I te Apooraa a te Nunaa Amui no nia i te tauiuiraa o te ahuaraˈi (COP21), tei tupu mai te 30 no Novema tae atu i te 12 no Titema 2015, ua farerei te mau tia no na 195 fenua i Pari, Farani, no te tauaparau e nafea ia faaiti mai i te ohiparaa a te taata i nia i te ahuaraˈi na te ao nei. Fatata e 38 000 taata tei apiti i taua apooraa ra, mai te mau tia a te hau, te mau aivanaa, te feia paruru i te natura e te mau raatira tapihoo. Ua haere atu tau ahuru tausani taata ê atu i te hoê vahi haamaramaramaraa tapiri no te ite atu â no nia i te tauiuiraa o te ahuaraˈi.

Noa ˈtu e aita e Ite no Iehova i taua apooraa ra, mea anaanatae rahi na ratou te parau o te natura. Ua apiti tau hanere o ratou i te hoê opereraa taa ê i Pari no te tufa i te taata i ta ratou tiaturiraa Bibilia e ora i nia i te hoê fenua viivii ore.

A tere ai oia na nia i te hoê pereoo faautaraa taata, ua aparau te hoê Ite no Iehova e te hoê taata no Peru mai, tei ahu ia au i ta ratou peu tumu. Te faataa ra taua taata ra e noa ˈtu e e ea maitai to ˈna e te oaoa ra o ˈna i te ora i nia i te hoê mouˈa nehenehe mau, te haapeapea mau ra o ˈna no nia i te a muri aˈe o to tatou fenua. Ua putapû roa oia i te tiaturiraa tamahanahana i faaitehia ˈtu ia ˈna, e ma te oaoa ua farii oia i te hoê tareta o te faaite e nafea ia haere i nia i ta tatou reni www.mt1130.com.

I nia i te hoê pereoo auahi, ua paraparau e piti Ite no Iehova i te hoê aivanaa Marite paruru i te natura. Ua maere oia i te iteraa e e piti taime, ua fanaˈo te mau Ite no Iehova i te hoê re faahiahia, parauhia Quatre Green Globes, a te hoê pu no te mau paturaa viivii ore. Ua tutava hoi ratou i te haapao i te heipuni a opua ˈi ratou e hamani i na fare tahua apî e piti a te amaa a te mau Ite no Iehova i te Hau Amui i Wallkill, New York. Ma te oaoa, ua farii atoa oia i te hoê tareta JW.ORG.

No to ratou maere rahi i te anaanatae haavare ore o te mau Ite no Iehova i te heipuni, ua opua e rave rahi e haere i nia i ta tatou reni natirara. A faaroo ai te hoê tia vahine no Kanada e ua tutava te mau Ite no Iehova i te paruru i te mau vahi ofaaraa o te mau manu, piihia rouge-gorge bleu, i te pu rahi a te mau Ite no Iehova i Warwick, New York, ua parau oia: “Hou vau a paruru ai i te heipuni, e aivanaa vau no te mau manu. Aita vau i manaˈo e e faatura rahi to te mau Ite no Iehova i te mau animara. I teie nei, e taio vau i ta outou mau papai e e haere au i nia i ta outou reni natirara no te ite hau atu â no nia ia outou.”