Wɔwoo Alhazen bɛyɛ afe 965 Y.B wɔ kurow bi a yɛfrɛ no Basra mu. Seesei Basra wɔ Iraq. Nea na n’ani gye ho no, ebi ne nsoromma mu hwɛ, adufra, nkontaabu, nnuruyɛ, nnwom, aniwa ne hann ho nimdeɛ, abɔde a aniwa hu ho nimdeɛ, ne anwensɛm. Dɛn paa na Alhazen yɛe a ɛsɛ sɛ yɛkyerɛ ho anisɔ?

Nnipa bebree ate Alhazen ho asɛm dedaadaw. Ɔyɛɛ n’adwene sɛ, sɛnea Nile Asubɔnten no sen no, ɔbɛbrɛ no ase. Bɛyɛ mfe 1,000 akyi ansa na wɔreyɛ saa adwuma no wɔ Aswân, afe 1902 mu.

Abakɔsɛm kyerɛ sɛ, sɛnea na nsu no yiri na ɛyow wɔ Egypt no, na Alhazen pɛ sɛ ɔtew so. Enti ɔyɛɛ n’adwene sɛ, obesi ban wɔ Nile no mu. Bere a Cairo hene Caliph al-Hakim tee saa asɛm no, ɔtoo nsa frɛɛ Alhazen baa Egypt sɛ ommesi ban no. Nanso, bere a Alhazen de ɔno ankasa ani huu asubɔnten no, ohuu sɛ adwuma no sõ kyɛn no. Ná Alhazen nim sɛ ɔhene no yɛ otirimɔdenfo, na na osuro sɛ ɔbɛtwe n’aso. Enti ɔhyɛɛ da yɛɛ ne ho sɛ wabɔ dam ma wɔde no kɔtoo baabi. Ɔhyɛɛ hɔ mfe 11 kosii sɛ ɔhene no wui wɔ afe 1021 mu. Mfe 11 no mu no, Alhazen nyaa bere pii de yɛɛ nneɛma foforo bi a esi n’ani so.

Bere a woyii Alhazen fii atenae hɔ no, na aka kakra ama wɔakyerɛw Ani ne Hann Ho Nhoma (Book of Optics) no awie. Nhoma no wɔ afã nson, na wobu no sɛ “nhoma atitiriw a ɛka abɔde a aniwa hu ho nimdeɛ no, ɛyɛ emu baako.” Wohwɛ nhoma no mu a, wubehu sɛ ɔyɛɛ nhwehwɛmu huu sɛnea hann te, sɛnea emu tumi kyekyɛ yɛ kɔla ahorow, sɛnea ɛtɔ ahwehwɛ so a ɛyɛ, ne sɛnea ɛfa biribi mu a ɛyɛ. Sɛnea aniwa no te ne sɛnea ɛyɛ adwuma no nso, osuaa ho ade.

 Ebeduu afeha a ɛto so 13 no, na wɔakyerɛ Alhazen nhoma no ase afi Arabic akɔ Latin mu. Ɛno akyi no, mfe bebree a edii hɔ no, sɛ Europe nhomanimfo rekasa a, wɔtwe adwene si ne nhoma no so. Bere a Alhazen yɛɛ biribi a ɛte sɛ ahwehwɛ ho adwuma no, ɔkyerɛw biribi too hɔ. Ɛno na wɔn a wɔyɛ ahwehwɛniwa ho adwuma wɔ Europe no gyinaa so de yɛɛ mfiri a wɔde hwɛ ade nketenkete ne nea ɛwɔ akyirikyiri.

Alhazen yɛɛ biribi a ɛte sɛ mfoninitwa afiri a edi kan. Ɛma ohuu sɛnea mfoninitwa yɛ adwuma. Nea ɔyɛe ne sɛ, otuu tokuru ketewaa bi wɔ ɔdan bi a esum wom ho. Afei hann fi abɔnten faa tokuru no mu bɛtɔɔ ban ho wɔ dan no mu. Biribiara a hann no tɔɔ so wɔ abɔnten no, ɛho mfonini bɛtɔɔ ban no ho wɔ dan no mu a asi ne ti ase.

Afe 1800 mu no, wɔde foto nnade hyehyɛɛ mfoninitwa afiri no mu sɛnea ɛbɛyɛ a wotwa mfonini no a, ɛbɛka so. Dɛn na efii mu bae? Ɛno na ama yɛanya kamera no. Nea Alhazen gyinaa so yɛɛ ne mfoninitwa afiri no, ɛnnɛ abɛɛfo mfoninitwa mfiri nso de yɛ adwuma. Saa ara na aniwa no nso te. *

Ade baako a ɛma Alhazen adwuma da nsow ne sɛ, na ɔtɔ ne bo ase yɛ nhwehwɛmu wɔ sɛnea abɔde yɛ adwuma no mu. Saa bere no, na nkurɔfo ntaa nyɛ saa. Nhwehwɛmufo a wodii kan sɔɔ nea wohui hwɛe no, ɔka ho bi. Afei nso, sɛ ohu sɛ wɔagye biribi atom, nanso adanse biara nni ho a, onsuro sɛ obebisa ho asɛm.

Sɛnea nnansa yi nyansahufo yɛ adwuma no, ɛte sɛ nea wɔka sɛ: “Nea wususuw no, yɛ ma yɛnhwɛ!” Ebinom ka Alhazen ho asɛm sɛ, “sɛnea ɛnnɛ nyansahu yɛ adwuma no, ɔno na ɔyɛ n’agya.” Eyi nti nea wayɛ yi, ehia sɛ yɛkyerɛ ho anisɔ.