E. No te mau Ite no Iehova, “mea faaurua mai” te Bibilia taatoa “e te Atua, e e mea maitai.” (Timoteo 2, 3:16) Te Faufaa Tahito e te Faufaa Apî atoa ïa, mai ta te rahiraa e parau noa ra. E faahiti te mau Ite no Iehova i teie na tuhaa mai te mau Papai Hebera e te mau Papai Heleni Kerisetiano. Eita ïa vetahi ê e manaˈo e mea faufaa ore te tahi mau tuhaa o te Bibilia.

 Ua turai te Atua i te aposetolo Paulo ia papai: “Te mau parau atoa hoi i papaihia i mutaa ihora, i papaihia ïa ia ite tatou.” (Roma 15:4) E haapiiraa faufaa mau ïa to roto i te mau Papai Hebera no tatou. E faatiaraa faufaa atoa e e aˈoraa î i te paari.

•   Faatiaraa faufaa. Te faatia ra te mau Papai Hebera ma te taa maitai i te poieteraa e te hararaa te taata. Auaˈe teie faatiaraa e ite ai tatou i te pahonoraa mauruuru i te mau uiraa mai teie: Nohea mai tatou? No te aha te taata e pohe ai? (Genese 2:7, 17) Te faatia atoa ra te mau Papai Hebera i te mau haaraa a te Atua ra o Iehova e te mau taata tei ite i te mau oaoa e fifi tei tuea i to tatou.—Iakobo 5:17.

•   Aˈoraa î i te paari. E aˈoraa î i te paari o te ore roa ˈtu e taui to roto i na buka Bibilia o te Maseli e te Koheleta, e tuhaa hoi o te mau Papai Hebera. E itehia e nafea ia fanaˈo i te hoê oraraa utuafare oaoa (Maseli 15:17), e nafea ia faito noa to tatou manaˈo i te ohipa (Maseli 10:4; Koheleta 4:6), e e nafea te feia apî e maitai ai (Koheleta 11:9–12:1).

 E faufaa-atoa-hia tatou i te taioraa i te ture a Mose papaihia i roto i te Torah (na buka matamua e pae o te Bibilia). Noa ˈtu e aita e titauhia ra ia pee te mau Kerisetiano i tera ture, e aratairaa faufaa mau to roto o te tauturu ia tatou ia oaoa i to tatou oraraa.—Levitiko 19:18; Deuteronomi 6:5-7.