Ua papai te aposetolo Paulo: “Ia hinaaro vau e rave i te mea maitai, te ite ra vau i roto ia ˈu te hinaaro e rave i te mea ino.” (Roma 7:21) Ua tupu aˈenei te reira i nia ia oe? Mai te peu e e, e tauturu teie tumu parau ia oe ia mau papu i mua i te faahemaraa.

•  Te titauhia ia oe ia ite

•  Ta oe e nehenehe e rave

•  To ratou manaˈo

 Pinepine na vetahi ê e faahema ia oe. Te parau ra te Bibilia: “E ino te haerea maitai i te amuimuiraa i te feia iino.” (Korinetia 1, 15:33) E nehenehe vetahi ê aore ra te mau ravea apî e faatupu i roto i to oe aau i te mau hinaaro tia ore a pee atu ai oe i “te nahoa no te rave i te ino.”—Exodo 23:2.

 A feruri na: No te aha mea fifi aˈe ia mau papu i mua i te faahemaraa mai te peu e tâuˈa rahi roa oe i te manaˈo o vetahi ê?—Maseli 29:25.

 “E nehenehe te hinaaro ia au mai vetahi ê ia oe e turai atu ia rave i ta ratou e rave ra.”—Jeremy.

 Te mea faufaa: Eiaha ia vaiiho i te tahi atu feia apî ia taui i ta oe huru hiˈoraa no nia i te mea maitai.

 Ia papu ia oe i ta oe e tiaturi ra. Ia ore, e nehenehe oe e riro mai te hoê taoˈa hauti na vetahi ê. Mea maitai aˈe ia haapao i teie aˈoraa a te Bibilia: “Ia papu ia outou te mau mea atoa, a mau noa ˈtu ai i te mea maitai roa.” (Tesalonia 1, 5:21) Rahi atu â oe i te papu i ta oe e tiaturi ra, ohie atu â oe i te haapao i te reira e i te mau papu i mua i te faahemaraa.

 A feruri na: No te aha ua papu ia oe e no to oe maitai te mau faaueraa a te Atua?

 “Ua tapao vau ia haapao maite au i ta ˈu e tiaturi ra e ia mau papu vau i mua i te faahemaraa, e rahi atu â vetahi ê i te faatura ia ˈu.”—Kimberly.

 Hiˈoraa Bibilia: Daniela. Noa ˈtu mea apî noa â o ˈna, ua “faaoti . . . Daniela i roto i to ˈna aau” i te auraro i te mau ture a te Atua.—Daniela 1:8.

 Ia taa ia oe i to oe mau paruparu. Te parau ra te Bibilia e mea puai “te mau hinaaro o te apîraa.” (Timoteo 2, 2:22) E ere noa te hinaaro ia taati, oia atoa râ te hinaaro ia auhia mai oe e te taata e te hinaaro e rave i to oe tiamâraa.

 A feruri na: Te parau ra te Bibilia “e faahemahia . . . te taata tataitahi ia umehia oia e to ˈna iho hinaaro tia ore a hema ˈtu ai oia.” (Iakobo 1:14) Teihea hinaaro mea puai roa no oe?

 “Mea faufaa ia farii mea puai roa te tahi mau paruparu to oe. A rave i te mau maimiraa no te ite e nafea ia patoi i tera mau faahemaraa e a tapao eaha ta oe e nehenehe e rave. Ia hiti faahou mai tera faahemaraa, ua ite ïa oe e nafea ia mau papu.”—Sylvia.

 Hiˈoraa Bibilia: Davida. Aita o ˈna i mau papu noa i mua i te faahemaraa a vetahi ê, e i te tahi taime, ua upootia atoa to ˈna iho mau hinaaro tia ore i nia ia ˈna. Ua huti mai râ Davida i te haapiiraa i ta ˈna mau hape e ua tutava i te haamaitai. Ua pure oia ia Iehova: “A faatupu i te hoê aau viivii ore i roto ia ˈu . . . e a tuu i te hoê feruriraa apî e te aueue ore i roto ia ˈu.”—Salamo 51:10.

 Na oe e faaoti. Te parau ra te Bibilia: “Eiaha te ino ia upootia mai i nia ia oe.” (Roma 12:21) E ere no te mea e faahemaraa to mua ia oe, e hema iho â oe. E nehenehe oe e maiti i te rave i te mea maitai.

 A feruri na: I roto i te hoê tupuraa, e hinaaro paha oe e rave i te mea ino. Eaha te tauturu ia oe ia maiti i te rave i te mea maitai?

 “E feruri au eaha to ˈu huru mai te peu e rave noa vau mai ta ˈu e hinaaro. E oaoa anei au? Peneiaˈe, no te hoê taime poto râ. Ia mairi te mau matahiti, e maitai noa anei au? Eita, e ino roa ˈtu! E hoona anei ia rave i te reira? Eita!”—Sophia.

 Hiˈoraa Bibilia: Paulo. Ua ite Paulo e paruparu to ˈna, aita râ o ˈna i vaiiho i te reira ia upootia i nia ia ˈna. Ua papai oia: “Te tairi nei au i to ˈu iho tino, o ta ˈu e faariro ei tîtî na ˈu.”—Korinetia 1, 9:27.

 Te mea faufaa: I mua i te faahemaraa, eiaha e haamoˈe na oe e faaoti.

 A haamanaˈo, te mau faahemaraa, no te hoê noa taime. Te na ô ra Melissa, 20 matahiti: “Te mau faahemaraa rahi i te fare haapiiraa tua rua, mea faufaa ore ïa i teie mahana. Te mau faahemaraa o teie mahana, e ore ïa i mua nei. E ia tae i te hoê mahana, e hiˈo vau i muri e e taa ia ˈu ua maitaihia to ˈu oraraa no te mea ua mau papu vau i mua i te faahemaraa.”