NEA ENTI A EBINOM NNYE NNI: Wɔn a wogye Onyankopɔn di no mu pii hu no sɛ obi a wobɛn no a ɛnyɛ yiye. Christina yɛ Irelandni bea a na ɔkɔ asɔre paa. Ɔkaa sɛ: “Nea na minim ara ne sɛ Onyankopɔn na ɔbɔɔ ade nyinaa, nanso na minnim no. Da koro mpo nni hɔ a metee nka sɛ ɔbɛn me.”

NEA ONYANKOPƆN ASƐM KA: Sɛ yenhu nea yɛnyɛ mpo a, Yehowa kɔ so boa yɛn. Yesu maa ho mfatoho de kyerɛɛ sɛnea Onyankopɔn dwen yɛn ho. Ɔkaa sɛ: “Sɛ obi wɔ nguan ɔha na emu biako yera a, so ɔrennyaw aduɔkron akron no wɔ bepɔw so nkɔhwehwɛ nea wayera no?” Dɛn na na mfatoho no kyerɛ? Ɔkyerɛɛ mu sɛ: “Saa ara nso na m’Agya a ɔwɔ soro no ani nnye ho sɛ nkumaa yi mu biako bɛyera.”—Mateo 18:12-14.

“Nkumaa yi mu” biara ho hia Onyankopɔn. Sɛ wɔn mu bi yera a, ɔkwan bɛn na Onyankopɔn fa so hwehwɛ “nea wayera no”? Kyerɛwnsɛm a yɛde fii asɛm yi ase no kaa sɛ Yehowa twe nkurɔfo ba ne nkyɛn.

Susuw sɛnea Onyankopɔn ankasa tuu anammɔn twee nnipa a wɔhwehwɛ n’akyi kwan no baa ne nkyɛn. Asomafo no bere so no, na Etiopiani piani bi rekenkan Bible nkɔmhyɛ bi, nanso na ɔnte ase. Enti Onyankopɔn somaa Kristo suani Filipo sɛ onkohyia no na ɔnkyerɛkyerɛ mu nkyerɛ no. (Asomafo Nnwuma 8:26-39) Akyiri yi, Onyankopɔn maa ɔsomafo Petro kɔɔ Roma asraafodɔm panyin Kornelio fie. Ná Kornelio yɛ obi a ɔbɔ mmɔden sɛ ɔbɛsom Onyankopɔn, na na ɔbɔ mpae daa. (Asomafo Nnwuma 10:1-48) Ɔsomafo Paulo ne n’ahokafo nso, Onyankopɔn kyerɛɛ wɔn kwan kɔɔ asubɔnten bi ho. Ná asubɔnten no wɔ kurow a wɔfrɛ no Filipi akyi. Wɔkɔɔ hɔ no, wɔkɔtoo Lidia a “na ɔsom Onyankopɔn,” na “Yehowa buee ne koma mu fann ma ɔyɛɛ asõ.”—Asomafo Nnwuma 16:9-15.

Nhwɛso yi nyinaa mu no, Yehowa hwɛ maa wɔn a wɔrehwehwɛ no no huu no. Ɛnnɛ, henanom na wɔde Bible kyerɛkyerɛ nkurɔfo Onyankopɔn ho asɛm wɔ wɔn afie mu ne mmɔnten so? Wubisa nnipa pii a, wɔbɛka sɛ, “Ɛyɛ Yehowa Adansefo.” Bisa wo ho sɛ, ‘Ebetumi aba sɛ me nso, Onyankopɔn pɛ sɛ ɔfa wɔn so ma mebɛyɛ n’adamfo anaa?’ Yɛsrɛ wo, bɔ Onyankopɔn mpae sɛ ɔmmoa wo na woatumi abɛn no. *