NÁ Rebeka kurom ne Haran; ɛhɔ na na watena fi ne mmofraase. Nanso da koro bi, ohuruw tenaa yoma so sii kwan so sɛ ɔrekɔ baabi a onnim. Yoma yɛ aboa bi a ɔware paa, enti hwɛ sɛ Rebeka te aboa tenten yi so; ɔkwan a ɔnam so no nso yɛ mmonkyimmɔnka. Ɔte aboa no so rekɔ nyinaa, na ɛredenkyedenkye no, nanso otwaa kwan no nna kakra no, afei na wahu so tena. Wo de hwɛ sɛ owia rekɔtɔ na Rebeka ama ne ti so rehwɛ kwan no so, otwa n’ani hwɛ n’akyi a, ohu sɛ wagyaw ne kurom Haran wɔ akyirikyiri. Rebeka rekɔ yi, sɛ obehu n’abusuafo bio oo, sɛ onhu wɔn bio oo, na onnim. Ɔreyɛ adu baabi a ɔrekɔ no, ɛbɛyɛ sɛ ofii ase dwinnwen ne daakye ho.

Ná ɛnyɛ Rebeka nko ara na ɔnam, na ebinom ka ne ho. Ná akwantufo no ani kyerɛ Kanaan asase so, na wɔrebɛn Negeb no, wohui sɛ ɛhɔ kwan no nye koraa. (Genesis 24:62) Ɛbɛyɛ sɛ na asase a ɛwɔ hɔ no nyɛ asasebere a wobetumi ayɛ so afuw. Nanso na nwura frɔmfrɔm kakra wɔ asase no so, enti na wɔde mmoa kɔ adidi wɔ hɔ. Enti yebetumi aka sɛ wɔnam kwan so no, Rebeka huu nguan. Ɛha de na ɔpanyin a odi wɔn anim no adu ne de mu, na wohwɛ no a wuhu sɛ ne tirim ayɛ no dɛdɛɛdɛ efisɛ okura asɛmpa a ɔde rekɔma ne wura— Rebeka rebɛyɛ Isak yere! Nanso Rebeka de, gyama na ato no adwinnwen. Ɔbarima a ɔrekɔware no no, na onhuu no da. Sɛ́ ɔbarima no te sɛn oo, sɛ ɔte sɛn oo, sɛ ɔbɛdɔ no oo, sɛ ɔnnɔ no oo, na Rebeka nnim. Na sɛ ɔno Rebeka bɛdɔ ɔbarima no nso a, na onnim.

Ɛnnɛ, mmeae bebree wɔ hɔ a, ɛbɛyɛ sɛ wɔntee da mpo sɛ awofo tumi hwehwɛ kunu anaa ɔyere ma wɔn mma. Mmeae foforo de, aware a ɛte saa nyɛ nã. Sɛnea wo kurom amammerɛ te biara, wubegye adi sɛ na Rebeka rekɔ kwantenten aware. Enti yebetumi aka sɛ na Rebeka gyidi ne n’akokoduru da mu fua. Sɛ nsakrae bi ba yɛn asetenam a, yɛn nso yehia gyidi ne akokoduru. Ɛnyɛ gyidi ne akokoduru nko ara na na Rebeka wɔ; ná ɔwɔ su afoforo a ɛyɛ fɛ nso.

Nea Rebeka yɛe a ɛsesaa n’asetena no, na ɛnyɛ biribi a ɔnyɛɛ bi da. Ná Haran yɛ kurow a ɛwɔ Mesopotamia na ɛbɛyɛ sɛ saa kurow no mu anaa ɛhɔ baabi na wɔtetee Rebeka. Haranfo de, na wɔsom ɔsram nyame bi a ne din de Sin, nanso na Rebeka awofo som Yehowa Nyankopɔn.—Genesis 24:50.

