I Kazakhstan, i te 23 no Me 2024, ua ravehia te hoê faaotiraa o te turu i te tiaraa o te feia e patoi ra i te rave i te tau faehau no ta ratou mau tiaturiraa. Ua ravehia tera faaotiraa ia au i tei tupu i nia ia taeae Daniil Smal, i te 20raa o to ˈna matahiti. Ua parau te haava e tupuraa “taa ê roa” to ˈna.

Ua titauhia ia Daniil ia haere i te piha fariiraa o te pu faehau hoê matahiti na mua ˈˈe i te 17 no Me 2023. Ma te tura, ua faataa o ˈna i ta ˈna mau tiaturiraa. Hau atu, ua faaitehia i te mau tia faehau i te hoê parau mana e faataa ra e nehenehe Daniil e patoi i te rave i te tau faehau no ta ˈna mau tiaturiraa. Noa ˈtu râ, aita te mau tia faehau i farii i ta ˈna aniraa. Te mahana i muri iho, ua faahepo ratou ia Daniil ia haere i te hoê pu faehau na nia i te pereoo auahi, i 2 000 kilometera te atea mai to ˈna oire o Rudny. I te roaraa o tera tupuraa fifi mau, ua vai taiva ore o ˈna ia Iehova. Aita ïa o ˈna i faahiti i te horeo a te mau faehau, i oomo i to ratou ahu e i rave i te tahi noa ˈˈe ohipa faaineineraa a te mau faehau. Ua papai o ˈna e rave rahi rata no te faaite i ta ˈna e faaruru ra. Aita râ te ohipa i taui aˈe. Fariu atura o ˈna i te tiripuna no te faaafaro i tera fifi. Ua titauhia i te tiripuna e toru avaˈe no te hiˈopoa i tera tupuraa.

Ei faahopearaa, i te 9 no Novema 2023, ua faaoti te tiripuna faehau piihia Almaty Garrison e aita te mau tia faehau i pee i te ture a faahepo ai ia Daniil ia rave i te tau faehau. I roto i ta ˈna faaotiraa, ua parau te tiripuna: “Ua ravehia te hoê faaotiraa no te faahepo ia Daniil ia apiti i te tau faehau, ma te ore e tâuˈa i ta ˈna mau tiaturiraa. Ua riro te reira ei patoiraa i to ˈna tiamâraa e maiti ia au i to ˈna manaˈo haava e ta ˈna mau tiaturiraa.” Ua faaoti atoa te tiripuna ia faatiamâhia Daniil i te pu faehau i reira o ˈna i faahepohia ˈi i te haere e ono avaˈe i te maoro.

I muri iti aˈe i tera faaotiraa, ua patoi te mau tia faehau i te reira e ua tuu faahou ratou i tera tupuraa i mua i te tiripuna. Tera râ, i te 16 no Eperera 2024, ua haapapu te tiripuna faehau teitei roa ˈˈe o te Repupirita no Kazakhstan i te faaotiraa rave-aˈena-hia. Ua haamanahia tera faaotiraa faufaa roa i te 23 no Me 2024. Ua tu te reira i te ture nunaa rau e te ture i Kazakhstan. E haapapu te reira i te tiamâraa e maiti o te taata ia au i to ˈna manaˈo haava. Ua haapapu te tiripuna i te reira a parau ai: “Aita roa ˈtu e tiaraa to te hau fenua no te faahepo i te hoê taata ia rave i te hoê ohipa, ma te ore e tâuˈa i to ˈna manaˈo haava.”

A tahi ra te hoê tiripuna i Kazakhstan e haapapu ai e nehenehe te hoê taata e patoi i te rave i te tau faehau no ta ˈna mau tiaturiraa. Ua parau taeae Lev Gladyshev, hoê auvaha a te mau Ite no Iehova i Kazakhstan: “Te oaoa nei matou e ua farii papu te mau tiripuna i te tiamâraa e maiti o Daniil ia au i to ˈna manaˈo haava. Ua riro tera faaotiraa ei niu papu no te mau tupuraa a muri aˈe, ia turuhia e ia paruruhia te tiaraa tumu o te taata i Kazakhstan e i Asia no Ropu.”—Timoteo 1, 2:1, 2.