Aita roa ˈtu. Aita te Bibilia e faahiti ra i te parau o te “vahi tamâraa hara.” Aita atoa te reira e haapii ra e te tamâhia ra te mau varua o te feia pohe i te hoê vahi. a A tapao na i ta te Bibilia e haapii ra no nia i te hara e te pohe e e nafea te reira e patoi ai i te haapiiraa o te vahi tamâraa hara.

•   O te faaroo faatupuhia i roto i te toto o Iesu te tamâ i te taata i ta ˈna mau hara, e ere râ te hoê vahi tamâraa hara. Te faaite ra te Bibilia e “e tamâ te toto o Iesu [te Tamaiti a te Atua] ia tatou i te mau hara atoa” e o Iesu Mesia “tei faatiamâ ia tatou i ta tatou mau hara i to ˈna iho toto.” (Ioane 1, 1:7; Apokalupo 1:5) Ua “horoa [Iesu] i to ˈna ora ei hoo no te taata e rave rahi” no te aufau i ta ratou mau hara.—Mataio 20:28.

•   Aita te feia tei pohe e ite i te tahi mea. “Ua ite hoi te feia ora e pohe ratou, aita râ te feia pohe i ite i te tahi mea.” (Koheleta 9:5) No reira, aita o ˈna e nehenehe e tamâhia e te auahi o te hoê vahi tamâraa hara.

•   Ia pohe te hoê taata, aita e faautuaraa no ta ˈna mau hara. Te parau ra te Bibilia e “ta te hara hoi e aufau mai i te taata, o te pohe ïa” e “te taata hoi tei pohe, ua matara ïa oia i ta ˈna hara.” (Roma 6:7, 23) O te pohe ïa te faautuaraa hopea no te hara a te taata.