ANIDASO WƆ HƆ MA ASAASE YI ANAA?
Nsupa
NSU nni asaase so a, anka abɔde biara ntumi ntena so, na sɛ nsupa nni hɔ a, anka asaase so tena bɛyɛ den. Nea ɛwom ne sɛ, ade a ɛdɔɔso paa wɔ abɔde a ɛte nkwa mu nyinaa mu ne nsu. Nsubɔnten, nsutare, nsuwansuwa, ne nsu a ɛwɔ asaase ase ma nnipa ne mmoa nyinaa nya nsu nom, na yenya bi gugu yɛn nnɔbae so.
Asɛm Ato Nsupa
Yɛn asaase yi fã kɛse no ara yɛ nsu. Nanso, Wiase Ahyehyɛde a Ɛhwɛ Wim Tebea Ho Nsɛm So no ka sɛ, “nsu a ɛwɔ asaase so no, wokyɛ mu 200 a, emu 1 pɛ na ɛyɛ nsupa a obi repɛ bi a obenya.” Anka saa nsu no nko ara mpo betumi aso obiara wɔ asaase so, nanso nnipa de nneɛma fĩ resɛe nsu no. Afei nso, nneɛma a yɛde nsu yɛ no adɔɔso aboro so, na wim nsakrae nso ama nsupa ho ayɛ na. Animdefo kyerɛ sɛ, enkosi bɛyɛ mfe 30 no, na nnipa dodow a wɔnnya nsupa a wɔhia no adu ɔpepepem nnum.
Asaase Yi—Wɔyɛe Sɛ Ɛntena Hɔ Daa
Sɛnea asaase no te nti, ɛmma nsu a ɛwɔ so no nsa. Afei, dɔte, afifide ne mmoa a ɛwɔ nsu mu, ne owia hann nyinaa boa ma asaase yi so nsu mu tew. Wo de, hwɛ nneɛma bi a edi adanse sɛ yɛn asaase yi, wɔyɛe sɛ ɛntena hɔ daa.
-
Nhwehwɛmu kyerɛ sɛ, dɔte tumi yi nsu mu fĩ ma emu tew nwann. Wɔabehu sɛ, nsaase a nsu taataa so no, ɛyɛ a na afifide bi wowɔ mu a etumi yiyi nneɛma bi a enye mma nnipa te sɛ nitrogen, phosphorus, ne nnuru a wɔde kum mmoawammoawa.
-
Abenfo ahu sɛ, sɛ nneɛma fĩ kogu nsu mu a, mmoawammoawa ne nneɛma bi a ɛwɔ asaase mu tumi yɛ nsu no mu adwuma ma emu san tew. Nea ɛba ne sɛ, sɛ nsu retene a, ɛnane nneɛma fĩ no, na afei mmoawammoawa bi nso yɛ ho adwuma ma nsu no mu tew.
-
Sɛ nnuru a etumi di awu fra nsu a ɛtene mu a, adɔde a ɛwɔ nsuten mu tumi de nna kakraa bi yɛ ma nsu no san yɛ nsupa. Sɛnea adɔde tumi tew nsu mu no, ɛkyɛn mfiri akɛse a nnipa de sɔn nsu so mpo.
-
Sɛnea asaase te no, etumi fa kwan bi so kora nsu so. Nea ɛkɔ so ne sɛ, nsu tɔ gu asaase so na owia bɔ a, ɛtwe nsu no kɔ soro bio, na asan atɔ, na edi akɔneaba saa ara. Wei ne nneɛma afoforo bi ka bom ma nsu tena asaase yi so a ɛnsa mfi so.
Mmɔden a Nnipa Rebɔ
Sɛ yɛn kar mu oil sosɔ na yɛyɛ no yiye, na yɛanhwie nneɛma a awuduru wom angu basabasa a, yɛboa ma nsu mu tew
Animdefo ka sɛ, bere nyinaa ɛsɛ sɛ yɛhwɛ na yɛansɛe nsu. Nneɛma fĩ a etumi fra nsu ma ɛyɛ fĩ nso, wɔka sɛ ɛsɛ sɛ yɛhwɛ no yiye paa. Enti sɛ yɛn kar mu oil sosɔ a, ɛsɛ sɛ yɛyɛ no yiye; sɛ yɛpɛ sɛ yɛtow nnuru gu a, ɛnsɛ sɛ yɛtow gu tiafi mu sɛ ɛnhohoro nkɔ, na saa ara nso na ɛnsɛ sɛ yehwie nneɛma a awuduru wom gu sink mu.
Mfiridwuma ho animdefo anya akwan soronko a wɔfa so yi nkyene fi ɛpo nsu mu ma ɛyɛ nsupa. Wɔyɛ saa sɛnea ɛbɛyɛ a yebenya nsupa pii.
Nanso ɛno nko ara nnɔɔso. Nkyene a wɔyi fi ɛpo nsu mu ma ɛyɛ nsupa mpo, ɛrentumi mma nnipa nnya nsupa a yehia nyinaa, efisɛ egye sika pii, na anyinam ahoɔden a ehia nso dɔɔso. Afe 2021 no, Amanaman Nkabom no de amanneɛbɔ a ɛfa sɛnea yɛbɛbɔ nsupa ho ban too gua. Ne fã bi kaa sɛ: “Nneɛma a seesei yɛyɛ de bɔ nsupa ho ban wɔ wiase nyinaa no, gye sɛ yenya no saa ara mmɔho mmienu.”
Nea Enti a Anidaso Wɔ Hɔ—Nea Bible Aka
“Onyankopɔn . . . [twe] nsu a ɛsosɔ kɔ soro; ɔma ɛdan ɛbɔ, na ɛdan bɛyɛ osu a ɛtɔ; afei omununkum hwie osu no gu fam; na ɛtɔ gu nnipa so.”—Hiob 36:26-28.
Onyankopɔn bɔɔ asaase no wɔ kwan bi so a ɛno ara tumi bɔ nsu a ɛwɔ asaase so no ho ban.—Ɔsɛnkafo 1:7.
Susuw wei ho hwɛ: Sɛ Ɔbɔadeɛ no bɔɔ asaase no wɔ ɔkwan bi so a ɛno ara tumi ma nsu mu tew a, wunnye nni sɛ ɔhaw a nnipa de aba a ɛma nsupa ho yɛ den no, ɔpɛ sɛ oyi fi hɔ, na obetumi ayɛ nso? Hwɛ asɛm a yɛato din, “Onyankopɔn Ahyɛ Bɔ Sɛ Asaase Yi Bɛtena Hɔ Daa” wɔ kratafa 15.
