Oioi paha ta oe tamarii i te tapao e te ohipa ra vetahi ma te ino i nia i te tahi atu no te mea mea ê to ratou iri aore ra fenua. E nafea oe e tauturu ai i ta oe tamarii ia ore e pee i tera manaˈo oti noa o te au-ore-raa i te feia no te fenua ê? Eaha ta oe e nehenehe e rave mai te peu te faaruru ra o ˈna i tera huru au-ore-raa?

I roto i teie tumu parau

•  E nafea ia tauaparau i te tamarii no nia i te taata no te fenua ê?

•  E nafea ia faataa i te tamarii no nia i te au-ore-raa i to te fenua ê?

•  E nafea ia horoa i te hiˈoraa maitai?

•  Eaha te rave ia faaruru ta oe tamarii i te au-ore-raa i to te fenua ê?

 Ta oe e nehenehe e faataa ˈtu. Na te ao nei, mea faahiahia roa te rauraa o te huru o te taata e te peu o tera e tera nunaa. No tera rauraa, te ohipa ra vetahi i nia i te tahi atu ma te ino no te mea mea ê to ˈna huru rapaeau aore ra to ˈna mau peu.

 Tera râ, te haapii mai ra te Bibilia e hoê â tupuna to te mau taata atoa. Te auraa ïa e, hoê â utuafare to tatou pauroa.

 “Ua ite mâua e ia apiti ta mâua mau tamarii i te tahi atu mau taata no te fenua ê, e taa ia ratou e mea faufaa ia haa i nia i te taata tataitahi ma te here e te tura.”—Karen.

 I te hoê taime, e faarooroo ta oe tamarii i te mau aamu no nia i te mau taata tei hamani ino i te tahi atu no to ˈna au-ore-raa i to te fenua ê. E nafea oe e faataa ˈi i ta oe tamarii eaha tei tupu? Tei te huru ïa o to ˈna matahiti te faataaraa ta oe e horoa ˈtu.

•   3-5 matahiti. Te na ô ra te aivanaa ra o Allison Briscoe-Smith, i roto i te hoê vea no te mau metua: “Mea faufaa roa no te mau tamarii o tera faito matahiti i te parau-tia. E niu papu ïa te reira no te aparau atu no nia i te mau ohipa parau-tia ore itehia.”

•   6-12 matahiti. I tera faito matahiti, mea hinaaro roa te tamarii ia ite e i te tahi mau taime, e ui ratou i te mau uiraa hohonu mau. A pahono atu ia au i te maraa ra ia oe. A tauaparau i ta oe tamarii no nia i ta ˈna i ite i te fare haapiiraa e i roto i te parau apî. A faaohipa i tera mau tauaparauraa no te faataa ˈtu e e ere i te mea tano te au-ore-raa i to te fenua ê.

•   13-19 matahiti. I tera faito matahiti, mea taa aˈe i ta oe tamarii i te mau fifi hohonu aˈe. Tera ïa te taime maitai aˈe no oe e no ta oe tamarii no te tauaparau no nia i te mau aamu faahitihia i roto i te parau apî no nia i te au-ore-raa i to te fenua ê.

 “E tauaparau mâua i ta mâua mau tamarii no nia i te au-ore-raa i to te fenua ê no te mea e faaruru iho â ratou i te reira i te hoê taime, noa ˈtu ihea ratou e ora ˈi. Aita anaˈe matou e tauaparau i te fare no nia i tera peu, e nehenehe ratou e pee i te huru feruriraa o te feia e au ore ra i to te fenua ê. E nehenehe te taata e horoa i te mau manaˈo hape i ta mâua mau tamarii a parau atu ai ia ratou e mea mau te reira.”—Tanya.

 E haapii te tamarii ma te hiˈo ia oe. Mea faufaa ïa no te mau metua ia hiˈopoa maite i ta ratou e parau ra e e rave ra. Ei hiˈoraa:

•   Te faaooo ra aore ra te faaino ra anei oe i te feia o te tahi atu nunaa? Te na ô ra te hoê pu hiˈopoaraa no nia i te huru o te mau tamarii e taurearea i Marite: “Te mataitai ra e te faaroo ra ta outou mau tamarii ia outou. E e pee iho â ratou i to outou hiˈoraa.”

