“Yehowa Nyankopɔn de onipa no kɔtenaa Eden turom sɛ ɔnnɔ hɔ na ɔnhwɛ hɔ. Na Yehowa Nyankopɔn de ahyɛdeɛ yi nso maa onipa sɛ: ‘Turom ha nnua nyinaa, di bi. Na papa ne bɔne ho nimdeɛ dua no deɛ, nni bi, ɛfiri sɛ da a wobɛdi bie no, owuo na wobɛwuo.’”—Genesis 2:15-17.

Onyankopɔn de onipa a ɔdi kan a ɔne Adam kɔtenaa Eden turo mu. Ná ɛhɔ yɛ paradise asase a mmoa pii ne afifide a ɛyɛ fɛ ahyɛ so ma. Ná nua pii wɔ hɔ a ɛsow aba a Adam bɛtumi adi bi. Nanso, Yehowa Nyankopɔn ka kyerɛɛ Adam pefee sɛ, dua baako bi aba deɛ mma ɔnni, na ɔbɔɔ Adam kɔkɔ sɛ sɛ ɔdi bi a ɔbɛwu.

Adam tee saa ahyɛde anaa mmara no ase? Ná ɔnim sɛnea owuo te, efisɛ na mmoa no wu ma ohu. Sɛ Onyankopɔn bɔɔ Adam sɛ ɔnwu a, anka ntease biara nni ahyɛde a ɔde maa no no mu. Nanso Adam huu sɛ, sɛ ɔtie Onyankopɔn na wanni dua no aba no bi a, ɔbɛkɔ so atena ase daa; ɔrenwu!

Ebinom gye di sɛ na dua no gyina hɔ ma ɔbaa ne ɔbarima nna, nanso ɛnte saa. Efisɛ, na Yehowa pɛ sɛ Adam ne ne yere Hawa ‘wo na wɔdɔɔso na wɔhyɛ asase so mã na wɔdi so.’ (Genesis 1:28) Dua a Yehowa kaa sɛ mma wɔnni no, na ɛyɛ dua ankasa. Yehowa frɛɛ dua no “papa ne bɔne ho nimdeɛ dua,” efisɛ na ɛyɛ sɛnkyerɛnne a ɛkyerɛ sɛ ɔno na ɛsɛ sɛ ɔkyerɛ nnipa nea ɛyɛ ne nea ɛnyɛ. Sɛ Adam anni dua no aba no bi a, anka ɛbɛkyerɛ sɛ ɔyɛ osetie, na n’ani sɔ nneɛma pa pii a ne Bɔfo no ayɛ ama no no nyinaa.

“[Onyankopɔn ka] kyerɛɛ Adam sɛ: ‘Ɛsiane sɛ . . . woadi dua a mehyɛɛ wo sɛ ‘nni bie’ no nti, . . . w’anim fifire mu na wobɛdidie akɔsi sɛ wobɛsan akɔ dɔteɛ mu, ɛfiri sɛ emu na wɔyii wo firiiɛ. Woyɛ dɔteɛ na dɔteɛ mu na wobɛsan akorɔ.’”—Genesis 3:17, 19.

Adam dii dua a wɔhyɛɛ no sɛ mma ɔnni no. Ná ɛyɛ asoɔden a ɛyɛ aniberesɛm. Enti nea ɔyɛe no yɛ atuatew; ɔhyɛɛ da buu n’ani guu adepa a na Yehowa ayɛ ama no no nyinaa so. Aduaba a Adam dii no kyerɛɛ sɛ wapo Yehowa, na wapaw sɛ ɔbɛyɛ nea ɔno ankasa pɛ, na na ɛde nsunsuanso bɔne pii na ɛbɛba.

