Aita te mau matapo no te tahi mau fenua navai ore e fanaˈo hoê â mau ravea e te mau matapo no te tahi atu mau fenua. Aita paha ratou e tâuˈahia aore ra tauturuhia no te faaruru i te mau fifi a rave ai i te mau ohipa ohie no vetahi ê. Ei hiˈoraa, e ere i te mea ohie no ratou ia haere i te fare toa no te hoo mai i te maa, ia rave i te pereoo mataeinaa aore ra ia aufau i te tahi taoˈa. Mea fifi atoa te taioraa no ratou. Aita ratou pauroa e taio i te papai Braille (papai no te mau matapo). E ia ite anaˈe ratou, aita paha e papai na roto i to ratou iho reo.

Ua hau atu i te 100 matahiti to te mau Ite no Iehova neneiraa i te mau papai Bibilia no te mau matapo. Aita i maoro, ua hapono te mau Ite no Iehova i te mau matini neneiraa e tahoêraa buka i roto i te papai Braille mai te mau Pays-Bas e tae atu i Malawi. E nehenehe ïa te mau matapo e fanaˈo i te mau neneiraa i roto i te papai Braille reo Chichewa, hoê reo paraparauhia i Malawi.

E taeae aravihi Leo no te neneiraa i te mau papai i roto i te Braille i te amaa a te mau Ite no Iehova no Beresilia. Ua afaihia oia i Malawi no te tauturu i te hoê pǔpǔ e pae taata ia haapii e nafea ia faaohipa i te mau matini neneiraa buka. Oia atoa te hoê porotarama roro uira faaineinehia na te mau Ite no Iehova no te mau matapo. No te faaohipa i tera porotarama, e mea tia na mua ia tuu atu i roto te mau reta e tapao reo Chichewa e te mau tapao papai Braille. E nehenehe ïa tera porotarama e faariro i te mau reta reo Chichewa ei tapao Braille. E nehenehe atoa te reira e taui i te rahi o te mau tapao ia ohie aˈe te taioraa a te mau matapo. A hiˈo na eaha ta vetahi no Malawi i parau a noaa ˈi ta ratou mau papai i roto i te Braille.

Munyaradzi, hoê vahine matapo e 30 matahiti to ˈna. Te ohipa nei oia afa mahana i te hoê taiete haapurororaa radio. E haapii atoa oia ia vetahi ê no nia i te Bibilia 70 hora i te avaˈe. Teie ta ˈna i parau: “Ua matau vau i te fanaˈo i te mau papai i roto i te Braille reo Beretane. Ua putapû roa râ to ˈu aau i te noaaraa ia ˈu te reira na roto i to ˈu iho reo. Ua mauruuru roa vau i te mau tutavaraa e ohipa ta to ˈu mau hoa Ite no Iehova i rave ia fanaˈo matou i tera mau papai. E au ra e aita matou i haamoehia. Mea faufaa atoa matou.”

Francis, hoê Ite no Iehova no te pae apatoerau o Malawi. No te mea e matapo oia, na vetahi e taio no ˈna. A noaa ˈi râ ia ˈna no te taime matamua te mau papai i roto i te Braille reo Chichewa, ua parau oia: “E moemoeâ anei teie? Mea faahiahia roa te reira!”

Loyce, hoê tavini taime taatoa e matapo atoa. Ua tauturu oia e 52 taata ia haamaitai i to ratou oraraa. Mea nafea? E haapii oia i te mau taata ma te faaohipa i te mau papai i roto i te Braille area ta ˈna mau piahi, e papai e ere no te mau matapo ïa. Ua neneihia pauroa tera mau papai na te mau Ite no Iehova.

Leo, te taeae haapii no Beresilia tei faahitihia na mua ˈtu. Ua na ô oia: “E oaoa rahi ia horoa i te mau papai Bibilia i roto i te Braille e ia ite i te huru o te mau taata ia taa anaˈe e e papai te reira na roto i to ratou iho reo. Ua faaite te rahiraa i te mauruuru ia Iehova e oaoa no te mea e nehenehe ratou e faaineine ia ratou iho no te mau putuputuraa Kerisetiano e te ohipa pororaa. E ere faahou na vetahi ê e taio no ratou. I teie nei, e rave te mau matapo i ta ratou iho haapiiraa e e mea ohie aˈe ïa ia tauturu i to ratou utuafare ia haere i mua i te pae varua. E tauturu taua mau papai ra ia ratou ia haafatata ˈtu â ia Iehova.”