Te hoê hoa mau, o te hoê ïa taata o te nehenehe e tiaturihia. Mai te hoê taeae piri roa, e taata haapao maitai e te aupuru teie, i te mau taime fifi iho â râ.

 “E faaite te hoê hoa mau i te here i te mau taime atoa.” E nehenehe atoa e hurihia “e faaite noa te mau hoa i to ratou here.” Te taˈo Hebera no te parau “here” i roto i teie irava, e ere ïa i te hoê huru i roto noa i to tatou aau. E titauhia hoi ia faaite i tera here haavare ore na roto i te ohipa. (Korinetia 1, 13:4-7) Ia faaite na hoa i tera huru here te tahi i te tahi, eita raua e faarue i te tahi ia tupu te fifi i roto i te oraraa aore ra ia ore te tahi ia taa i te manaˈo o te tahi atu. Ua ineine atoa raua i te faaore i te hapa a te tahi e te tahi. (Maseli 10:12) Eita te hoê hoa e pohehae ia maitai te tahi atu, e oaoa râ o ˈna no to ˈna hoa.—Roma 12:15.

 “E taeae oia tei fanauhia no te taime ahoaho.” I roto i te hoê utuafare, mea puai roa te here e vai ra i rotopu i te mau taeae e to ratou mau taeae aore ra tuahine. No reira, ia tauturu tatou i te hoê hoa i te taime e fifi ai o ˈna, te haa ra tatou mai ta te hoê taeae mau e haa no to ˈna taeae aore ra tuahine. Hau atu â, eita te here o te tahoê i na hoa e iti mai aore ra e paruparu mai no te fifi. E puai atu â râ te reira no te here e te faatura ta raua e faaite i nia te tahi i te tahi.

 Te horoa ra te buka Maseli i te mau manaˈo î i te paari e te poto, e haaferuri mau râ te reira i te taata taio. Na te arii Solomona i papai i te rahiraa o te mau manaˈo i roto i te Maseli. Te tuati ra ta ˈna huru papairaa i te mau pehepehe papaihia na roto i te reo Hebera. E horoahia te mau manaˈo o te tuea, e te mau manaˈo o te taa ê i te tahi atu. Te tahi hiˈoraa o te horoa ra i te manaˈo o te tuea, o te Maseli 17:17. I roto i te piti o te tuhaa o te irava, e horoahia te tahi atu manaˈo o te haapapu mai i te manaˈo matamua o te irava. Area te Maseli 18:24, e horoa ïa i te manaˈo taa ê: “Te vai ra te hoa ua ineine i te taataahi te tahi i te tahi, te vai ra râ te tahi hoa mea piri aˈe i te hoê taeae.”

 A papai ai i te Maseli 17:17, ua manaˈo paha Solomona i te auhoaraa piri e vai ra i rotopu i to ˈna metua tane ra o Davida e o Ionatana, hoê o te mau tamaiti a te arii Saula. (Samuela 1, 13:16; 18:1; 19:1-3; 20:30-34, 41, 42; 23:16-18) Noa ˈtu e ere Davida raua Ionatana i te fetii, mea puai aˈe to raua here i te here e vai ra i rotopu e piti taeae i roto i te hoê â utuafare. Ua ineine roa ïa Ionatana i te pohe no to ˈna hoa ra o Davida. a

 “E here mai te tâua i te mau tau atoa ra, e i roto i te mau ati ra e itea ïa te taeae ra.”—Te Bibilia Moˈa V.C.J.S. (1988).

 A mataitai i teie video poto o te faaite mai i te tahi mau tuhaa o te buka Maseli.