Asɛm a Yehowa kae no baa mu pɛpɛɛpɛ; Adam wui. Onyankopɔn de “fam dɔteɛ” na ɛbɔɔ Adam, na ɔka kyerɛɛ no sɛ, ‘ɔbɛsan akɔ dɔteɛ mu.’ Bere a Adam wui no, wannya nipadua foforo biara, na saa ara nso na wankɔtena baabi foforo. Ɔwuiɛ no, ɔbɛyɛɛ sɛ dɔteɛ a nkwa nnim a wɔyii no fii mu no.—Genesis 2:7; Ɔsɛnkafoɔ 9:5, 10.

“Ɛnam onipa baako so na bɔne baa wiase, na owuo nam bɔne so baeɛ, maa owuo trɛ kaa nnipa nyinaa, ɛfiri sɛ wɔn nyinaa ayɛ bɔne.”—Romafoɔ 5:12.

Asoɔden anaa bɔne a Adam yɛe no kɔfaa ɔhaw bebree bae. Ɛnyɛ mfe 70 anaa 80 bi kɛkɛ na Adam hweree, na mmom ɔhweree daa nkwa a anka ɔbɛnya no. Afei nso, bere a Adam yɛɛ bɔne no, ɛmaa no tɔɔ sin, na ɔde saa sintɔ no awo n’asefo nyinaa.

Yɛn nyinaa yɛ Adam asefo. Ɛno nti, wɔwoo yɛn wɔ sintɔ mu, enti yɛtumi yɛ bɔne na awiei koraa no yɛwu. Paulo kyerɛkyerɛɛ tebea a yɛaba mu no mu fann. Ɔkaa sɛ: “Meyɛ honam muni a wɔatɔn me ahyɛ bɔne aseɛ. M’asɛm yɛ mmɔbɔ! Hwan na ɔbɛgye me afiri nipadua a ɛrekɔ owuo mu yi mu?” Paulo buaa n’asɛmmisa no sɛ: “Aseda mfa yɛn Awurade Yesu Kristo so nka Onyankopɔn!”—Romafoɔ 7:14, 24, 25.

“Agya no asoma ne Ba no sɛ wiase Agyenkwa.”—1 Yohane 4:14.

Yehowa Nyankopɔn yɛɛ nhyehyɛe a ɔnam so bɛyi nea bɔne de aba no afi hɔ, na wagye yɛn afi owuo afobuo ase. Dɛn na ɔyɛe? Ɔsomaa ne Ba a ɔdɔ no no fii soro maa wɔwoo no sɛ onipa a ɔyɛ pɛ te sɛ Adam. Nanso, Yesu deɛ “wanyɛ bɔne biara” te sɛ Adam. (1 Petro 2:22) Esiane sɛ na Yesu yɛ pɛ nti, wamma owuo afobuo ase, na na ɔbɛtumi atena ase daa sɛ onipa a ɔyɛ pɛ.

Yehowa maa kwan maa Yesu atamfo kum no. Nanso nnansa akyi no, Yehowa nyanee no na ɔmaa no honhom nipadua a ɛbɛma watumi asan akɔ soro. Bere a Yesu kɔɔ soro no, Onyankopɔn gyee nea Yesu de ne nkwa yɛ de gyee adasamma no toom na ama wɔn nsa aka nea Adam ne n’asefo nyinaa hweree no. Esiane sɛ Yehowa gyee saa afɔrebɔ no toom nti, obiara a ɔbɛkyerɛ Yesu mu gyidi no bɛtumi anya daa nkwa.—Romafoɔ 3:23, 24; 1 Yohane 2:2.

Nea Yesu yɛe no maa yɛn nsa kaa nea Adam hweree no. Owu maa yɛn na ama yɛatumi atena ase daa. Bible ka sɛ, ‘Yesu wuo amanehunu nti, ɔnam Onyankopɔn adom so aka owuo ahwɛ ama onipa biara.’—Hebrifoɔ 2:9.

