“E mea ora hoi te parau a te Atua e te puai rahi, e mea oi aˈe i te mau ˈoˈe ua oi na pae e piti. E ô te reira i roto roa i te taata, a taa ê atu ai to ˈna rapaeauraa e to ˈna rotoraa, e te mau puoiraa ivi e te puo ivi, e e faaite mai te reira i te mau manaˈo e opuaraa o te aau.”—Hebera 4:12, Huriraa o te ao api.

 Te poroi a te Atua no te huitaata, tei papaihia i roto i te Bibilia, e mana to te reira no te faaite i to tatou mau manaˈo hohonu e to tatou mau manaˈo turai. E nehenehe atoa tera poroi e taui i te taata no te riro mai ei taata maitai.

 “E mea ora.” I ǒ nei “te parau a te Atua,” o ta te Atua ïa i fafau aore ra i opua mai tei papaihia i roto i te Bibilia. a Te tahi tuhaa faufaa o tera opuaraa, ia ora ïa te feia e auraro i te Atua e a muri noa ˈtu i nia i te fenua nei i roto i te hau e te tahoê.—Genese 1:28; Salamo 37:29; Apokalupo 21:3, 4.

 No te aha e parauhia ˈi “mea ora” te parau a te Atua aore ra ta ˈna opuaraa? Te tahi tumu, e nehenehe te aau o te taata e putapû roa e e faatupu i te faaroo i roto i te reira a fanaˈo atu ai ratou i te hoê tiaturiraa papu i roto i te oraraa. (Deuteronomi 30:14; 32:47) Te tahi atu tumu e mea ora te parau a te Atua, no te mea ïa te ohipa noa ra te Atua no te faatupu hope roa i ta ˈna mau parau fafau. (Ioane 5:17) E ere te Atua mai te taata o te fafau i te tahi mea a moˈe atu ai ia ˈna i te reira aore ra eita ta ˈna e nehenehe e faatupu i te reira. (Numera 23:19) Eita ta ˈna parau “e hoˈi faufaa ore noa mai [ia ˈna].”—Isaia 55:10, 11.

 “E mea puai rahi.” I ǒ nei, te parau “puai rahi” e nehenehe atoa e hurihia “e mana rahi,” “e ohipa” aore ra “e faatupu i te mau mea atoa [ta teie parau] i opua e faatupu.” No reira, te mau mea atoa ta Iehova b e faahiti aore ra e fafau, e tupu iho â te reira. (Salamo 135:6; Isaia 46:10) Te auraa, e nehenehe te Atua e faatupu i ta ˈna mau parau fafau hau ê roa ˈtu i ta tatou e manaˈo.—Ephesia 3:20. c

 Mea puai rahi atoa te parau a te Atua, no te mea e nehenehe te reira e tauturu i te feia o te haafaufaa i te parau a te Atua ia rave i te mau tauiraa o te haamaitai i to ratou oraraa e to ratou huru. E vaiiho ratou i te mau haapiiraa a te Atua ia ohipa i nia i to ratou feruriraa, to ratou huru oraraa e ta ratou mau fa. (Roma 12:2; Ephesia 4:24) Mea tano ïa ia parau, te ohipa atoa ra te parau a te Atua i roto i te feia o te faatupu i te faaroo i roto i te reira.—Tesalonia 1, 2:13.

 “E mea oi aˈe i te mau ˈoˈe ua oi na pae e piti.” Ei auraa parau, mea oi aˈe te parau a te Atua i te tahi noa ˈˈe ˈoˈe hamanihia e te rima taata. E nehenehe te poroi a te Atua e haaputapû i te aau, oia hoi te taata o roto. Eita te reira e nehenehe e faaauhia i ta te hoê haapiiraa no ǒ mai i te taata e nehenehe e faatupu. O ta te mau parau ïa i muri iho e haapapu ra.

