Faarue ihora Iesu i Ierusalema i te Monire i te taperaa mahana, no te hoˈi i Betania i te pae hitia o te râ o te mouˈa Oliveta. Eita e ore e ua taoto oia i ǒ Lazaro, Maria e Mareta.

I te poipoi aˈe i te 11 no Nisana, reva ˈtura Iesu e ta ˈna mau pǐpǐ no te hoˈi i Ierusalema, i reira Iesu e haere ai i te hiero no te taime hopea. Tera ïa te mahana hopea o ta ˈna taviniraa hou a faatupu ai i te Pasa, a haamau atu ai i te Oroa haamanaˈoraa o to ˈna pohe, a haavahia ˈi e a haapohehia ˈtu ai.

A haere noa ˈi ratou na Betania ˈtu na nia i te mouˈa Oliveta i Ierusalema, ite ihora Petero i te tumu raau ta Iesu i faaino inanahi aˈe i te poipoi. Na ô maira oia: “Rabi, a hiˈo na, ua mǎrô te tumu suke ta oe i faaino.”—Mareko 11:21.

No te aha te tumu suke i mǎrô ai ia Iesu? Faataa ˈtura oia i te tumu: “Oia mau ta ˈu e parau atu: Mai te peu e e faaroo papu to outou, e rave ïa outou i ta ˈu i rave i te tumu suke. Ia parau atoa outou i teie mouˈa: ‘Ia pee oe e ia taorahia i roto i te miti,’ e tupu iho â te reira. E te mau mea atoa ta outou e ani na roto i te pure ma te faaroo, e fanaˈo iho â outou.” (Mataio 21:21, 22) Te faahiti faahou ra oia i ta ˈna i parau aˈena no nia i te faaroo o te nehenehe e faahaere i te hoê mouˈa i te tahi atu vahi.—Mataio 17:20.

I te mǎrôraa te tumu suke ia Iesu, te haapii ra oia i ta ˈna mau pǐpǐ i te faufaa rahi o te faaroo i te Atua, a na ô ai: “Te mau mea atoa ta outou e ani ia pure outou, a tiaturi e ua noaa ia outou, e noaa iho â ïa.” (Mareko 11:24) E haapiiraa faufaa mau teie no te mau pǐpǐ atoa a Iesu, e tano iho â râ no te mau aposetolo fatata i te faaruru i te mau tamataraa fifi. Te vai ra te tahi atu â taairaa i rotopu te mǎrôraa te tumu suke e te faaroo.

Mai teie tumu suke te nunaa Iseraela. Ua faaau te Atua i te hoê faufaa e teie nunaa, e e au ra e mea haapao ratou i te ture a Mose. Tera râ, te ere ra ratou i te faaroo e aita e hotu maitai ta ratou i faatupu. Ua patoi atoa ratou i te Tamaiti iho a te Atua! No reira, i te mǎrôraa ia Iesu te tumu suke hotu ore, te faaite maitai ra oia eaha te tiai mai ra i teie nunaa hotu ore e te faaroo ore.

I muri iho, tomo ihora Iesu e ta ˈna mau pǐpǐ i Ierusalema. Mai ta ˈna i matau, haere ihora Iesu i te hiero e haapii atura i te taata. A manaˈo ai i ta Iesu i rave inanahi aˈe i nia i te feia taui moni, mârô maira te mau tahuˈa tiaau e aratai ati Iuda: “I teihea mana e rave ai oe i teie mau mea? Aore ra na vai i horoa ia oe i teie mana no te rave i teie mau mea?”—Mareko 11:28.

Pahono atura Iesu: “E uiraa atoa ta ˈu. Ia pahono mai outou, e faaite atoa ˈtu ïa vau i teihea mana e rave ai au i teie mau mea. Te bapetizoraa a Ioane, no te raˈi mai anei aore ra no ǒ mai i te taata ra? A pahono mai.” Ratou atura ïa te uihia ra. Na ô aˈera te tahi i te tahi: “Ia parau tatou: ‘No te raˈi mai,’ e na ô mai ïa oia: ‘No te aha ïa outou i ore ai i tiaturi ia ˈna?’ Ia parau râ tatou: ‘No ǒ mai i te taata ra,’ e naheahia mai ïa tatou?” No to ratou mǎtaˈu i te nahoa “o te tiaturi ra e e peropheta Ioane,” i feruri ai ratou mai tera.—Mareko 11:29-32.

Aita teie feia patoi i ite e nafea ia pahono ia Iesu. Na ô maira ratou: “Aita matou i ite.” Na ô atura Iesu: “Eita atoa ïa vau e faaite atu i teihea mana e rave ai au i teie mau mea.”—Mareko 11:33.