•   Mea au anei na oe te apitiraa i te mau taata no te fenua ê? Te na ô ra te aivanaa Alanna Nzoma e tuatapapa ra i te huru o te mau tamarii: “Mai te peu te hinaaro ra outou ia au ta outou mau tamarii i te feia no te fenua ê, mea faufaa ia ite ratou e te na reira atoa ra outou.”

 “A mairi ai te mau matahiti, ua titau manihini matou i te fare i te mau taata no te fenua ê. Ua tamata matou i ta ratou maa, ua faaroo matou i ta ratou upaupa e ua oomo atoa matou i te ahu matauhia i to ratou fenua. A paraparau ai mâua i ta mâua mau tamarii no nia i te taata no te fenua ê, aita mâua e haamahiti i te taa-ê-raa o to ratou fenua. Hau atu, aita roa ˈtu mâua e parau e mea au aˈe ta matou taˈere.”—Katarina.

 Noa ˈtu te paraparau rahi nei te taata no nia i te auhoêraa, te rahi noa ˈtura te au-ore-raa i to te fenua ê na te ao nei. Te auraa ïa e e nehenehe te taata e ohipa ma te ino i nia i ta oe tamarii, mai te peu iho â râ tei rotopu o ˈna i te pǔpǔ taata iti aˈe o to oe fenua. a Ia tupu noa ˈtu te reira . . .

 A hiˈopoa i tei tupu mau. Ua hinaaro iho â anei te taata e ohipa ma te ino i nia i ta oe tamarii aore ra ua haa o ˈna ma te feruri ore? (Iakobo 3:2) E titauhia anei ia tauaparau i te taata tei ohipa ma te ino i nia i ta oe tamarii aore ra e nehenehe anei oe e ore e tâuˈa i ta ˈna i rave?

 Papu maitai, mea faufaa ia faaite i te hoê huru feruriraa aifaito. Te horoa ra te Bibilia i teie aˈoraa î i te paari: “Eiaha oe e inoino oioi.” (Koheleta 7:9) E ere te au-ore-raa i to te fenua ê i te ohipa hauti. Mai te peu râ ua rave te hoê taata i te tahi ohipa ta te tamarii i ore i au, eiaha e manaˈo oioi e taata au ore i to te fenua ê o ˈna.

 Papu, mea ê tera tupuraa i tera tupuraa. A hiˈopoa maite ïa i tei tupu mau hou a faaoti ai eaha ta oe e rave.

 I muri aˈe i to oe iteraa i tei tupu mau, a ui ia oe iho:

•   “Mea maitai anei no ta ˈu tamarii ia manaˈo e pauroa te taata mea au ore ïa i to te fenua ê? Oia atoa ia manaˈo o ˈna e i te mau taime atoa e faainohia ˈi o ˈna, no te mea ïa no te fenua ê o ˈna?”

•   “E faufaahia anei ta ˈu tamarii i te peeraa i tera aˈoraa Bibilia: ‘Eiaha . . . e haapao i te mau parau atoa ta te taata e parau’?”—Koheleta 7:21.

 Eaha te rave mai te peu ua hinaaro iho â te taata e ohipa ma te ino? A tauturu i ta oe tamarii ia taa e maitai mai aore ra e ino roa ˈtu te tupuraa, ia au i te pahonoraa ta ˈna e horoa ˈtu i mua i tera fifi. I te tahi taime, e faaooo, e hamani ino aore e faaino te tahi taata i te tahi atu no te mea te imi hara ra o ˈna. I roto i tera huru tupuraa, te pahonoraa maitai roa ˈˈe, o te oreraa ïa e tâuˈa ˈtu.

 I te tahi aˈe pae, mai te peu mea papu no ta oe tamarii ia na reira, e nehenehe o ˈna e paraparau i te taata tei ohipa ma te ino i nia ia ˈna. E nehenehe paha o ˈna e parau atu, ma te mǎrû: “E ere roa ˈtu ta oe i parau (aore ra i rave) i te mea tano.”

 Eaha te rave ia hinaaro oe e faaite i tei tupu? Mai te peu mea atâta no ta oe tamarii aore ra no oe, mea titauhia ia faaite i tei tupu, a haere e tauaparau i te mau tia o te fare haapiiraa, oia atoa i te mau mutoi ia titauhia.