Nnipa a wɔwɔ wiase no bebree hia aduan a wobedi ne baabi a wɔbɛda. Nanso wɔn mu bi wɔ hɔ a, nea wohia ara ne sɛ wobenya anidaso sɛ daakye nneɛma bɛyɛ yiye. Sɛ yɛyɛ nea yebetumi biara boa nkurɔfo a wɔte saa a, Onyankopɔn ani bɛsɔ, na obehyira yɛn. Adɛn ntia?

“Nea ɔdom ɔbrɛfo no de fɛm Yehowa, na nea ɔde ama no, Obetua no ka.”—MMEBUSƐM 19:17.

Yesu maa mfatoho bi. Ná ɛfa ɔbarima bi a akorɔmfo werɛmfo tow hyɛɛ no so ho. Wopirapiraa no gyaw no too hɔ sɛ onwu. (Luka 10:29-37) Obi bepuee ɔbarima a na wɔapirapira no no so. Ná onnim no baabiara, nanso ɔfaa no kɔhwɛɛ no. Ɛwom sɛ na ɛsono baabi a wɔn mu biara fi de, nanso ɔboaa no.

Ɔbarima yamyefo yi de aduru guguu ɔbarima a na wɔapirapira no no akuru so, na ɔmaa ne nsa kaa nea ohia biara nso. Wei maa ɛyaw a ɔrefa mu no so tewee.

Dɛn na yebetumi asua afi mfatoho yi mu? Nea na Yesu rekyerɛ yɛn ne sɛ, sɛ yehu sɛ obi hia mmoa a, ɛsɛ sɛ yɛyɛ nea yebetumi biara boa no. (Mmebusɛm 14:31) Kyerɛw Kronkron no ma yehu sɛ ɛrenkyɛ Onyankopɔn betu ohia ase na wayi amanehunu afi hɔ. Nanso ebia yebebisa sɛ, ɔkwan bɛn so na Onyankopɔn beyi ohia ne amanehunu afi hɔ, na bere bɛn na ɔbɛyɛ saa? Nneɛma pa a Ɔbɔadeɛ a ɔdɔ wo no abɔ ne tirim sɛ ɔbɛyɛ ama wo no, yebesusuw bi ho wɔ asɛm a edi hɔ no mu.