Te parau ra te Bibilia e i to te mau Iseraela haruraa i te Fenua tǎpǔhia e i to ratou tufaraa i te reira i rotopu i to ratou mau opu, ahuru opu o Manase tei fanaˈo i te fenua i tooa o te râ o te Ioridana, tei faataa-ê-hia e te toea o te opu. (Iosua 17:1-6) Te vai ra anei te tahi mau haapapuraa e ua tupu mau â te reira?

 I 1910, ua itehia mai i Samaria te mau huˈahuˈa farii araea e iˈoa to nia iho. I nia iho i tera mau huˈahuˈa, ua itehia te tahi mau papai na roto i te reo Hebera, e itehia te mau taihaa moni tei haponohia, mai te uaina e te monoˈi, i te aorai o te arii i te oire pu. Ia amuihia, 102 huˈahuˈa tei itehia no te vaˈuraa o te senekele hou te tau o Iesu, tera râ, 63 noa papairaa tei ite-maitai-hia. I nia iho i na 63 huˈahuˈa, e itehia te matahiti, te iˈoa o te mau opu, te taata hapono e te taata na ˈna te mau taihaa.

 Te auraa, te mau opu atoa i nia i te mau huˈahuˈa i itehia i Samaria, no te opu o Manase ïa. Ia au i te NIV Archaeological Study Bible, te horoa ra te reira “i te mau haapapuraa hau o ta te Bibilia i parau no nia i te vahi i ora ˈi te opu o Manase.”

 Te haapapu atoa ra te mau huˈahuˈa i itehia i Samaria, te tanoraa o te mau parau a te taata papai Bibilia ra o Amosa o tei parau no nia i te feia ona o tera tau: “Mea inu auˈa noa ta ratou i te uaina e te parai ra ratou ia ratou i te mau monoˈi maitai roa ˈˈe.” (Amosa 6:1, 6) Te haapapu atoa ra te mau huˈahuˈa i itehia i Samaria e ua haponohia iho â teie mau taihaa i te tuhaa fenua i faaeahia e na ahuru opu o Manase.