Titiro tahito: Eaha te reira?
Te mau titiro, e taoˈa nainai teie o tei nanaˈohia, faaohipahia i nia i te araea aore ra te tapau. Mea oeoe, mea orapa e mea menemene teie taoˈa e e itehia te hohoˈa o te mau animara i nia iho. E haapapu te titiro i te hoê parau haamana, e faaohipa-atoa-hia te reira i nia i te mau pute, uputa e te tomoraa o te mau menema.
Te hoê titiro menemene o te arii no Peresia o Dariu I, e aˈuaˈu ra i te animara e te hoê hohoˈa o te titiro i nia i te araea
Ua rau te hamaniraa o te mau titiro, e faaohipahia na te ivi, te ofai puˈa, te metara, te ofai moni rahi aore ra te raau. I te tahi mau taime, e nanaˈohia te iˈoa o te taata na ˈna teie titiro e te iˈoa o to ˈna metua i nia iho. Te haapapu atoa ra te tahi mau titiro i te tiaraa o teie taata.
No te haapapu i te hoê parau haamana, e tuu te fatu i te titiro i nia i te araea, te tapau aore ra te tahi atu mau taoˈa mǎrû i nia i te parau haamana. (Ioba 38:14) E paari mai te reira no te paruru i te parau haamana.
E faaohipahia te mau titiro no te horoa i te mana
Te taata tei ia ˈna ra te titiro a te fatu, tei ia ˈna atoa ïa te mana. Te hiˈoraa ïa o Pharao no Aiphiti e Iosepha te tamaiti a Iakoba. E tǐtǐ Iosepha i Aiphiti. I muri iho, ua tuuhia o ˈna i te fare tapearaa ma te tano ore. I te roaraa o te tau, ua tuu Pharao ia ˈna i rapae e ua faatoroa ia ˈna i nia i te fenua taatoa o Aiphiti. Te parau ra te Bibilia: “Iriti ihora ïa Pharao i to ˈna tapea rima titiro mai nia i to ˈna rima, tuu atura i nia i to Iosepha rima.” (Genese 41:42) No te mea tei ia Iosepha ra te tapea rima titiro, tei ia ˈna atoa ïa te mana no te ohipa a te arii.
Ua faaohipa te arii vahine o Iezebela no Iseraela i te titiro a ta ˈna tane no te haapohe ia Nabota. Ma te iˈoa o te arii Ahaba, ua papai oia i te mau rata i te tahi atu mau matahiapo ma te ani ia ratou ia pari e ua faaino Nabota i te Atua. Ua tuu oia i te titiro a te arii i nia i te mau rata e ua manuïa ta ˈna opuaraa.—Te mau arii 1, 21:5-14.
Ua faaohipa te arii Ahasueru no Peresia i te hoê tapea rima titiro no te haamana i ta ˈna mau faaueraa.—Esetera 3:10, 12.
Ua faataa te taata papai Bibilia o Nehemia e ua haamana te mau huiarii no Iseraela, te ati Levi e te mau tahuˈa i te hoê parau faaau ma te tuu i ta ratou titiro i nia iho.—Nehemia 1:1; 9:38.
Te faahiti ra te Bibilia e piti tupuraa e faaohipahia ˈi te titiro no te paruru i te mau tomoraa. I to te peropheta Daniela taoraraahia i roto i te apoo o te mau liona, “afaihia maira te hoê ofai e tuuhia ˈtura na nia iho i te auvaha o te apoo.” Eaha ta te arii Dariu, te faatere o Medai e Peresia i rave? “Titiro ihora te arii i te reira i to ˈna tapea rima titiro e te tapea rima titiro a to ˈna huimana, eiaha te tahi parau ia tauihia no Daniela.”—Daniela 6:17.
I te tuuraahia te tino o Iesu Mesia i roto i te menema, ‘tapiri maitai aˈera to ˈna mau enemi i te menema i te ofai’ no te paruru i te tomoraa. (Mataio 27:66) Te parau ra David Turner no te hoê tatararaa Bibilia no nia ia Mataio, mai te peu e titiro no ǒ mai i te feia mana ra, “e tuuhia ei titiro, te araea aore ra te tapau i roto i te area . . . ofai e te tomoraa o te menema.”
No te mea e nehenehe te mau titiro tahito e haapii rahi mai no nia i te tau i mairi, ua anaanatae roa te mau ihipǎpǎ e te mau aivanaa i te reira. Ua riro ïa te tuatapaparaa i te mau titiro ei tuhaa faufaa roa i roto i te mau maimiraa.
