Harmagedon​—Ebinom Se Ɛyɛ Dɛn?

“Na wɔboaboaa wɔn ano wɔ baabi a wɔfrɛ hɔ Hebri mu sɛ Harmagedon.”—ADIYISƐM 16:16, English Standard Version.

SƐ WOTE “Harmagedon” a, dɛn na ɛba w’adwene mu? Ebia nea ɛbɛba wo tirim ntɛm ne atoyerɛnkyɛm kɛse bi. “Harmagedon” pue biako pɛ wɔ Bible mu nanso nsɛm ho amanneɛbɔfo ne nyamesom mpanyimfo taa ka ho asɛm.

Sɛnea nkurɔfo kyerɛkyerɛ Harmagedon mu no, saa na Bible nso kyerɛkyerɛ mu anaa? Ehia sɛ yehu mmuae no. Adɛn ntia? Efisɛ sɛ wote Harmagedon ase yiye a, ebetumi ayi ehu afi wo mu; wubehu sɛ anigye bi da yɛn anim daakye, na afei nso wubenya Onyankopɔn ho adwempa.

Ma yensusuw nsɛmmisa abiɛsa a edidi so yi ho, na yɛmfa adwene a nkurɔfo kura wɔ Harmagedon ho no ntoto nea Bible kyerɛkyerɛ ankasa ho.

  1. NNIPA NNEYƐE NA ƐDE HARMAGEDON BƐBA ANAA?

Sɛ nnipa ma nsɛm a ɛyɛ hu sisi a, nsɛnkyerɛwfo ne nhwehwɛmufo taa frɛ no “Harmagedon.” Sɛ yɛbɛyɛ nhwɛso a, wɔfrɛ Wiase Ko I ne Wiase Ko II nyinaa sɛ Harmagedon. Saa akodi no akyi no, na nnipa pii suro sɛ United States ne Soviet Union bɛtoto akode a ɛhyew aman de adi wɔn ho awu. Nsɛm ho amanneɛbɔfo kyerɛ sɛ, sɛ wɔtotoo akode a ɛhyew aman yi a, anka ɛde “Harmagedon” bɛba. Ɛnnɛ nso, nhwehwɛmufo bi suro sɛ, sɛnea wɔresɛe nsu ne mframa wɔ asase so no betumi asesa wim tebea koraa ama akowie “Harmagedon.”

Nea wɔreka no, nea ɛkyerɛ ni: Sɛ asase ne ɛso nnipa ne mmoa nyinaa bɛkɔ so atena hɔ a, ɛwɔ adesamma nsam. Sɛ wiase atumfoɔ amfa nyansa anyɛ adwuma a, asase no bɛsɛe koraa.

Nea Bible kyerɛkyerɛ ni: Onyankopɔn renhwɛ mma nnipa nsɛe asase no. Bible ma yɛte ase sɛ Yehowa * ‘ammɔ asase no hunu.’ Mmom ɔbɔe sɛ “wɔntena so.” (Yesaia 45:18) Onyankopɔn remma nnipa kwan mma wɔnsɛe asase no korakora, na mmom ɔbɛsɛe “wɔn a wɔresɛe asase no.”—Adiyisɛm 11:18.

2. HARMAGEDON YƐ ATOYERƐNKYƐM ANAA?

Sɛ atoyerɛnkyɛm kɛse bi si a, ɛtɔ mmere bi a nsɛnkyerɛwfo frɛ no “Harmagedon.” Sɛ nhwɛso no, afe 2010 mu no, amanneɛbɔ bi kae sɛ “‘Harmagedon’ asi Haiti.” Ná saa amanneɛbɔ no reka sɛnea asasewosow kɛse a ɛbaa ɔman no mu no asɛe nneɛma, akunkum nnipa, na ɛde amanehunu pii aba no. Ɛnyɛ nsɛm a asisi atwam nko na nsɛm ho amanneɛbɔfo ne wɔn a wɔyɛ sini frɛ no Harmagedon, na mmom wɔde frɛ nsɛm a wosuro sɛ ebesisi daakye nso. Ɛho nhwɛso ne sɛ, wosusuw sɛ nsoromma bi betumi atew abɛhwe asase so, na wɔfrɛ atoyerɛnkyɛm a ɛde bɛba no “Harmagedon.”

Nea wɔreka no, nea ɛkyerɛ ni: Harmagedon yɛ biribi a ɛbɛba abɛbom prɛko pɛ akunkum nnipa basabasa. Obiara ntumi nyɛ biribiara mfa mmɔ ne ho ban.

Nea Bible kyerɛkyerɛ ni: Harmagedon nyɛ ade a ebekunkum nnipa kɛkɛ; abɔnefo nkutoo na ɛbɛsɛe wɔn. Bible hyɛ bɔ sɛ aka kakra bi na “ɔdebɔneyɛfo nni hɔ bio; na wohwehwɛ ne tenabea a, na onni hɔ.”—Dwom 37:10.

3. SƐ HARMAGEDON BA A, ONYANKOPƆN BƐSƐE ASASE ANAA?

Nyamesomfo pii gye di sɛ bere bi bɛba a papa ne bɔne de besi ani ama asase yi asɛe. Nhwehwɛmufo bi a wɔwɔ United States bisabisaa mpanyimfo bi nsɛm, na sɛ woyi wɔn mu baanum biara a, emu baanu kae sɛ wogye di sɛ “Harmagedon ko bi” na ɛde wiase awiei bɛba.

Nea wɔreka no, nea ɛkyerɛ ni: Onyankopɔn ammɔ nnipa sɛ wɔmmɛtena asase so daa, na wammɔ asase nso sɛ ɛntena hɔ daa.  Adwene a Onyankopɔn de bɔɔ nnipa ne sɛ bere bi bɛba ama wɔn nyinaa awuwu afi asase so.

Nea Bible kyerɛkyerɛ ni: Bible ka no pefee sɛ Onyankopɔn de “asase atim ne nnyinaso so; na ɛrenhinhim da biara da.” (Dwom 104:5) Asɛm a Bible aka afa asase so nnipa ho ne sɛ: “Treneefo benya asase no adi, na wɔatena so daapem.”—Dwom 37:29.

Ɛda adi pefee sɛ adwene a nnipa pii kura wɔ Harmagedon ho no ne nea ɛwɔ Bible mu no nhyia. Ɛnde, dɛn ne Harmagedon ho nokwasɛm?

[Ase hɔ asɛm]