintɔ ahorow a anibere wom so. (Mmebusɛm 22:3; Ɔsɛnkafo 2:​14) Sɛ wo ne obi a wunni ne mu ahotoso koraa ayɛ nhyehyɛe a, nyansa wom sɛ mubegu no na woakwati sɛ wobɛhyɛ onii no bɔ a wuntumi ntwa mu.

20. Ɔkwan bɛn so na nnipa baanu a wɔde wɔn ho ahyɛ nantew a edi aware anim mu bɛma wɔn abrabɔ ayɛ nea asɛm biara nni ho?

²⁰ Mobɛyɛ dɛn atumi ama mo nantew a edi aware anim no ayɛ nea nidi wom? Nea edi kan no, monhwɛ nhu sɛ asɛm biara remma mo abrabɔ ho. Wobu no sɛ ɛfata sɛ nnipa baanu a wɔnware besuso wɔn ho nsa mu, afew wɔn ho ano, anaa wɔbɛbam wɔn ho wɔ baabi a mote no? Sɛ wɔma nneyɛe a ɛte saa a wɔde kyerɛ ɔdɔ no ho kwan mpo a, bere a abusuabɔ no adu baabi a moahyɛ da ayɛ aware ho nhyehyɛe pefee nkutoo na ɛsɛ sɛ moma ho kwan. Monhwɛ yiye na ɔdɔ a moda no adi no annan adeyɛ a ɛho ntew anaa aguamammɔ mpo. (Efesofo 4:​18, 19; fa toto Nnwom mu Dwom 1:2; 2:6; 8:​5, 9, 10 ho.) Esiane sɛ koma no yɛ ɔdaadaafo nti, nyansa wom sɛ mo baanu nyinaa bɛkwati sɛ mo nkutoo bɛtra ofie, ɔdan, anaa kar bi a esi baabi mu, anaa baabiara a ɛbɛma moanya kwan abu bra bɔne. (Yeremia 17:9) Mo nantew a edi aware anim a mobɛma ho atew wɔ abrabɔ fam no di adanse pefee sɛ mowɔ ahosodi, na wudwen onipa foforo no yiyedi ho wɔ ɔkwan a pɛsɛmenkominya nnim so sen nneɛma a w’ankasa pɛ. Nea ehia sen biara no, nantew a edi aware anim a ɛho tew no bɛsɔ Yehowa Nyankopɔn a ɔhyɛ n’asomfo sɛ wɔntwe wɔn ho mfi efĩ ne aguamammɔ ho no ani.​—Galatifo 5:​19-21.

21. Nkɔmmɔbɔ a nokwaredi wom bɛn na ebia ɛho behia na ama nantew a edi aware anim ayɛ nea nidi wom?

 ²¹ Nea ɛto so abien ne sɛ, nkɔmmɔbɔ a nokwaredi wom ka nantew a edi aware anim a nidi wom ho. Bere a mo nantew a edi aware anim no redan aware no, ɛho behia sɛ mususuw nsɛm bi ho pefee. Ɛhe na mobɛtra? Mo baanu nyinaa bɛyɛ adwuma? Mopɛ sɛ mowo? Afei nso, ɛyɛ papa sɛ obi bɛda nneɛma adi, ebia nea wayɛ atwam a ebetumi aka aware no. Eyinom mu bi betumi ayɛ ɛka kɛse anaa asɛyɛde ahorow anaa akwahosan ho nsɛm, te sɛ ɔyare anaa tebea biara a emu yɛ den a wowom. Esiane sɛ HIV (ɔyare aboawa a ɔde AIDS ba) ho nsɛnkyerɛnne nna adi ntɛm wɔ nnipa pii a ɛwɔ wɔn ho no ho nti, ɛrenyɛ mfomso sɛ obi anaa awofo a wodwen wɔn mma ho bɛka sɛ obi a kan na ɔbɔ aguaman anaa ɔde nnubɔne fa ne ntini mu no nkɔhwɛ sɛ ebia AIDS wɔ ne mogya mu anaa. Sɛ ɛda adi sɛ ebi wom a, ɛnsɛ sɛ onipa a ɔwɔ bi no hyɛ nea ɔbɛyɛ ne hokafo no sɛ wɔntoa abusuabɔ no so, sɛ afei saa onii no pɛ sɛ otwam a. Nokwarem no, ɛyɛ papa sɛ obiara a wabu bra a ɛma ɛyɛ mmerɛw koraa sɛ obenya ɔyare no fi ne pɛ mu kɔhwehwɛ ne mogya mu sɛ ebia AIDS wom ansa na ɔne obi ayɛ aware nhyehyɛe.

22, 23. (a) Ɔkwan bɛn so na ebia obi renkari pɛ bere a ɔresiesie ne ho ama ayeforohyia no? (b) Adwene a ɛkari pɛ bɛn na ɛsɛ sɛ wokɔ so nya bere a woresusuw ayeforohyia ne aware no ho no?

²² Bere a aka asram kakraa bi ma moaware no, ebetumi aba sɛ mo baanu nyinaa de bere pii bɛyɛ ayeforohyia no ho nhyehyɛe. Nneɛma a monyɛ mma ɛntra so bɛma moatumi ama adwennwene no so atew kɛse. Ebia ayeforohyia kɛse bɛsɔ abusuafo ne  ɔmanfo ani, nanso ebetumi ama nnipa a wɔaware foforo no ne wɔn mmusua abrɛ yiye na wɔabɔ ka kɛse. Ntease wom sɛ mubedi mo hɔnom amanne bi so, nanso biribiara a mobɛpene so ne ebia nneɛma a mobɛpɛ sɛ moyɛ ma ɛkyɛn afoforo de ntumi mma wonhu nea adeyɛ no kyerɛ na ebetumi ama moahwere anigye a ɛsɛ sɛ munya no. Ɛwom sɛ ɛsɛ sɛ mususuw afoforo nkate ho de, nanso okunu no titiriw na ɛyɛ n’asɛyɛde sɛ osi nea ɛbɛkɔ so wɔ ayeforohyia apontow no ase ho gyinae.​—Yohane 2:9.

²³ Monkae sɛ mo ayeforohyia no di da koro pɛ, nanso mo aware no tra hɔ mo nkwa nna nyinaa. Monkwati sɛ mode mo adwene besi awaregye no so dodo. Mmom no, momfa mo ho nto Yehowa Nyankopɔn so mfa nhwehwɛ akwankyerɛ, na munni kan nyɛ aware asetra ho nhyehyɛe. Ɛno na ɛbɛma moasiesie mo ho yiye ama aware pa.