Ná Rebeka yɛ ɔbea a ahoɔfɛ aguare no, nanso na n’ahoɔfɛ no nyɛ hyɛnhyɛn kwa. Ná ɔyɛ mmɔdenbɔfo a n’abrabɔ ho twa. Ná Rebeka abusua no wɔ nkoa, enti yebetumi aka sɛ na wɔn nsam wɔ bi. Nanso wɔanhyɛ no abahyɛbɔne, na saa ara nso na wɔannyigye no so sɛ ɔdehye bi, mmom wɔde adwumaden tetee no. Saa bere no na mmea yɛ adwumaden, enti na Rebeka nnya ne ho atwaye koraa; ɔno ara na na ɔkɔ nsu ma abusua no. Edu anwummere a, wubehu no no na ɔde ahina asi n’abati rekɔ nsu.—Genesis 24:11, 15, 16.

Da koro anwummere bi, bere a Rebeka saw ne nsu wiei ara pɛ na ɔpanyin bi yɛɛ ntɛm kɔɔ ne nkyɛn kɔsee no sɛ: “Mesrɛ wo ma me w’ahina no mu nsu kakra nnom.” Rebeka hui sɛ ɔpanyin no atwa kwantenten, enti bere a ɔsrɛɛ no nsu no, na ɛnyɛ biribi a ɛboro so. Enti ɛhɔ ara na ɔsoɛɛ n’ahina no sii fam, maa no nsu a emu adwo no bi bɔ guu ne bo. Ná ɔpanyin no de yoma du na ɛnam, na na wobutubutuw hɔ a wonnyaa nsu no bi nnomee. Rebeka hui sɛ na ɔpanyin no rehwɛ no dinn na ɔno nso yɛe sɛ obeyi ne yam aboa no. Enti ɔkae sɛ:  ‘Mɛsaw bi ama wo yoma no nso kosi sɛ wɔbɛnom amee.’—Genesis 24:17-19.

Hyɛ no nsow sɛ Rebeka anka sɛ ɔbɛsaw nsu ama mmoa no anom kɛkɛ, na mmom ɔkae sɛ ɔbɛma wɔn nsu anom amee. Yoma a sukɔm de no paa betumi anom nsu bɛyɛ galɔn 25! Yoma du no, sɛ na sukɔm de wɔn paa a, ɛnde na Rebeka wɔ adwuma yɛ, nanso ɛbɛyɛ sɛ na sukɔm nhyɛ da nne mmoa no saa. * Anhwɛ a, obi bɛka sɛ na Rebeka nim sɛ sukɔm nne wɔn nti na ogyee adwuma no too ne ho so. Ɛnte saa, mmom na ne de ara ne sɛ obeyi ne yam asom ɔpanyin no hɔho. Ɔpanyin no nso ansiw no kwan. Enti ababaa no tuu mmirika dii akɔneaba wɔ abura no ho kɔsaw nsu brɛɛ yoma no nyinaa. Ɔrekɔ ba nyinaa, na ɔpanyin no rehwɛ no dinn.—Genesis 24:20, 21.

Nea Rebeka yɛe no, asuade wom paa. Ɛnnɛ wiase a yɛte mu yi, obiara asɛm mfa obi ho. Bible mpo aka ato hɔ sɛ “nnipa bɛyɛ ahopɛ,” kyerɛ sɛ wɔbɛyɛ pɛsɛmenkominya. (2 Timoteo 3:1-5) Sɛnea Rebeka dii akɔneaba wɔ abura no ho som ahɔho no, sɛ Kristoni biara dwinnwen ho a, ebetumi ama wayi pɛsɛmenkominya akwa.

Rebeka hui sɛ ɔpanyin no rehwɛ no nanso na adwemmɔne biara nni akyi. Asɛm no ara ne sɛ nea Rebeka yɛe no maa ɔpanyin no ho dwiriw no, na n’ani gyei. Abofra a ɔyɛ somakorɔ no, odi abodwodeɛ, enti ɔpanyin no nso kyɛɛ no agude. Afei obisaa no sɛ: “Hena ba ne wo? Mesrɛ wo ka kyerɛ me. Yebenya baabi wɔ wo papa fie ada anadwo yi?” Bere a Rebeka kaa n’abusua ho asɛm kyerɛɛ ɔpanyin no, pɛ ani bɛhwɛ, anigye ne dɛn! Ɛbɛyɛ sɛ Rebeka nso ani gyei araa ma ɔkae sɛ: “Yɛwɔ sare ne mmoa aduan pii, na baabi wɔ hɔ a mo nso mobɛda.” Esiane sɛ na ebinom ka ɔpanyin no ho wɔ akwantu no mu nti, bere a Rebeka kae sɛ wɔn nyinaa benya baabi ada no, na wakum no koraa. Afei ababaa no tuu mmirika kɔkaa nea asi no kyerɛɛ ne maame.—Genesis 24:22-28, 32.

