Exodo 6:1-30
6 Na ô maira ïa Iehova ia Mose: “I teie nei, e ite oe eaha ta ˈu e rave ia Pharao.+ E faahepo te hoê rima puai ia ˈna ia tuu ia ratou ia haere, e e faahepo te hoê rima puai ia ˈna ia tiahi ia ratou i rapae i to ˈna fenua.”+
2 Na ô maira te Atua ia Mose: “O vau o Iehova.
3 E i fa mai na vau ia Aberahama, Isaaka e Iakoba ei Atua Manahope,+ aita râ vau i faaite roa ˈtu ia ratou+ no nia i to ˈu iˈoa Iehova.+
4 Ua haamau atoa vau i ta ˈu faufaa e o ratou no te horoa no ratou i te fenua o Kanaana, te fenua i ora ˈi ratou ei taata ěê.+
5 Ua faaroo râ vau i te autâ a te nunaa o Iseraela, ta to Aiphiti e faatîtî ra, e te haamanaˈo ra vau i ta ˈu faufaa.+
6 “No reira, a parau i te ati Iseraela: ‘O vau o Iehova, e e faatiamâ vau ia outou i te mau ohipa teimaha a to Aiphiti, a faaora ˈtu ai ia outou i ta ratou faatîtîraa,+ e e faaora mai au ia outou ma te rima faatorohia* e ma te faautuaraa rahi.+
7 E e rave mai au ia outou ei nunaa no ˈu, e e riro vau ei Atua no outou,+ e e ite mau â outou e o vau o Iehova to outou Atua o te faatiamâ ra ia outou i te mau ohipa teimaha a to Aiphiti.
8 E e aratai au ia outou i te fenua ta ˈu i horeo* e horoa ia Aberahama, Isaaka e Iakoba, e e horoa ˈtu vau i te reira ia fatu outou.+ O vau o Iehova.’”+
9 I muri iho, faaite atura Mose i teie poroi i te ati Iseraela, aita râ ratou i faaroo ia Mose no to ratou toaruaru e no te faatîtîraa ino mau.+
10 Paraparau maira ïa Iehova ia Mose, a na ô ai:
11 “A tomo i mua ia Pharao, te arii o Aiphiti, e a parau atu ia tuu oia i te ati Iseraela ia haere i rapae i to ˈna fenua.”
12 Tera râ, pahono atura Mose ia Iehova: “A hiˈo na, aita te ati Iseraela i faaroo ia ˈu,+ o Pharao ïa te faaroo ia ˈu, mea fifi hoi no ˈu ia paraparau?”*+
13 Tera râ, parau faahou maira Iehova ia Mose raua Aarona eaha te mau faaueraa e horoa i te ati Iseraela e ia Pharao, arii o Aiphiti, no te aratai i te ati Iseraela i rapae i te fenua o Aiphiti.
14 Teie te mau aratai o te utuafare o to ratou mau tupuna: Na tamaiti a Reubena, ta Iseraela matahiapo,+ o Hanoka, Palu, Hezerona e Karemi.+ Tera te huaai o Reubena.
15 Na tamaiti a Simeona, o Iemuela, Iamina, Ohada, Iakina, Zohara e Saura, te tamaiti a te hoê vahine ati Kanaana.+ Tera te huaai o Simeona.
16 Teie te iˈoa o te mau tamaiti a Levi:+ Geresona, Kohata e Merari.+ No roto mai ia ratou to ratou huaai. Te roaraa o to Levi oraraa, 137 ïa matahiti.
17 Na tamaiti a Geresona, o Libeni raua Simei, ia au i to raua mau utuafare.+
18 Na tamaiti a Kohata, o Amerama, Izahara, Heberona e Uziela.+ Te roaraa o to Kohata oraraa, 133 ïa matahiti.
19 Na tamaiti a Merari, o Maheli raua Musi.
Tera te mau fetii no roto mai i te mau tamaiti a Levi.+
20 Rave ihora Amerama ia Iokebeda, te tuahine o to ˈna metua tane, ei vahine faaipoipo na ˈna.+ Fanau maira oia na ˈna ia Aarona raua Mose.+ Te roaraa o to Amerama oraraa, 137 ïa matahiti.
21 Na tamaiti a Izahara, o Kora,+ Nephega e Zikeri.
22 Na tamaiti a Uziela, o Misaela, Elizaphana+ e Sitiri.
23 Rave ihora Aarona ia Eliseba, ta Aminadaba tamahine, te tuahine o Nahasona,+ ei vahine faaipoipo na ˈna. Fanau maira oia na ˈna ia Nadaba, Abihu, Eleazara e Itamara.+
24 Na tamaiti a Kora, o Asira, Elikana e Abiasapa.+ Tera te mau utuafare o te ati Kora.+
25 Rave ihora Eleazara,+ ta Aarona tamaiti, hoê o na tamahine a Putiela, ei vahine faaipoipo na ˈna. Fanau maira oia na ˈna ia Phinehasa.+
Tera te mau upoo o te mau utuafare o te mau metua no roto mai i te mau tamaiti a Levi, ia au i to ratou mau utuafare.+
26 O taua Aarona raua Mose ra ta Iehova i parau: “A aratai i te nunaa o Iseraela i rapae i te fenua o Aiphiti, tera pǔpǔ e tera pǔpǔ.”+
27 O raua tei paraparau ia Pharao, arii o Aiphiti, no te aratai i te nunaa o Iseraela i rapae ia Aiphiti. O taua Mose raua Aarona ra.+
28 I te mahana i paraparau ai Iehova ia Mose i te fenua o Aiphiti,
29 na ô maira Iehova ia Mose: “O vau o Iehova. A parau ia Pharao, arii o Aiphiti, pauroa ta ˈu e parau nei ia oe.”
30 E parau atura Mose i mua ia Iehova: “Inaha, mea fifi hoi no ˈu ia paraparau,* e faaroo ïa Pharao ia ˈu?”+
Nota i raro i te api
^ Aore ra “puai.”
^ Heb: “amo i to ˈu rima i nia.”
^ Heb: “mea peritome-ore-hia hoi au i te utu.”
^ Heb: “mea peritome-ore-hia hoi au i te utu.”
