WOHWƐ WO HO A, WOWƆ ANIGYE? Sɛ wowɔ anigye a, ɛnde dɛn na ɛma w’ani gye? Ɛyɛ w’abusua, w’adwuma, anaa wo som mu gyidi? Ebia na worehwɛ kwan sɛ biribi bɛma w’ani agye. Ebetumi aba sɛ, sɛ wuwie sukuu, wunya adwuma pa, anaa wotɔ kar foforo a, ɛno na ɛbɛma w’ani agye.

Nnipa pii wɔ hɔ a, wɔn ani gye bere a wɔadu botae bi ho anaa wɔanya nea wɔpɛ. Nanso saa anigye kɛse a wonya no mpofirim no, edi nna sɛn? Mpɛn pii no ɛnkyɛ, na wei tumi bu wɔn abam mpo.

Wɔkyerɛ anigye ase sɛ obi bedi yiye, na yiyedi no atena hɔ akyɛ. Afei yiyedi no betumi ayɛ akomatɔyam kɛkɛ a onipa no wɔ, anaa nea ɛkyɛn saa te sɛ bere a onipa no ani agye aboro so wɔ asetenam. Mpɛn pii no onipa no pɛ sɛ anigye no kɔ so bere nyinaa.

Afei nso, esiane sɛ anigye yɛ yiyedi a ɛtena hɔ kyɛ nti, wɔka sɛ anigye te sɛ akwantu, na ɛnte sɛ woakodu baabi a worekɔ. Sɛ obi ka sɛ, “M’ani begye bere a . . . ” nea ɛkyerɛ ne sɛ ɔretu anigye no ahyɛ da.

Wo de, yɛmfa anigye ntoto apɔwmuden ho. Dɛn na ɛma yenya apɔwmuden pa? Ɛne sɛ yɛbɛhwɛ yɛn adidi yiye, yɛatenetene yɛn apɔw mu, na yɛahwɛ yɛn abrabɔ nyinaa yiye. Saa ara nso na sɛ yɛbɔ bra pa, na yɛde afotu a nyansa wom bɔ yɛn bra a, ɛma yenya anigye.

Afotusɛm anaa ɔbra bɛn na yɛbɔ a ɛbɛma yɛn ani agye? Ɛwom, saa afotusɛm no, ebi ho hia sen bi, nanso nea edidi so yi bɛboa pa ara ama yɛn ani agye:

• MA W’ANI NSƆ NEA WOWƆ NA DA AYAMYE ADI

• MA W’APƆWMUDEN HO NHIA WO, NA MMA W’ABAM MMU

• DA ƆDƆ ADI

• FA BƆNE KYƐ

• NYA ATIRIMPƆW WƆ ASETENAM

• NYA ANIDASO

Bible yɛ nhoma a nkurɔfo bu no pa ara, na ɛka nsɛm a nyansa wom. Ɛka sɛ: “Anigye ne wɔn a wɔn ho nni asɛm, wɔn kwan mu.” (Dwom 119:1) Ɛyɛ ɔkwan bɛn a? Ma yɛnhwɛ.