Anokwa, wɔtetee Rebeka yiye, enti na onim ahɔhoyɛ, nanso wiase a yɛte mu yi de, ahɔhoyɛ atu ayera. Ɛno nti na ɛsɛ sɛ yesuasua ababaa yamyefo  yi gyidi no. Sɛ yɛwɔ Yehowa Nyankopɔn mu gyidi a, ɛsɛ sɛ yetumi som nkurɔfo hɔho, efisɛ Yehowa yam ye na ɔpɛ sɛ n’asomfo suasua no. Yeyi yɛn yam ma nkurɔfo, na sɛ wɔanyɛ bi antua yɛn ka mpo a, yenim sɛ yɛn soro Agya no ani begye.—Mateo 5:44-46; 1 Petro 4:9.

Hena ne ɔpanyin a ɔkɔtoo Rebeka wɔ abura no ho no? Ɔyɛ Abraham akoa; Abraham nso, na ɔyɛ Rebeka nanabarima nua. Enti akoa no kɔɔ Betuel fie no, na ne de mu araa na wadu no. Ɛbɛyɛ sɛ saa akoa yi, na wɔfrɛ no Elieser. * Okoduu fie hɔ no, wɔmaa no aduan, nanso ɔkae sɛ ɔrennidi gye sɛ wabɔ n’amanneɛ ansa. (Genesis 24:31-33) Ná biribiara kyerɛ sɛ ne Nyankopɔn Yehowa ahyira n’akwantu no so, na wo de pɛ ani kɔhwɛ anigye a ɔde bɔɔ n’amanneɛ. Ɔbɔɔ n’amanneɛ no sɛn?

Hwɛ sɛ Elieser rebɔ n’amanneɛ na Rebeka papa Betuel ne Rebeka nuabarima Laban ayiyi wɔn asom retie! Ɔkyerɛɛ mu sɛ Yehowa ahyira Abraham paa wɔ Kanaan, na sɛnea wahyira no no, ɛnyɛ ano bi ni. Afei nso ɔma wohui sɛ Abraham ne Sara awo, na wɔato no din Isak, na ɔno na Abraham wu a obedi n’ade. Akoa a ɔrebɔ amanneɛ yi, na Abraham ama no ahyɛde bi a ɛho hia sɛ, ɔnkɔ ɔno Abraham abusua mu wɔ Haran nkɔhwehwɛ ɔyere mma ne ba Isak.—Genesis 24:34-38.

Abraham maa Elieser dii nse kaa ntam sɛ ɔrennware Kanaanni bea mma ne ba Isak. Adɛn ntia? Efisɛ na Kanaanfo no nsom Yehowa na na wonni obu ketekete sei mpo mma no. Afei nso na Abraham nim sɛ Yehowa abɔ ne tirim sɛ Kanaanfo bɔne nti ɔbɛsɛe wɔn. Ná Abraham mpɛ sɛ ne dɔba Isak ne Kanaanfo a wɔn bra asɛe no bedi hwebom. Bio nso na onim sɛ Onyankopɔn ahyɛ bɔ bi a ɛnam ne ba no so na ɛbɛbam.—Genesis 15:16; 17:19; 24:2-4.

