HAAPIIRAA 2
O vai te Atua?
1. No te aha e haamori ai i te Atua?
Na te Atua mau i poiete i te mau mea atoa. Aita to ˈna e haamataraa e e vai oia e a muri noa ˈtu. (Salamo 90:2) Na ˈna te parau apî oaoa i roto i te Bibilia. (Timoteo 1, 1:11) O ˈna anaˈe ta tatou e haamori, na ˈna hoi i horoa mai i te ora.—A taio i te Apokalupo 4:11.
2. Mai te aha te huru o te Atua?
Aita e taata i ite mata aˈenei i te Atua, e Varua hoi oia tei hau ê i te taata e ora nei i te fenua. (Ioane 1:18; 4:24) E ite râ tatou i to ˈna huru na roto i te mau mea ta ˈna i hamani. A hiˈo na i te maa hotu e te tiare rave rau, te faaite maira ïa i to ˈna here e paari. E te ao nui, i to ˈna ïa puai.—A taio i te Roma 1:20.
E ite atu â tatou i te huru o te Atua ma te taio i te Bibilia. E faaite mai te reira eaha ta ˈna e au e ta ˈna e ore e au, to ˈna huru i nia i te taata e ta ˈna e rave i roto i te mau tupuraa rau.—A taio i te Salamo 103:7-10.
3. E iˈoa anei to te Atua?
Ua parau Iesu: “To matou Metua i te raˈi, ia moˈa to oe iˈoa.” (Mataio 6:9) Mea rahi te tiaraa o te Atua, hoê anaˈe râ iˈoa to ˈna. E faahitiraa taa ê to to ˈna iˈoa i roto i tera e tera reo. I ǒ tatou, o “Iehova” ïa.—A taio i te Salamo 83:18.
I roto e rave rahi Bibilia, ua monohia to te Atua iˈoa i na tiaraa Fatu aore ra Atua. I te papairaahia râ te Bibilia, e itehia te iˈoa o te Atua hau atu i te 7 000 taime. Ua faaite Iesu i to te Atua iˈoa i to ˈna haapiiraa i te taata no nia i to ˈna Metua.—A taio i te Ioane 17:26.
A hiˈo i te video E iˈoa anei to te Atua?
4. Te haapeapea ra anei o Iehova no tatou?
Mai teie papa î i te here, te haa nei te Atua ia oaoa noa tatou
Ua rahi roa te mauiui. Te auraa anei ïa e aita te Atua e haapeapea ra no tatou? No vetahi, te haamauiui ra te Atua ia tatou no te haavare, aore ra tamata, ia tatou. Ua hape râ ratou.—A taio i te Iakobo 1:13.
E haafaufaa te Atua i te taata ma te ho atu i te tiamâraa e maiti. Na tatou iho e maiti e tavini ia ˈna, e ere anei i te mea faahiahia? (Iosua 24:15) Mea rahi râ tei faaoti e rave ino ia vetahi ê, a rahi atu ai te mauiui. Te oto nei Iehova no teie mau ohipa tano ore.—A taio i te Genese 6:5, 6.
Te haapeapea ra te Atua ra o Iehova no tatou. E hinaaro oia ia oaoa tatou i te oraraa. E fatata oia i te faaore i te mauiui e te feia e faatupu ra i te reira. No te aha râ oia i vaiiho noa ˈi i te mauiui? E pahono mai te Haapiiraa 8.—A taio i te Petero 2, 2:9; 3:7, 13.
5. E nafea ia faafatata ˈtu â i te Atua?
Te ani maira Iehova ia faafatata ˈtu ia ˈna na roto i te pure. Te tâuˈa ra oia ia tatou tataitahi. (Salamo 65:2; 145:18) Ua ineine oia i te faaore i te hara. Te ite nei oia e te tutava ra tatou i te faaoaoa ia ˈna noa ˈtu to tatou huru tia ore. E nehenehe iho â e fanaˈo i te taairaa piri e te Atua.—A taio i te Salamo 103:12-14; Iakobo 4:8.
Na Iehova i ho mai i te ora. Ia rahi aˈe ïa to tatou here ia ˈna i te tahi atu. (Mareko 12:30) Ia faaite oe i to here i te Atua ma te haapii â no nia ia ˈna e ma te rave i to ˈna hinaaro, e piri roa ˈtu â oe ia ˈna.—A taio i te Timoteo 1, 2:4; Ioane 1, 5:3.