 “E ô . . . i roto roa i te taata, a taa ê atu ai to ˈna rapaeauraa e to ˈna rotoraa, e te mau puoiraa ivi e te puo ivi.” Ei auraa parau, e ô roa “te parau a te Atua” i roto i “te puo ivi,” oia hoi to tatou mau manaˈo e huru o roto roa. (Galatia 6:18) Ma te faaite i te rotoraa, i reira eita e noaa i te taata ia ite, e nehenehe te mau haapiiraa a Iehova e turai ia tatou ia rave i te mau tauiraa maitai o te faaoaoa eiaha noa ia tatou, i to tatou atoa râ Atua poiete.

 “E faaite mai . . . i te mau manaˈo e opuaraa o te aau.” E nehenehe te huru o te hoê taata i mua i te parau a te Atua e faaite i to ˈna mau manaˈo e tae noa ˈtu i te mau opuaraa a to ˈna aau aore ra i to ˈna mau manaˈo turai o te ohipa hoi i nia i to ˈna haerea. Ei hiˈoraa, ia farii maitai te tahi i te parau a te Atua ma te rave i te mau tauiraa e titauhia i roto i to ˈna oraraa, te faaite ra oia e taata haehaa o ˈna e te haavare ore e te hinaaro ra o ˈna e faaoaoa i to ˈna ra Atua poiete. Area no te taata o te faahapahapa noa i te parau a te Atua, te faaite mai ra paha te reira e huru ino to ˈna e e taata teoteo paha oia aore ra o te haapao noa i to ˈna hinaaro. Peneiaˈe te imi ra oia i te otoheraa no te hoê haerea ta te Atua e ore e farii.—Ieremia 17:9; Roma 1:24-27.

 Te na ô ra te tahi buka, e nehenehe te parau a te Atua “e ite i te mau tuhaa hohonu roa ˈˈe o to tatou huru.” Aita e mea o te rotoraa o te hoê taata ta te Atua e ore e nehenehe e ite e ta te parau a te Atua e ore e nehenehe e faaite. Te na ô ra te Hebera 4:13: “Mea mahora te mau mea atoa e te ite-maitai-hia e ana, ia ˈna hoi tatou e faˈi ai i ta tatou i rave.”

 Ua papaihia te buka Hebera e te aposetolo Paulo i te area matahiti 61. E rata teie tei papaihia i raro aˈe i te aratairaa a te varua moˈa o te Atua i te mau Kerisetiano ati Iuda e ora ra i Ierusalema e Iudea.

 I roto i te pene 3 e te 4, te haamahitihiti ra Paulo mea nafea te hiˈoraa o te mau Iseraela i te riroraa ei faaararaa no te mau Kerisetiano. (Hebera 3:8-12; 4:11) Ua fafau Iehova e faaora oia i te nunaa Iseraela i te faatîtîraa e e fatu ratou i te hoê fenua i reira ratou e parahi ai “ma te taiâ ore.” (Deuteronomi 12:9, 10) Tera râ, aita te uˈi o Iseraela tei faarue ia Aiphiti i faatupu i te faaroo i roto i te mau parau fafau a te Atua e ua tamau noa ratou i te faaroo ore i ta ˈna mau ture. Ei faahopearaa, aita ratou i ô i “roto i [to te Atua] faafaaearaa,” aita faahou to ratou e auhoaraa piri e te Atua e ua pohe ratou i roto i te medebara. Ua fatu to ratou huaai i te Fenua tǎpǔhia, ua haamata atoa râ i te faaroo ore ia Iehova. I muri mai, ua mauiui rahi te nunaa no te reira.—Nehemia 9:29, 30; Salamo 95:9-11; Luka 13:34, 35.

 Te faataa ra Paulo e titauhia i te mau Kerisetiano ia huti mai i te haapiiraa i te hiˈoraa ino o te mau Iseraela tei taiva i te Atua. No tatou nei, e nehenehe tatou e ô i roto i te faafaaearaa o te Atua ma te auraro i ta ˈna parau e ma te faatupu i te faaroo papu i roto i ta ˈna mau parau fafau.—Hebera 4:1-3, 11.

 A mataitai i teie video poto o te faaite mai i te tahi mau tuhaa o te buka Hebera.