“O vau o Iehova. O to ˈu iˈoa tera. E ore au e horoa i to ˈu hanahana no vetahi ê, E ta ˈu arueraa no te mau tii nanaˈohia.”—Isaia 42:8, Huriraa o te ao apî.

 “O vau, o te Fatu, o toˈu ïa ioa; e ore au e horoa i toˈu hanahana ia vetahi è, e i taˈu haamaitairaa i te mau hohoa tarai hia.”—Isaia 42:8, Te Bibilia Moˈa V.C.J.S. (1988).

 Te faaite mai ra te Atua i to ˈna iˈoa e te parau ra eita o ˈna e horoa i to ˈna hanahana e ta ˈna arueraa no te mau idolo.

 Na te Atua iho i maiti i to ˈna iˈoa, hurihia ei “Iehova” na roto i te reo Tahiti. a (Exodo 3:14, 15) Noa ˈtu te itehia ra te iˈoa o te Atua piri i te 7 000 taime i roto i te Faufaa Tahito (Te mau Papai Hebera e Arama), e rave rahi huriraa tei mono i te reira e te tiaraa “te Fatu.” Te hoê hiˈoraa, tei roto ïa i te parau tohu o te Salamo 110:1 o te faahiti ra ia Iehova e ia Iesu. Te na ô ra te hoê huriraa Bibilia Katolika: “Ua parau atura te Fatu [Iehova] i taˈu Fatu [Iesu].” (Ohipa 2:34-36, V.C.J.S.) Ia papu ia tatou o vai na Fatu e piti e faahitihia ra, ua tuu te Huriraa o te ao apî i te iˈoa o te Atua i te vahi tia. Te na ô ra tera irava: “Ua parau Iehova i to ˈu Fatu: ‘A parahi i to ˈu rima atau nei e ia faariro roa vau i to oe mau enemi ei taahiraa avae no oe.’”

 E rave rahi aivanaa te manaˈo ra e “Na ˈna e faariro” te auraa o te iˈoa o te Atua. E tano maitai teie iˈoa no te Atua mau anaˈe. Nehenehe o ˈna e riro i ta ˈna e maiti aore ra e faariro i te mau mea ta ˈna i poiete no te faatupu i ta ˈna opuaraa.

 O Iehova to tatou Atua poiete e o ˈna te Atua mau, mea tano iho â ïa ia haamori ia ˈna anaˈe. Eiaha ïa tatou ia haamori i te tahi atu taata e te tahi atu mea mai te mau idolo e te mau hohoˈa.—Exodo 20:2-6; 34:14; Ioane 1, 5:21.

 I roto i te mau irava matamua o te Isaia pene 42, ua tohu Iehova i te ohipa a te tavini ta ˈna i maiti. Te na ô ra te Atua no nia ia ˈna e “e hopoi oia i te parau-tia i te mau nunaa ěê.” (Isaia 42:1) No nia i teie parau tohu, te na ô ra te Atua: “I teie nei, te faaite nei au i te mea apî. Hou te reira a tae mai ai, e faaite au ia outou i te reira.” (Isaia 42:9) Ua tupu te parau tohu no nia i te tavini ta ˈna i maiti tau hanere matahiti i muri aˈe a tae mai ai te Mesia e a rave ai i ta ˈna taviniraa i nia i te fenua nei.—Mataio 3:16, 17; 12:15-21.

 “O vau o Iehova, o to ˈu ïa iˈoa, e ore au e horoa i to ˈu ra hanahana no vetahi ê; e te haamaitai ia ˈu ra i te mau hohoˈa otiotihia ra.”—Isaia 42:8, Te Bibilia Moˈa ra.