Noa ˈtu no te tahi mau aivanaa ua rau te faaiteraa i te oto, mea taa ê ta te tahi huru otoraa i ta te tahi atu. Ia ore te hoê taata e taˈi aore ra e faaite i to ˈna mauiui, te auraa anei aita oia e oto ra i tei pohe? E ere! Parau mau, ma te taˈi, e nehenehe te reira e tamǎrû ia tatou, e ere râ tera anaˈe te ravea no te faaite i to tatou oto. Tei te huru hoi o te nunaa, te huru e te tupuraa o te taata, e mea nafea tei herehia i te poheraa.

Aita paha te feia e oto ra i ite eaha to ratou huru ia pohe tei herehia. Tera râ, ua faaruru te rahiraa i te mau tupuraa i muri nei, e peneiaˈe, tera atoa te tupu i nia ia oe.

E hepohepo te aau. E taˈi e e mihi te taata e oto ra i tei pohe. E taui hanoa atoa te huru o te feia e oto ra. E moemoeâ e e haamanaˈo ratou i te mau taime ta ratou i fanaˈo e tei pohe. I te haamataraa, e hitimahuta ratou e eita atoa e farii ua pohe tei herehia. I te faaiteraahia ˈtu ua pohe ta ˈna tane o Timo, te na ô ra Tiina: “Ua faaea noa vau, aita i haere ia ˈu ia taˈi. No te hepohepo rahi, i te tahi taime, mea fifi no ˈu ia huti i to ˈu aho. Aita vau i tiaturi tera tei tupu.”

E haapeapea, e riri e e faahapa atoa. Te na ô ra Ivan: “Ua riri mâua ta ˈu vahine o Yolanda tau taime rii i muri aˈe i te poheraa o ta mâua tamaiti o Eric. Ua maere roa mâua, e ere hoi tera to mâua huru! Ua haapeapea atoa mâua, peneiaˈe, aita mâua i tauturu rahi roa i ta mâua tamaiti, e tupu mai nei te manaˈo faahapa.” Ua faaoromai maoro te vahine a Alejandro i to ˈna maˈi e pohe atura. I muri aˈe i te reira, ua faahapa Alejandro ia ˈna. Te na ô ra oia: “I te omuaraa, ua manaˈo vau ua vaiiho te Atua ia faaruru vau i teie ati no te mea e taata ino vau! I muri mai râ, ua tatarahapa vau i te parauraa no te Atua te hape!” Te na ô atoa ra Kostas, tei faahitihia i roto i te tuhaa na mua ˈtu: “Ua riri atoa vau i ta ˈu vahine o Sophia, eaha paˈi o ˈna i faarue mai ai ia ˈu! I muri mai râ, ua tatarahapa vau. E ere hoi no ˈna te hape!”

Mea fifi ia feruri maite. I te tahi mau taime, e faatupu te taata e oto ra i te mau manaˈo o te ore e tuati ra i te ohipa i tupu. E manaˈo paha te taata e oto ra te ora noa ra tei pohe, mai te huru ra te faaroo aore ra te ite ra oia ia ˈna. Mea fifi atoa no te taata e oto ra ia feruri maite aore ra ia haamanaˈo i te tahi mau mea. Te na ô ra Tiina: “I te tahi taime, te aparau ra vau, to ˈu râ feruriraa, vahi ê roa ïa! I roto i to ˈu feruriraa, e hiti taue mai te mau ohipa i tupu na mua ˈˈe i te poheraa o Timo. Mea peapea roa, eita e haere ia ˈu ia haamau i to ˈu feruriraa i nia i te tahi ohipa taa maitai.”

E hinaaro e faaatea ê mai i te taata. I te tahi taime, e riri aore ra e huru ê tei oto ia haere oia i rotopu i te taata. Te na ô ra Kostas: “Ia amui atu vau i te feia faaipoipo, e oia atoa i te feia faaea taa noa, mai te huru ra e aita to ˈu e parahiraa i rotopu ia ratou.” Te na ô atoa ra Yolanda, te vahine a Ivan: “E ere i te mea ohie ia faaroo i te hoê taata ia amuamu no to ˈna mau fifi, e ere hoi i te fifi rahi mai to mâua. Mea oaoa ia paraparau mai te mau metua no nia i ta ratou mau tamarii, i te hoê â râ taime, mea mauiui mau. Mea faufaa ia haere mâua i mua, e ere râ i te mea ohie ia na reira.”

