Hitu ravea no te haapao i ta tatou maa
No te aha mea faufaa roa ia haapao i ta outou maa
Mea faufaa roa te maa ta outou e amu no te maitai o to outou ea. Ia haapao maitai outou i ta outou maa, e maitai noa to outou ea. Ia ore râ outou e haapao a amu ai i te maa ino, e roohia outou i te fifi pae ea. Ia titohia te hoê pereoo i te mori viivii e fifihia te pereoo a ino atu ai. Aita paha te reira e ite-oioi-hia, e tupu iho â râ.—Galatia 6:7.
Ia au i te Taatiraa no te ea na te ao nei, “i te mau fenua atoa ati aˈe te ao nei, te itehia ra te fifi o te maa.” E ere noa te fifi o te navai-ore-raa i te maa, o te maˈi poria atoa râ. Ma te amu pinepine i te maa e ere roa ˈtu i te mea maitai no te tino, e nehenehe tatou e roohia i te maˈi mafatu, te maˈi roro, te omaha tihota e te mariri ai taata. Ia au i te hoê maimiraa, i roto hoê noa matahiti e 11 mirioni taata tei pohe no to ratou haapao-ore-raa i ta ratou maa. Te na ô ra te Taatiraa no te ea na te ao nei e, no te maa viivii ta ratou i amu, ua hau i te tausani taata te pohe nei i te mahana hoê e e mirioni taata te roohia i te maˈi e te tahi atu fifi pae ea.
I roto i te Bibilia, te faaitoitohia ra tatou ia haapao maitai i ta tatou e amu no te maitai o to tatou ea. I roto, te parauhia ra e, “Tei [te Atua] ra te ora.” (Salamo 36:9) E ô faufaa mau ïa te ora, e faaite tatou i to tatou mauruuru no teie ô ma te haapao maitai i to tatou ea, oia atoa te ea o to tatou utuafare. E hiˈo anaˈe e nafea.
Maha ravea no te fanaˈo i te maa au mau
1. A haapao maitai a faaineine ai i te maa.
No te aha? E nehenehe te manumanu maˈi a i roto i te maa e te pape e ô mai i roto i to tatou tino a faatupu atu ai i te maˈi.
Te na ô ra te mau aivanaa:
A horoi i te rima i te pape e te puˈa hou a faaineine ai i te maa. b A papuˈa i to outou rima e 20 tetoni te maoro. A ǔiǔi i te niaraa o to outou rima, na ropu i te mau manimani e na raro aˈe i te mau maiuu. A horoi maitai i te pape e a tamǎrô i to outou rima.
A rave i te puˈa e te pape no te horoi i te tâpûpûraa maa, te mereti e te tahi atu taihaa e faaohipahia no te faaineine i te maa. Hau atu, eiaha e faaohipa i te hoê â tâpûpûraa maa no te maa ota e no te maa e tunuhia.
A horoi maitai i te maa hotu, mai te peu râ te ora ra outou i te vahi e faaohipahia te pape repo no te pîpî i te mau faaapu, a ǔiǔi maitai ïa i te reira.
2. A faataa ê i te maa ota e te maa tunuhia.
No te aha? E manumanu maˈi to roto i te pape o te inaˈi ota e e nehenehe te reira e haaviivii i te maa.
Te na ô ra te mau aivanaa:
A faataa ê i te mau maa ota atoa. A faataa ê iho â râ te vairaa o te inaˈi e te vairaa o te maa ineine no te amu ta outou i hoo mai.
Ia oti te inaˈi i te tâpûpûhia, a horoi maitai i to outou rima, te tipi e te tâpûpûraa maa hou a tâpûpû ai i te tahi atu maa.
3. Ia tano maitai te amaraa o te maa.
No te aha? E pohe te manumanu maˈi ia ama maitai te maa.
Te na ô ra te mau aivanaa:
A faaama maitai i te maa ta outou e tunu ra. No te mau maa atoa, oia atoa te inaˈi, e titauhia ia tunu e 30 tetoni te maoro i te faito 70 teteri te puai.
A vaipâ maitai i te tihopu e te maa parauhia ragoûts.
A tahana maitai i te maa tei ama aˈena.
4. A haapao maitai i te anuvera o te vahi e tuu ai outou i te maa.
No te aha? Ia vaiihohia te maa e 20 minuti i te hoê faito ropu i te 5 e 60 teteri, e tataipiti te bateria. Hau atu, ia ore te inaˈi e tuuhia i te hoê faito teteri tano, e ora noa te tahi mau bateria i te taime e tunuhia ˈi te inaˈi.