Saa nhyehyɛe a Yehowa yɛe no ma yɛhunu no yie. N’atɛntrenee nti, na nnipa a wɔtɔ sin rentumi nnye wɔn ho mma ɛnyɛ yie. Nanso, ne dɔ ne ne mmɔborɔhunu ma ɔdii atɛntrenee ho mmara a ɔno ara ahyehyɛ no so, na ɛma ɔhweree ade kɛse; ɔde ɔno ankasa ne Ba mae de tuaa agyede no ho ka.—Romafoɔ 5:6-8.

“Wɔanyane Kristo afiri awufoɔ mu sɛ wɔn a wɔadeda owuo mu no aba a ɛdi kan. Na sɛdeɛ ɛnam onipa so na owuo baeɛ no, saa ara na ɛnam onipa so na owusɔreɛ nso baeɛ. Na sɛdeɛ obiara rewu wɔ Adam mu no, saa ara na wɔbɛma obiara anya nkwa wɔ Kristo mu.”—1 Korintofoɔ 15:20-22.

Yɛnim sɛ Yesu baa asase so, na ɔwuiɛ, nanso dɛn paa na yɛbɛtumi agyina so aka sɛ wɔnyanee no fii awufo mu? Adanse baako a edi mu ne sɛ, bere a wɔnyanee Yesu no, mpɛn pii na ɔyii ne ho adi kyerɛɛ nnipa bebree wɔ mmeae ahorow. Ɛda bi, ɔyii ne ho adi kyerɛɛ nnipa bɛboro 500. Ɔsomafo Paulo kaa wei ho asɛm wɔ ne krataa a ɔkyerɛw kɔmaa Korintofoɔ no mu. Ɔkyerɛɛ sɛ na wɔn a wɔhunuu Yesu no mu bi te ase, na na wɔbɛtumi adi nea wɔahunu ne nea wɔate no ho adanse.—1 Korintofoɔ 15:3-8.

Ɛno nti, bere a Paulo kaa sɛ Kristo yɛ wɔn a wɔanyane wɔn afi awufo mu “aba a ɛdi kan” no, na ɔrekyerɛ sɛ akyiri yi afoforo nso bɛsɔre aba nkwa mu. Yesu ankasa kaa sɛ, bere bi bɛba a “wɔn a wɔwɔ nkaeɛ ada mu nyinaa” bɛsɔre “na wɔafiri adi.”—Yohane 5:28, 29.

“Onyankopɔn dɔ wiase paa ma enti ɔde ne Ba a ɔwoo no korɔ no maeɛ, na obiara a ɔkyerɛ ne mu gyidie no ansɛe na mmom wanya daa nkwa.”—Yohane 3:16.

Bible mu nwoma a edi kan no ka nea ɛyɛe a owuo bae na Paradise yerae ho asɛm. Nwoma a ɛtwa to wɔ Bible mu no nso ka sɛnea Onyankopɔn bɛyi owuo afi hɔ na wasan de Paradise aba asase so bio ho asɛm. Saa bere no, nnipa bɛtena ase daa ama wɔn ani agye. Adiyisɛm 21:4 ka sɛ: “Owuo nni hɔ bio.” Nea ɛbɛma yɛahu sɛ saa asɛm yi yɛ nokorɛ no, nkyekyɛm 5 no ka sɛ: “Nsɛm yi wom, na ɛyɛ nokorɛ.” Sɛ Yehowa hyɛ bɔ biara a, ɔhwɛ ma ɛba mu.

Wogye di sɛ “nsɛm yi wom, na ɛyɛ nokorɛ”? Sɛ wogye di a, ɛnde sua Yesu Kristo ho nsɛm pii na kyerɛ ne mu gyidi. Sɛ woyɛ saa a, wobɛnya Yehowa anim dom. Wobɛsan anya nhyira pii nnɛ, na wobɛnya anidaso sɛ wobɛtena ase daa wɔ Paradise asase so. Ɛhɔ deɛ, “owuo nni hɔ bio, na awerɛhoɔ ne esũ ne yea nso nni hɔ bio.”