E fifi te ea. Mea pinepine eita te taata e oto ra e hinaaro e tamaa, e topa to ˈna kilo i raro e eita oia e taoto maitai. Te faatia ra Aaron te ohipa i tupu hoê matahiti i muri aˈe i te poheraa o to ˈna papa: “Mea  fifi no ˈu ia taoto maitai. I te mau po atoa, e ara taue mai au i te hoê â hora ma te manaˈo i te poheraa o to ˈu papa.”

Ua manaˈo Alejandro e ua roohia oia i te maˈi, te na ô ra oia: “Ua haere au e farerei i te taote e rave rahi taime, ua haapapu mai râ oia mea oraora maitai au. Taa aˈera ia ˈu, na te oto e faatupu ra i te mauiui na nia i to ˈu tino. Ua iti mai râ te mauiui i muri aˈe.” Ua tano râ Alejandro i te haereraa e farerei i te taote, e nehenehe hoi te oto e haafifi i te ravea parururaa o to tatou tino, aore ra e faatupu e e faarahi i te maˈi.

Mea fifi ia rave i te mau ohipa faufaa. Ua parau Ivan: “I muri aˈe i te poheraa o Eric, ua titauhia ia faaite mâua i te fetii, te hoa e i te tahi atu mau taata, ua pohe ta mâua tamaiti, mai to ˈna paoti ohipa e te fatu o te fare ta ˈna e tarahu ra. Mea fifi atoa ia faaî i te mau papie e ia faanaho i te mau taihaa a Eric. Noa ˈtu te rohirohi i te pae feruriraa e te tino, e te mauiui atoa, e titauhia ia feruri i teie mau mea atoa.”

No vetahi râ, e fifi ratou a rave ai i te mau ohipa haapaohia na e te taata herehia tei pohe. O te tupuraa ïa o Tiina, te faataa ra oia: “Na Timo e haapao na i ta mâua moni e te mau haamâuˈaraa. I teie nei, na ˈu atura ïa e rave i te reira, rahi roa ˈtu â ïa vau i te haapeapea! Aita vau i ite e maraa anei ia ˈu ia haapao maite i te reira!”

Ia feruri tatou i te mauiui, te mau haapeapearaa e te fifi ta te pohe o tei herehia e faatupu, e nehenehe tatou e manaˈo eita e roaa ia tatou ia faaoromai. E ere râ. Ma te ite hoi i te reira, e faaruru maitai aˈe paha tatou i tera ati. A haamanaˈo atoa mea taa ê te huru otoraa a tera e tera taata. Hau atu â, mea faufaa ia ite e ere i te mea ino ia oto i tei pohe.

Te tupu i nia i te feia e oto ra: E nehenehe te mauiui e mǎrû mai i te roaraa o te tau, e ere râ te auraa e faaea roa ratou i te oto, aore ra e moˈe ia ratou te taata herehia tei pohe. E oto faahou paha ratou ia hiti taue mai te mau taime oaoa i roto i to ratou feruriraa, aore ra i te tahi mau taime i roto i te matahiti, mai i te taio mahana o to ratou faaipoiporaa. No te rahiraa râ, ua mǎrû mai to ratou mauiui, e ua nehenehe ratou e rave faahou i te mau ohipa o te mau mahana atoa. Mai te peu iho â râ e rave te fetii e te hoa i ta ratou tuhaa, e na reira atoa te feia e oto ra.

Ehia taime te titauhia no te faaea i te oto? No vetahi, tau avaˈe paha. No te rahiraa râ, hoê aore ra e piti matahiti te mairi na mua ˈˈe ratou e maitai faahou mai ai. Area no te tahi atu, e taime rahi atu â te titauhia. a Te na ô ra Alejandro: “O vau nei, ua oto vau fatata e toru matahiti te maoro.”

A farii e titauhia te taime no te faaea i te oto. Eiaha e haapeapea i to ananahi, e eiaha atoa e faaau ia oe ia vetahi ê. Ia tae i te hoê mahana, e nehenehe oe e faaea i te oto! Te vai ra anei te tahi mau mea ta oe e nehenehe e rave i teie mahana no te tamǎrû i to oe oto ia ore te reira ia maoro atu â?