Wiase atumfoɔ ne nnwumakuw akɛse a ɛwɔ wiase no ayɛ biara, nanso wɔntumi mfaa asomdwoe mmaa wiase. Akokoakoko a ɛrekɔ so wɔ wiase no adɔɔso paa; efi bere a Wiase Ko a Ɛtɔ So Mmienu no baa awiei no, yenhuu bi saa da. Nnipa a ɛte mmeae a akokoakoko rekɔ so no yɛ bɛyɛ ɔpepepem mmienu. Wei kyerɛ sɛ, wuyi wiase mu nnipa nnan biara a, baako te baabi a ntɔkwaw rekɔ so.

 Adɛn nti na asomdwoe abɔ nnipa saa? Dɛn na Bible ka fa ho?

1.  1. Ɛnnɛ, wohwɛ suban a nnipa wom a, wuhu sɛ wɔnyɛɛ wɔn adwene koraa sɛ wɔne wɔn yɔnko bɛtena asomdwoe mu. Bible ka too hɔ sɛ, ɛnnɛ, “nnipa bɛyɛ pɛsɛmenkominya, wɔbɛyɛ sikanibere, wɔbɛhoahoa wɔn ho, wɔbɛyɛ ahantan, . . . wobedi nkurɔfo huammɔ, . . . nkurɔfo rentumi ne wɔn nyɛ apam, . . . wɔrentumi nhyɛ wɔn ho so, wobedi atirimɔdensɛm, . . . wɔbɛyɛ asoɔden, wɔbɛyɛ ahomaso.”—2 Timoteo 3:2-4.

2.  2. Onipa biara nni hɔ a obetumi ayi wiase haw afi hɔ. Sɛ yɛn nyinaa ka yɛn ti pam ho mpo a, ɛrenkosi hwee, gye sɛ yɛn Bɔfo Yehowa a Nyankopɔn de ne ho gye mu. Bible ma yehu sɛ, “sɛnea onipa nam a obetutu ne nan mpo, enni ne nsam.”—Yeremia 10:23.

3.  3. Otirimɔdenfo bi a ɔwɔ tumi a yɛfrɛ no Satan Ɔbonsam na odi wiase so. Bible ka sɛ “ɔredaadaa asaase sofo nyinaa.” (Adiyisɛm 12:9) Mpɛn dodow a “wiase nyinaa da ɔbɔnefo no tumi mu” no, ntɔkwaw ne akameakame rempa wiase da.—1 Yohane 5:19.

 Bible ma yehu sɛ asomdwoe de, ɛbɛba, nanso ɛremfi nnipa, na mmom ebefi Onyankopɔn.

•   “‘Na me ara minim adwene a madwen wɔ mo ho,’ Yehowa asɛm ni. ‘Ɛyɛ asomdwoe adwene, na ɛnyɛ mmusu; ɛne sɛ, mɛma mo daakye ne anidaso.’”—Yeremia 29:11.

 Sɛn na Onyankopɔn bɛma saa bɔhyɛ no abam? “Onyankopɔn a ɔma asomdwoe no bɛpɛtɛw Satan.” (Romafo 16:20) Aban bi wɔ soro. Ɛno na Onyankopɔn nam so de asomdwoe bɛba wiase nyinaa. Bible frɛ saa aban no “Onyankopɔn Ahenni.” (Luka 4:43) Yesu Kristo na ɛyɛ saa Ahenni no so hene. Obedi ade a, ɔbɛkyerɛ nnipa sɛnea wɔbɛtena ase asomdwoe mu.—Yesaia 9:6, 7.

•   Sɛ wopɛ sɛ wuhu wei ho nsɛm pii a, kenkan asɛm a yɛato din “Dɛn Na Onyankopɔn Ahenni Bɛyɛ?”