Te na ô ra te mau aivanaa:
No te faaiti i te manumanu maˈi, e titauhia ia tuu i te maa toˈetoˈe i roto i te faatoˈetoˈe e mai te peu ua ama te maa, e ara tatou ia mahanahana noa te reira.
Eiaha roa ˈtu e vaiiho i te maa i rapae hau atu piti hora aore ra hoê hora i te vahi ua naeahia 32 teteri.
Mai te peu ua ama aˈena te maa, a tahana te reira hou a tamaa ˈi.
Toru ravea no te fanaˈo i te maa maitatai
1. A amu e rave rau maa hotu i te mau mahana atoa.
Mea faufaa roa ia amu i te maa hotu, mea rahi hoi te vitami, te taoˈa maitai o te repo e te tahi atu mau tuhaa maitatai no te ea. Ia au i te Taatiraa no te ea na te ao nei, e titauhia ia amu e pae maa hotu i te mau mahana atoa. Aita te umara, te maniota e te tahi atu maa mai tera e taiohia i roto i te mau maa hotu.
2. Eiaha e amu rahi roa i te maa hinu.
Te faaara ra te Taatiraa no te ea na te ao nei ia faaiti i te amu i te maa oti e te maa hinu, mea ino roa hoi tera mau maa. Mea au aˈe ia rave i te hinu raau tupu no te tunu i ta outou maa. c Mea maitai aˈe taua mau hinu ra i te tahi atu mau hinu.
3. A faaiti i te miti popaa e te tihota.
Te parau ra te Taatiraa no te ea na te ao nei, hoê noa punu taipu nainai miti popaa te titauhia i te taata paari no te mahana taatoa e e 12 punu taipu nainai tihota. d E itehia te tihota i roto i te rahiraa o te maa e inu. Ei hiˈoraa, no e 355 mililitera pape monamona e taiohia hau aˈe i te 10 punu taipu nainai tihota. Mea rahi te tarori i roto i te pape monamona, aita ïa rea maitai no te tino.
Te parau ra te Bibilia: “E ite te taata feruriraa haroˈaroˈa i te tupuraa atâta e e tapuni oia, e haere noa ˈtu râ te maˈua a faaruru atu ai i te mau faahopearaa.” (Maseli 22:3) Ia haapao maitai outou i ta outou maa a rave atu ai i te mau tauiraa titauhia, te faaite ra ïa outou i to outou mauruuru i te Atua no te ô o te ora.
Manaˈo hape matauhia
Manaˈo hape: Mai te peu mea monamona, mea noˈanoˈa e mea aminamina te maa, mea maitai ïa no to tatou ea.
Manaˈo tano: E titauhia 10 miria bateria no te faareru i te hoê litera pape, e nehenehe râ 15 tae atu 20 bateria ino mau e faatupu roa i te maˈi. No te amu i te maa e no te inu i te pape maitai, a haapao maitai i te anuvera, te taime e tunu ai outou i te maa, e tuu ai outou i te reira i nia i te amuraa maa e ia faanaho outou i te reira.
Manaˈo hape: Eita te raˈo e haaviivii i te maa.
Manaˈo tano: E amu te raˈo i te mea reporepo mai te tutae, e ofaa atoa ratou i nia iho. E rave rahi ïa manumanu maˈi i nia i to ratou avae. A tapoi maitai ïa i ta outou maa ia ore te raˈo e tau i nia iho.
Manaˈo hape: “Mea maoro teie nei to ˈu amu-noa-raa i te maa e ere i te mea maitai no to ˈu ea, aita ïa e apî ia taui au i te maa ta ˈu e amu.”
Manaˈo tano: Ia au i te mau aivanaa, ia amu tatou i te maa maitai i teie nei â, eita ïa tatou e pohe oioi e e maitai atu â to tatou ea.
a E mau mea ora nainai roa te mau manumanu maˈi, ta tatou e ore e nehenehe e ite mata. Te vai ra te mau bateria, te mau tirotiro e te tahi atu mau manumanu iino. Te vai atoa ra te manumanu maitai, mea atâta râ te tahi atu no te mea e nehenehe te reira e haamauiui aore ra e haapohe roa ia tatou.
b Mea maitai aˈe ia faaohipa i te puˈa e te pape no te horoi i te rima.
c Ia vaiihohia te hinu i rapae, eita te reira e paari.
d Ia parauhia te tihota, o te mau mea monamona atoa ïa mai te tihota no te taofe, te meri, te vaimona e te vaiharo maa hotu. E ere roa ˈtu ïa i te monamona no roto mai i te maa hotu e te û.