Elieser san ka kyerɛɛ Rebeka abusuafo no sɛ, oduu abura a ɛwɔ Haran ho no, ɔbɔɔ Yehowa Nyankopɔn mpae sɛ onyi ɔbea mma Isak nware no. Ɔkaa no sɛn? Ɔka kyerɛɛ Onyankopɔn sɛ ɔbea a obeyi no ama Isak no mmra abura no ho. Afei nso sɛ ɔno Elieser srɛ ɔbea no nsu a, ɔmma ɔne ne yoma no nyinaa bi nnom. (Genesis 24:12-14) Hena na ɔbɛyɛɛ nea Elieser kae yi nyinaa? Ɛnyɛ obiara sɛ Rebeka! Sɛ Rebeka tee Elieser amanneɛbɔ yi a, wohwɛ a, ɔtee nka sɛn?

Bere a Betuel ne Laban tee Elieser asɛm no, epusuw wɔn ma wɔkae sɛ: “Asɛm yi fi Yehowa.” Sɛnea wɔn amammerɛ te no wɔhyehyɛɛ aware de Rebeka maa Isak. (Genesis 24:50-54) Wei kyerɛ sɛ na ɛyɛ ɔhyɛ sɛ Rebeka kɔ saa aware no anaa?

Yɛbɛkae a, bere a Abraham maa Elieser kaa ntam no, Elieser bisae sɛ: “Sɛ ɔbea no mpɛ sɛ ɔne me ba nso ɛ?” Abraham maa no mmuae sɛ: “Wobɛde wo ho afi ntam yi ho.” (Genesis 24:39, 41) Nea ɛkɔɔ so wɔ Betuel fie no, na ɛsɛ sɛ ababaa no nso kyerɛ n’adwene. Elieser de, ohui sɛ n’akwantu no akɔ yiye, enti ade kyee no ɔkae sɛ ɔpɛ sɛ ɔde Rebeka kɔ Kanaan saa da no ara. Nanso abusua no de wonyae a anka wɔn ba no tenaa wɔn nkyɛn dadu bi. Esiane sɛ obi nse twurodoo mma toa nti wɔkae sɛ: “Momma yɛmfrɛ ababaa no na yentie nea ɔbɛka.”—Genesis 24:57.

Bere a asɛm no bɛtɔɔ Rebeka anim no, na ato adwinnwen. Dɛn koraa na ɔnka? Ɔmfa nea ne papa ne ne nuabarima aka no nyi ne ho ano na amma wantu kwantenten saa anaa? Anaasɛ ɔmfa no sɛ ɛyɛ hokwan a ɔde bɛboa ama Yehowa apɛde aba mu? Ɛwom sɛ nsakrae no baa prɛko pɛ de, nanso mmuae a ɔde mae no daa no adi sɛ na wasi ne bo sɛ ɔbɛkɔ. Enti nea ɔkae ara ne sɛ: “Mɛkɔ.”—Genesis 24:58.

Anokwa, Rebeka yɛɛ ade! Ebia ɔkwan a yɛfa so ware nnɛ no yɛ soronko, nanso yebetumi asuasua Rebeka. Yehowa Nyankopɔn apɛde a ɔbɛyɛ no, ɛno na na ehia no kyɛn biribiara. Ɛnnɛ nso, yɛrepɛ kunu anaa ɔyere a, yebenya afotu a ɛyɛ papa kyɛn biara wɔ Bible mu. Saa ara nso na obi pɛ sɛ ɔyɛ okunu pa anaa ɔyere pa a, ontumi nkɔ nnyaw Bible no. (2 Korintofo 6:14, 15; Efesofo 5:28-33) Momma yensuasua Rebeka na yɛnyɛ nea Onyankopɔn pɛ nko ara.

Betuel ne ne fiefo hyiraa wɔn dɔba Rebeka. Afei Debora, ɔbea a na ɔhwɛ Rebeka, ne mmaawa foforo sii kwan so ne Elieser ne ne mmarima no kɔe. (Genesis 24:59-61; 35:8) Wosii kwan so no, ankyɛ koraa na wɔn atikɔ dɔɔ mu. Baabi a na wɔrekɔ no, na ɛnyɛ kwan ketewa; na ɛyɛ kilomita 800 (akwansin 500), na na wɔde bɛyɛ nnawɔtwe mmiɛnsa na ebetwa. Wohwɛ akwantu no a, na ɛbɛteetee wɔn paa. Ná Rebeka ahu yoma ahu ahu ara, nanso ɛso tena de yɛrentumi nka sɛ na wakwadare mu. Bible ma yehu sɛ na Rebeka abusua no nyɛ aguadifo a wɔtena yoma so tu kwan, na mmom na wɔyɛ nguanhwɛfo. (Genesis 29:10) Obi a onnim yoma so tena no, sɛ ɔtena bi so kɔ ha ne ha mpo a, ɛyɛ a ɛnna fam.

