MEA ohie no te moo agame ia ouˈa mai te hoê vahi papu i nia i te hoê patu. Noa ˈtu e e hee oia i nia i te vahi manina, e tae iho â ia ˈna ia na reira. Maoti te aha? Maoti to ˈna aero.

A hiˈo na: Ia ouˈa te mau moo agame ma te tano mai te hoê vahi taratara ˈtu, e faaafaro ratou i to ratou tino a tuu atu ai i te aero i raro. Mai te hoê vahi manina ˈtu râ, e tuu ïa ratou i te aero i nia. Mea taa ê roa ïa teie huru raveraa. “E mea tia ia faaafaro noa te mau moo i to ratou aero ia tano to ratou toparaa,” ta te hoê parau faataa a te Fare haapiiraa teitei o Kalifonia, i Berkeley, i faaite. Rahi atu â te manina o te vahi, rahi atu â te moo i te faatia i to ˈna aero ia tano te toparaa.

E nehenehe te aero o teie moo e tauturu i te feia îite ia hamani i te tahi pereoo taa ê o te ore e tahuri ia tere vitiviti te reira i te mau vahi atoa. E faaohipahia te reira no te imi i te feia i ora mai i muri aˈe i te hoê aueueraa fenua aore ra te tahi atu ati. Ia au i te taata maimi ra o Thomas Libby: “E nehenehe te mau animara e hautiuti mai ta ratou e hinaaro eiaha râ teie mau matini. No reira, ia ite-noa-hia ˈtu te tahi ravea e afaro noa ˈi te pereoo, e riro ïa te reira ei haereraa rahi i mua.”

Eaha to oe manaˈo? Mea tupu noa anei te aero o te moo agame? Aore ra mea poietehia anei?