Te faahiti pinepine ra te Bibilia ia Iesu mai “te Tamaiti a te Atua.” (Ioane 1:49) Te faaite ra te parau “Tamaiti a te Atua” e ua poiete te Atua ia Iesu, O ˈna hoi te Tumu o te ora. (Salamo 36:9; Apokalupo 4:11) Aita te Bibilia e haapii ra e ua riro te Atua ei Metua no Iesu mai te taata ra te huru.

 Te faahiti ra te Bibilia i te mau melahi mai “te mau tamaiti a te Atua mau.” (Ioba 1:6) Te parau atoa ra te Bibilia no nia i te taata matamua, o Adamu, e e “tamaiti na te Atua” oia. (Luka 3:38) Tera râ, i te mea e o Iesu ta te Atua i poiete na mua roa e o o ˈna anaˈe ta te Atua iho i poiete, te faahiti ra te Bibilia ia Iesu mai te Tamaiti otahi a te Atua.

•  Ua ora anei Iesu i te raˈi hou a fanauhia ˈi o ˈna i nia i te fenua?

•  Eaha ta Iesu i rave hou a haere mai ai o ˈna i nia i te fenua?

 E. E varua o Iesu i te raˈi hou a fanauhia ˈi o ˈna ei taata i nia i te fenua. Teie ta ˈna i parau: “Ua pou mai au mai te raˈi mai.”—Ioane 6:38; 8:23.

 Ua poiete te Atua ia Iesu hou a poiete ai oia i te mau mea atoa. Teie ta te Bibilia e parau ra no nia ia Iesu:

•   “O ˈna . . . te matahiapo o te mau mea atoa i poietehia.”—Kolosa 1:15.

•   O ˈna “te matamua ta te Atua i poiete.”—Apokalupo 3:14.

 Ua faatupu Iesu i teie parau tohu: “Mai mutaa ihora mai â oia, mai te mau mahana tahito mai â.”—Mika 5:2; Mataio 2:4-6.

 E tiaraa faahiahia to ˈna i te raˈi. Ua faahiti Iesu i tera tiaraa to ˈna a pure ai oia: “To ˈu Metua, a faahanahana mai ia ˈu . . . i te hanahana ta ˈu i fanaˈo na i pihai iho ia oe hou te huitaata i fanauhia mai ai.”—Ioane 17:5.

 Ua tauturu o ˈna i to ˈna Metua i roto i te poieteraa i te mau mea atoa. Ua ohipa amui Iesu e te Atua “mai te hoê rave ohipa aravihi.” (Maseli 8:30) Te parau ra te Bibilia no nia ia Iesu: “E mea na roto hoi ia ˈna i poietehia ˈi to te raˈi atoa e to te fenua atoa.”—Kolosa 1:16.

 Ua faaohipa te Atua ia Iesu no te poiete i te mau mea atoa, mai te mau melahi e te ao nui. (Apokalupo 5:11) E nehenehe e parau e ua ohipa amui te Atua e o Iesu mai te hoê taata peni hohoˈa fare o te ohipa amui ra e te taata patu. E faaohipa hoi te taata patu i te hohoˈa fare no te rave i ta ˈna ohipa.

 O Iesu te Parau. Tera ta te Bibilia e parau ra no nia ia Iesu hou a haere mai ai o ˈna i nia i te fenua. (Ioane 1:1) Te auraa ïa e ua faaohipa te Atua i ta ˈna Tamaiti no te faaite i ta ˈna poroi e ta ˈna mau faaueraa i te mau melahi.

 Hau atu, e au ra e ua ohipa Iesu ei auvaha na te Atua no te faaite i te mau poroi i te mau taata i nia i te fenua. O Iesu te Parau no te mea ua paraparau te Atua na roto ia ˈna a horoa ˈi i te mau faaueraa ia Adamu raua Eva i te ô i Edene. (Genese 2:16, 17) O Iesu paha te melahi tei aratai i te mau Iseraela i roto i te medebara e o to ˈna reo paha tei titauhia ia ratou ia faaroo maite.—Exodo 23:20-23. a