Nanso, Rebeka deɛ na ɛnyɛ ɛhɔ koraa na na ɔrehwɛ. Ebetumi aba sɛ ɔne Elieser bɔɔ Isak ne n’abusua ho nkɔmmɔ. Wo de fa w’adwene bu sɛ ade asa na wɔreto gya, na ɔpanyin yi reka ɛbɔ a Yehowa ahyɛ N’adamfo Abraham akyerɛ Rebeka. Na ɔreka sɛ Onyankopɔn bɛma aseni bi afi Abraham abusua mu aba, na ɔno na wɔnam no so behyira adesamma nyinaa! Bere a Rebeka tee sɛ Yehowa bɛfa ne kunu Isak so ama ne bɔhyɛ abam, na ɔno nso ka ho bi no, hwɛ sɛnea ɛbɛyɛ no dɛ afa!—Genesis 22:15-18.

Asɛm yi ahyɛase pɛɛ na yɛkae sɛ Rebeka huruw tenaa yoma so de n’ani kyerɛɛ baabi a onnim. Akwantu no de wɔn kɔfaa Negeb asase so, na woduu hɔ no na anim rebiribiri. Rebeka too n’ani no, ohui sɛ ɔbarima bi nenam hɔ. Wohwɛ ɔbarima no a, asɛ obi a ɔredwinnwen. Bible ma yehu sɛ ɛhɔ ara na “ohuruw fii yoma no so sii fam.” Ɛbɛyɛ sɛ wantwɛn amma aboa no ammutuw hɔ mpo na ohuruw sii. Obisaa ɔpanyin a ɔne no nam no sɛ: “Ɔbarima bɛn na ɔnam hɔ rebehyia yɛn yi?” Bere a ɔtee sɛ ɛyɛ Isak pɛ na oyii ntama kataa n’anim. (Genesis 24:62-65) Adɛn ntia? Yebetumi aka sɛ nea ɔyɛe no kyerɛ sɛ obu barima a na ɔrekɔware no no. Ɛnnɛ, sɛ obi yɛ saa a, anhwɛ a nkurɔfo bɛka sɛ n’ani mmuei. Nanso Rebeka ahobrɛase no, mmea ne mmarima nyinaa betumi asua. Yɛreka yi, hena na ɔno de onhia ahobrɛase?

Saa bere no na Isak adi mfe bɛyɛ 40, na na ne maame Sara nso awu ama bɛyɛ mfe mmiɛnsa atwam, nanso na ɔda so ara redi awerɛhow. Enti yebetumi aka sɛ na Isak yɛ obi a ɔwɔ tema na odwen nnipa ho. Yɛahu nso sɛ na Rebeka yɛ ɔbea mmɔdenbɔfo a ne yam ye na ɔbrɛ ne ho ase. Sɛ nnipa mmienu yi ka wɔn dɔ bom a, wohwɛ a na ɛbɛkɔ sɛn? Bible ka no tiawa sɛ: “Ná Isak dɔ no.”—Genesis 24:67; 26:8.

Saa asɛm yi sii no, bɛboro mfe 3,000 ni, nanso yɛkenkan ne ho asɛm a, ɛtɔ yɛn koma so paa. Momma yɛnka, ná Rebeka yɛ mmɔdenbɔfo, ɔwɔ akokoduru, ne yam ye, na na ɔbrɛ ne ho ase! Enti momma yɛn nyinaa, mpanyin ne mmofra, mmarima ne mmea, awarefo ne asigyafo nsuasua Rebeka gyidi no!